Genesis 34
34
Dinacta abusaśhanpïmi tulincuna cutichiculcan
1Jacobpa Lea walminćhu Dina chulinmi chay malcaćhu lasac-masincunacta lisiycamü yalula. 2Chayćhu Hev lädup puydïnin Hamorpa chulin Shiquem nishanmi Dinacta abusälul pinꞌayman ćhuläla. 3Jinälulpis Shiquempa śhunꞌun Dinaćhümi cacuyäla. Chaymi Dinap śhunꞌunta suwaycuyta imanuypapis ashiycula. 4Chaymi papänin Hamorta Shiquem nin: “Cay wamlawan cuscanäpä yaycupacuyña” nil.
5Ñatac Jacob chulin Dinacta pinꞌayman ćhulaśhanta yaćhälam. Juc chulincuna uywacunäwan ulꞌucunäćhu cayaptinmi ćhäpämunancama imactapis mana nillal cayäla. 6Shiquempa taytan Hamorñatacmi Jacobman limamü lila.
7Ñä Jacobpa chulincuna cutïlälimul yaćhälälilmi sumä llaquicälälin. Chaynütac sumä-sumä rabyälälin Israelpa wamla chulinta chaynu pinꞌayman ćhulaśhanpïta. Paycunaćhuꞌa cay lulaycuna manam calachu. 8Ñatac Hamormi paycunacta nin: “Chulí Shiquempa śhunꞌunpis muspayninpis Dinallaćhüñam cacuyällan. Awniycälillämay cuscachinapä. 9Juc caśhtallañari caycuśhun, amcunapis wamläcunawan cuscapäcuy, yaꞌacunapis wamlayquicunawan walaśhnïcunacta cuscachipäcuśhä. 10Chaynüpaćh amcuna cay malcäćhu yaćhapäcunqui. Allpallá cayanmi, munaśhayquićhu chalaculcay duyñuña capäcunayquipä, nigusyaculcänayquipäpis” nil.
11Jinaman Shiquempis Dinap taytantawan tulincunactam nin: “Ćhasquiycälimaptiquiꞌa, ima mañamäśhayquitapis uycuśhayquim. 12Maynu ćhaniyu illaytapis, aläjacta nimaptiquipis munaśhayquimannümi uycuśhayqui cuscachimänayquipä” nil.
13Ñatac Jacobpa chulincuna panin Dinacta pinꞌayman ćhulaśhanpïtam Shiquemtawan taytan Hamorta casquillanwan nipäcun: 14“Mana siñalachicüśha nunacunämanꞌa panïta manamá upäcümanchu. Chaynücuna yaꞌacunapá pinꞌaymi. 15Cuscachipäcunac captinꞌa caytam lulaycunqui: Amcunaćhu lluy wayapacuna umri cayninćhu yaꞌacunanu siñalachiculcay. 16Chaynu captinꞌa juc caśhtallaña calćha ampa yaꞌapa caśhtanchiccuna casaraculcanman. 17Mana siñalaculcaptiquim ichá panïta puśhaculcul caypi pasaculcäśhä” nil.
18Chay nishancämi Hamorpawan chulin Shiquempa allin cala. 19Chaynu Jacobpa wamla chulin Dinaćhu muspayninpis cacuyaptinmi mana-mana Shiquem siñalachicüla. Pay quiquinpa ayllunćhu lluypïtapis allinpä licaśham cacula. 20Chaymi Hamor chulintin Shiquem malcap puncunćhu juntunacüśha malca-masincunawan limanaculcäla cay nil: 21“Tayta mamacuna, cay nunacuna yaꞌanchicnu alli nuna-camam. Jinantin malcanchicćhu allpallá cayanmi yaćhaculcänanpä nigusyucta lulaculcänanpäpis. Chayćha wamlancunawan walaśhninchiccuna casaraculcanman, paycunapis yaꞌanchiccunawan. 22Ñatac paycunawan juc caśhtallaña cananchicpä llapanchic umricunaca paycunanu siñalachiculcänanchictam munapäcun. 23Paywan juc caśhtallaña canapä awniptinchicꞌa lluy uywancunapis ima cänincunapis yaꞌanchicpäñach canꞌa” nin.
24Chaymi chay malcap puncunćhu lluy limanacücunaca Hamorwan Shiquem nishanta awnipäcula. Chaymi lluy wayapacuna, walaśhcuna siñalachiculcäla. 25Ñatac quimsa muyuncäćhu sumä nanapacälälisha lluy cayalcaptinmi Jacobpa chulin, Dinap tulin Simeonwan Levi ispädancunacta chalacalcälil malcaman yaycülälila. Chaymi chayćhu mana imanaytapis atipäta chalalcälil lluy wañülächila. 26Hamortawan Shiquemta ispädawanmi camacaycüla. Jinalculmi Shiquempa wasinpïta panin Dinacta jululcul cutichiculcäla. 27Jinaman Jacobpa waquin chulincunañatacmi paninta pinꞌayman ćhulaśhanpi chay wañuchisha caśhancunäman lilcul malcap lluy ima cänincunactapis waycälälila. 28Aticulcälam uwishnincunacta, wäcancunacta, aśhnuncunactapis. Malcaćhu ćhaclancunaćhu lluy ima cänincunactapis apaculcälatacmari. 29Chaynütacmi lluy imantapis lluy walmicunactapis, uchuchä chulincunactapis uywayninpä puśhaculcäla.
30Chaymi Jacob chulin Simeontawan Levita nin: “Canan cay Canaan Ferez läducunäwan cunca cuchuymanćha ćhulämanqui. Sumä-sumäćha ćhïnïmanchic. Ashlla cayaptinchicꞌa jinantin nunancuna juntunacuycul wasintintaćh wañüchimäśhun” nil.
31Niptinmi paycunañatac: “Waticactanu panïta lulayaptin ¿jawcachun capäcuśha imatá?” nipäcun.
ప్రస్తుతం ఎంపిక చేయబడింది:
Genesis 34: QVW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
