Lukas 22
22
Ihz kyaam piamz Yesuhz
(Matthe 26:1-5, Markus 14:1-2, Yohn 11:45-53)
1Meuz pawiz kaaiz mun nam sapz ceu an daz pawiz lawt phez ne ngaz phraeoz, 2beunz caangz keui, ihz mawz kyaamz keui kyaam rah piamz Yesuhz, keuiz daz keuh doz ihz.
Yudas Iskariot saz Yesuhz
(Matthe 26:14-16, Markus 14:10-11)
3Meuz ceun diz Satan kut tuhz Yudas Iskariot, an naeh tuhz teu paez seu kawlz aarz. 4Hnhz lan cu beunz caangz keui, ihz mawh siukz pao wat keui rae teur reu ma daehz ngaz mat Yesuhz ceun nae. 5Keuh seuz phawmz rae prawm ngaz aez hnhz nahz paekz. 6Hnhz kaw prawm, khahz kraao saang trohz aapz Yesuhz meuz wungz ihz keui nam naeh.
Raenz pawiz kaaiz mun lawt phez
(Matthe 26:17-25, Markus 14:12-21, Yohn 13:21-30)
7Meuz phangz pawiz kaaiz mun nam sapz ceu, naeh kaai seu ngihz piamz soz lawt phez ne a wa phraeoz. 8Yesuhz lao Petros kaar Yohn nahz, “Lan raenz pawiz lawt phez ta ehz suamz raez.”
9Kaar maanyz mial daz, “Mih sunz aez aaiz raenz a naez hoh?”
10Yesuhz lao kaar nahz, “Meuz paarz kut tuhz weng ne saanyz boh ihz keur meh beusz omz. Lan tawiz hnhz kut tuhz kaang an hnhz kut, 11daz tahz kaang ne nahz, ‘Tahz Sra ehz daz, lukz khaekz naeh a naez, ti Ohz boh teu paez Ohz suamz kaaiz mun ne naeh a naez?’ 12Ihz an diz ngaz plaez paarz nahz lukz mawh raan thaz kol an khriungz mok. Raenz mok ehz nahz a diz raez.”
13Petros kaar Yohn kaw lan awlz ceun Yesuhz lao rae kaar raenz mok pawiz lawt phez a diz.
Pawiz Caoh Phraz
(Matthe 26:26-30, Markus 14:22-26, 1 Korin 11:23-25)
14Meuz kraao a wa phraeoz ne Yesuhz boh teu maan keui keu dez truz suamz kaaiz mun kaai pheunz. 15Hnhz daz keuh nahz, “Co Ohz maat talz peur teuk ne Ohz sunz suamz kawmz pehz baaiz, pawiz kaaiz mun nam sapz ceu. 16Ohz daz mawn pehz nahz, Ohz nam suamz thaengz kaaiz mun ceun ni, taw lawng an ni maat keunyz tuhz prih Phraz Pen Caoh.”
17Yesuhz leh klakz omz seu pit, dawkz kez cuz Phraz Pen Caoh rae daz, “Leh klakz an ni, teur phraez tiangz raez. 18Ohz lao pehz, taw prih Phraz Pen Caoh tae ne Ohz nam tiangz thaengz seu pawk leui.”
19Yesuhz leh tang kaaiz mun, lupz phrawz kez cuz Phraz Pen Caoh. Hnhz pekz kaaiz mun an diz aez keuh nahz, “An ni naeh toz Ohz, an ohz cunz aez pehz nahz. Aez pehz tang Ohz ne cih ceun ni raez.” 20Naeh ceun diz, waaiz suamz kaaiz borz ne, Hnhz leh tang klakz omz seu pit, Hnhz daz keuh nahz, “An ni naeh naamz Ohz, an thawkz aez pehz nahz, naeh traz an prawm teun mehz.
21Keuiz daz yawt raez, tihz ihz an aapz Ohz ne naeh kawmz Ohz kaai pheunz an ni! 22Kuanz Ihz ngaz bawnz yam ceun a wa bakz mok, keuiz daz kaai ihz aapz ne naeh an nam rak.”
23Keuh teur deuiz teur maanyz daehz naeh yaeh ngaz cih ceun ni a.
Yaeh ngaz mawh myaat lak ihz?
24Teu maan keui teur thiangz daehz daz tuhz keuh ne yaeh mawh myaat lak ihz. 25Yesuhz lao keuh nahz, “Khunz an nam anz kheuz Yio keui leh a na upz peung ihz prih daehz, ihz maang a na keui kaw daz daehz cih kez cuz kaai ihz prih daehz. 26Keuiz daz pehz yak cih ceun keuh. An mawh lak ihz ne aez naeh ceun an kyehz lak ihz raez, ihz peur aacz kaw aez naeh ceun kuanz leng ihz raez. 27Ihz keu dez a pheunz boh ihz cih damz ne yaeh mawh myaat leuz a? Nam anz ihz keu dez haz? Keuiz daz Ohz naeh ceun kuanz leng peur lah pehz.
28Meuz Ohz talz an kyaam ya ne pehz naeh kawmz Ohz se se. 29Ceun Paz Ohz aez Ohz upz peung prih ne Ohz kaw ngaz aez pehz upz peung. 30Pehz ngaz bawnz suamz bawnz tiangz kawmz a pheunz Ohz tuhz prih Ohz, keu dez kaai plaang ne ngaz tatz traz kaai kheuz Israel seu kawlz aarz.
Yesuhz lao aacz Petros ngaz thiangz thengz Daehz
(Matthe 26:31-35, Markus 14:27-31, Yohn 13:36-38)
31‘Simon, Simon, teuk ngarz raez! Satan maanyz kriung pehz naeh ceun ihz kriung kaaiz kyung ne. 32Keuiz daz Ohz suz tawngz aez mih boh, yak aez reung dengz yum mih pleung. Meuz mih waaiz cu mial Ohz ne aez kuanz mai daehz keui nahz keum rang raez.’”
33Petros mial daz, “Tahz, sangz daz bawnz klaez thang kawmz Mih hiuz, yam kawmz Mih hiuz kaw ohz a wa peun tan mok.”
34Yesuhz mial daz hnhz nahz, “Borz meu ni co yaerz maat keu dawrz ne mih ngaz thiangz Ohz waiz laehz ngaz daz daehz nam mas Ohz.”
Thangz paekz, seu kiz boh waac
35Yesuhz maanyz teu paez Daehz keui nahz, “Meuz Ohz cao pehz lan nam khaenz thangz paekz, seu kiz boh cawng khlapz ne anz pehz lo seu ceu seu meoz?”
Teu paez keui kaw daz, “Nam.”
36Yesuhz lao keuh nahz, “Seu ni ihz maang thangz paekz kaw aez khaenz, ihz maang seu kiz lae reung dengz kaw aez khaenz, ihz nam maang waac kaw saz kreung daehz aez yal. 37An taemz mok lawng Ohz daz, ‘Hnhz an ni bawnz nap teur kawmz tang ihz raai,’ an daz ne ngaz naeh mawn.”
38Teu paez keui kaw mial daz, “Tahz, a niz maang waac keu aarz.”
Yesuhz mial daz, “A wa bawnz.”
Yesuhz suz tawngz kaai Rang Olip
(Matthe 26:36-46, Markus 14:32-42)
39Waaiz an diz, Yesuhz lae thaz weng rae lan cu rang Olip ceun Hnhz tomz lan klawhz pawk, teu paez Hnhz keui kaw lan tawiz. 40Meuz keuh phraeoz ne Hnhz daz keuh nahz, “Yak aez pehz lan tawiz reung dengz kyaam ya ne pehz suz tawngz raez.”
41Yesuhz praasz keuh lan yaan seu wiurz kawnz reu aangz ne, Hnhz seuk deumz suz tawngz daz, 42“Paz, beuk caang kaw, kraai thengz klakz an ni thaz Ohz. Keuiz daz yak aez naeh ceun Ohz sunz penz, aez naeh ceun Mih sunz penz.” 43Meuz phangz an diz teu maan kaang raaoz thaz kaang raaoz seu paz plaez toz a Hnhz ne aez Hnhz nahz keum rang. 44Hnhz suhz phawmz baaiz rae suz tawngz mawn baaiz, sraangz Hnhz car naeh ceun cakz naamz.
45Meuz Hnhz rawi thaz suz tawngz, mial truz cu teu paez Daehz ne awlz keuh yaetz reuk ngeut, kawp keuh phawmz luh onz reu. 46Hnhz lao keuh nahz, “Cih naehz lah, pehz yaetz reuk ngeut a? Rawi suz tawngz raez, aez pehz lawt thaz reung dengz kyaam ya.”
Ihz cawpz Yesuhz
(Matthe 26:47-56, Markus 14:43-50, Yohn 18:3-11)
47Meuz Yesuhz daz boh ceun diz ne maang ihz seu wungz phraeoz truz. Yudas an naeh tuhz seu kawlz aarz ne aacz truz keuh. Yudas truz cu Yesuhz ngaz kuny Hnhz. 48Yesuhz maanyz hnhz, “Yudas aez, mih kuny rae aapz Kuanz Ihz haz?”
49Meuz teu paez Yesuhz keui mas lawng an keu diz ne keuh maanyz, “Tahz, anz ehz ngaz leh waac mak hiuz?” 50Naeh hawkz mak aez kuanz leng ceu beunz, keu tiakz takz kaaiz hnhz paw teutz.
51Yesuhz kaw lao, “Paw leuk!” Hnhz teu keu tiakz ihz an diz cih aez rak mial.
52Yesuhz lao beunz caangz keui, ihz mawh siukz pao wat boh ihz peur aacz setz an truz cu Daehz keui nahz, “Pehz khaenz tang kawn tang waac ngaz mat Ohz ceun conz haz? 53Ohz naeh kawmz pehz tuhz wat klawhz seu ngihz, pehz paw nam mat Ohz. Keuiz daz seu ni naeh kraao pehz, naeh kraao an bimz upz peung.”
Petros thiangz Yesuhz
(Matthe 26:57-58,69-75, Markus 14:53-54,66-72, Yohn 18:12-18,25-27)
54Keuh mat Yesuhz leh lan cu kaang ceu beunz. Petros moh teun yaan lan tawiz. 55Keuh sapz ngal tuhz teun leukz, keu dez teur wong, Petros kaw keu dez kawmz keuh. 56Meuz keun nyah kuanz leng hawkz yawt takz hnhz keu dez a ngal ne daz, “Hnhz an ni naeh ihz tawiz Yesuhz.”
57Petros kaw thiangz daz, “Keun nyah aez, ohz nam mas Hnhz keuiz!”
58Moh nam paw ceu nawhz, maang thaengz hawkz awlz Petros ne daz, “Mih hawkz naeh cumz keuh!”
Petros kaw thiangz thaengz, “Nam anz ohz.”
59Moh thaengz seu seu na ri ne maang thaengz hawkz truz tak mawn baaiz daz, “Hnhz an ni naeh mawn bohz Yesuhz, naeh ihz prih Kalile!”
60Petros thiangz thengz thaengz daz, “Ohz nam mas an mih lao!”
Meuz hnhz yeung daz ceun diz ne yaerz kaw keu dawrz luat. 61Caoh Phraz waaiz yawt Petros. Petros samz tang mony reu ma Hnhz lao mok daz, “Borz meu ni co yaerz maat keu dawrz ne mih ngaz thiangz Ohz waiz laehz daz daehz nam mas Ohz.” 62Hnhz kaw peun lengz lengz baaiz rae lae yaam lang nawk.
Ihz ngot keulz Yesuhz
(Matthe 26:67-68, Markus 14:65)
63Ihz pao Yesuhz keui ngot keulz Hnhz, tiz Hnhz. 64Keuh reupz mok ngaai Hnhz ne maanyz, “Yaeh tiz Mih, tak raez?” 65Leh tang mony reu ma tang meoz keui saehz Hnhz.
Yesuhz phraeoz aacz ngaai khunz Pilat boh khunz Herot
(Matthe 26:59-66, Markus 14:55-64, Yohn 18:19-24)
66Meuz prih a wa thaangz ne ihz mawh Yio keui, beunz caangz keui boh ihz mawz kyaamz keui leh lan Yesuhz tawz rumz. 67Keuh maanyz, “Beuk Mih naeh mawn Khris kaw lao ehz raez.”
Yesuhz mial daz, “Beuk Ohz lao, pehz te nam yum Ohz. 68Beuk Ohz maanyz kaw pehz te nam thaw. 69Kaanz ni lan, Kuanz Ihz ngaz keu dez plaakz takz kaaiz Phraz Pen Caoh taanz khoz mawh.”
70Keuh hacz aamz kaw maanyz thaengz, “Beuk naeh ceun diz kaw Mih naeh Kuanz Phraz Pen Caoh haz?”
Yesuhz mial tawpz, “Naeh mawn ceun pehz daz.”
71Keuh kaw daz, “Ehz lo thaengz naehz leui? Toz ehz a wa ngarz Hnhz lao.”
ప్రస్తుతం ఎంపిక చేయబడింది:
Lukas 22: ril
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, Wycliffe Bible Translators, Inc. All rights reserved.
