Lukas 21

Paekz lu yah keu maaiz

(Markus 12:41-44)

1Meuz Yesuhz temz yawt boh ne awlz ihz maang keui sapz paekz lu tuhz teuk dangz paekz tuhz wat. 2Hnhz awlz yah keu maaiz phaanz hawkz sapz paekz tawng kyehz aarz khlaepz. 3Hnhz daz, “Ohz daz mawn pehz nahz, yah keu maaiz phaanz ne sapz heungz leuz keuh klawhz ihz. 4Kawp daz ihz keui phraez leh kaai daehz maang rae sapz, keuiz daz yah keu maaiz an phaanz ne leh hacz aamz an daehz maang an lo damz phawmz daehz ne lu.”

Wat ngaz luh

(Matthe 24:1-2, Markus 13:1-2)

5Teu paez Hnhz teur ka keui daz lawng wat laep baaiz, leh reu aangz an laep boh leh phrihz phrahz ihz lu keui cih mok. Keuiz daz Yesuhz lao, 6“Pehz awlz boh reu aangz keu ni. Kraao reu aangz keu ni nam baetz hawkz kaai hawkz ne ngaz phraeoz, ngaz talz ya thengz hacz aamz.”

Phez longz

(Matthe 24:3-14, Markus 13:3-13)

7Keuh maanyz, “Tahz ehz, ngaz naeh ceun diz peuk naeh hoh? Meuz ngaz naeh ceun diz ne maang an pleung pleung naehz hoh?”

8Yesuhz mial daz, “Pehz seu tih, yak aez ihz upz suamz pehz. Ihz tang heungz keui truz leh mus Ohz daz, ‘Daehz naeh Khris!’ Keuh daz, ‘Kraao a wa phraeoz.’ Keuiz daz yak tawiz keuh. 9Meuz pehz ngarz tiukz siukz boh seuk weur keurz ta mial ne yak ngaat. An keu ni ngaz naeh aacz boh, keuiz daz maat phraeoz ti dutz.

10Ihz seu kheuz boh seu kheuz ngaz teur tiukz, seu prih boh seu prih kaw ngaz teur naak. 11Reu yung keui ngaz khruhz baaiz klawhz ti, an coh nguat boh reung dengz penz keui kaw ngaz naeh klawhz ti. An laak laaiz boh rak seum doz baaiz keui ngaz naeh lang kaang raaoz. 12Meuz maat naeh ceun keu diz ne, ihz ngaz mat pehz, tekz suamz pehz. Keuh ngaz maap pehz tawiz crawp, leh pehz sapz tuhz thang. Pehz ngaz phraeoz aacz ngaai khunz boh ihz mawh kawp mus Ohz. 13Kawp an keu diz pehz ngaz bawnz krai lawng Ohz. 14Yak kawcz phawmz teuk aacz ngaz bawnz tawpz mial ceun nae. 15Ohz ngaz aez pehz nahz mony reu ma, ihz thiangz pehz keui nam caang tawpz caang thiangz. 16Mah paz, kuanz mai, ihz kaang, ceu kheuz, tang kuanz bohz keui ngaz aapz pehz aez yam. 17Ihz ngaz ceuh pehz kawp Ohz. 18Keuiz daz hukz kingz pehz seu senz kaw nam luh. 19Pehz ngaz bawnz phawmz kawp pehz nyeun klakz klakz.

Weng Yerusalem ngaz luh

(Matthe 24:15-21, Markus 13:14-19)

20Meuz pehz awlz siukz keui wit wit boh weng Yerusalem ne lo mas weng an diz ngaz luh. 21Meuz ceun diz ihz naeh tuhz prih Yio keui aez tiunz raw kaai rang keui. Ihz naeh tuhz weng keui aez lae lan, ihz naeh tawiz nawk kaw yak aez keuh kut tuhz weng. 22Kawp daz kraao seu ngihz an diz naeh seu ngihz aez taam ceun tuhz kyaamz lik taemz mok. 23Kraao an diz kreuk baaiz ta keun nyah keun meur boh keun nyah maang kuanz buhz. Phez taam longz Phraz Pen Caoh ngaz klaez kaai prih an ni boh tawsahz Phraz ngaz klaez sapz kaai ceu kheuz an ni. 24Ihz teur ka yam kawp waac. Ihz teur ka keui talz ihz mat lan nawk prih. Ihz an nam anz kheuz Yio keui paenz suamz weng Yerusalem thonz taw kraao keuh neuk.

Kuanz Ihz mial truz

(Matthe 24:29-31, Markus 13:24-27)

25Meuz ceun diz ne kiarz, seu ngihz boh seuk muny keui ngaz naeh rak seum sangz. Ihz tuhz prih keu tehz keui doz ngaat, teuk krusz dangz toz kawp reus seuk mar omz boh paang laai raak keurz. 26Ihz keui doz baaiz rae yam teur wil kawp an ngaz naeh tuhz prih keu tehz. Taanz khoz lang plengz keui ngaz keusz. 27Meuz ceun diz Kuanz Ihz ngaz truz tang taanz khoz mawh boh bunz mawh tuhz peu eumz. 28Meuz an keu diz seun teungz naeh truz ne teur aacz daehz rawi ceng ngaw kingz pehz kawp daz reung dengz khyawt a wa naeh thatz.”

Pung taek teungz laangz wah

(Matthe 24:32-35, Markus 13:28-31)

29Yesuhz lao keuh nahz mony pung taek, “Yawt teungz laangz wah boh teungz khaehz keui raez. 30Meuz pehz awlz lahz run kaw mas a wa thatz kiarz kawcz. 31Naeh ceun khuz an diz meuz pehz awlz lawng keu ni ne lo mas prih Phraz Pen Caoh a wa naeh thatz baaiz.

32Ohz daz mawn pehz nahz co ihz keu ni maat hacz, an keu diz ngaz naeh hacz aamz. 33Plengz boh keu tehz ngaz luh kaw mony reu ma Ohz nam luh.

Pao yawt rak rak

34Seu tih toz daehz. Yak takz phawmz tawiz seum suamz, yak cawc, yak kawcz phawmz ta suamz ta tiangz leuz peun. Meuz naeh ceun diz, seu ngihz an diz doz naeh ceun dakz keu piutz sapz kaai pehz. 35Kawp daz dakz an diz keu piutz sapz teuk khranz kaai ihz tuhz prih keu tehz hacz aamz. 36Pehz seu tih toz daehz rae suz tawngz pao aez daehz caang lawt thaz an ngaz naeh keu ni hacz aamz, aez daehz caang ceng aacz ngaai Kuanz Ihz.”

37Meuz seu ngihz an diz Yesuhz sawnz aez tuhz teu laangz wat, meuz teuk borz samz Hnhz raw lan kaai rang Olip. 38Ihz keui truz cu tawz teu laangz wat teuk ngup cao cao, aez daehz bawnz teuk ngarz traz Yesuhz.

ప్రస్తుతం ఎంపిక చేయబడింది:

Lukas 21: ril

హైలైట్

షేర్ చేయి

కాపీ