Lukas 23

Ihz leh Yesuhz aapz khunz Pilat

(Matthe 27:1-2,11-14, Markus 15:1-5, Yohn 18:28-38)

1Wungz ihz keui hacz aamz ceng rae leh Yesuhz lan cu khunz Pilat. 2Keuh maap Yesuhz daz, “Ehz mat Hnhz kawp daz Hnhz an ni cih aez ihz keui pleung reung dengz, daz tang yak thaamz khawn khunz Kaesar, daz Daehz naeh Khris naeh Khunz.”

3Khunz Pilat maanyz Hnhz, “Mih naeh Khunz Yio haz?”

Yesuhz kaw lao, “Naeh ceun mih daz ne.”

4Khunz an diz lao beunz caangz boh wungz ihz keui daz, “Ohz nam awlz reung dengz kawi naehz kaai Hnhz.”

5Keuiz daz keuh baaiz lao samz samz daz, “Hnhz an ni sawnz aez ihz seuk weur tiukz sirz tuhz prih Yio, tae leh prih Kalile taw phraeoz a niz.”

Ihz phuhz Yesuhz tawz khunz Herot

6Meuz khunz Pilat ngarz ceun diz ne maanyz, “Hnhz naeh ihz prih Kalile haz?” 7Meuz hnhz mas Yesuhz naeh ihz eungz khunz Herot upz peung ne phuhz Yesuhz lan tawz khunz Herot, meuz phangz an diz khunz Herot naeh tuhz weng Yerusalem. 8Meuz khunz Herot awlz Yesuhz ne seuz phawmz baaiz kawp daz hnhz sunz awlz Yesuhz a wa ceu nawhz. Hnhz mang sunz awlz an laak laaiz Yesuhz cih plaez. 9Khunz Herot maanyz Yesuhz heungz baaiz, keuiz daz Hnhz nam tawpz hawkz hawkz. 10Beunz caangz boh ihz mawz kyaamz keui ceng maap mawn Hnhz baaiz. 11Khunz Herot boh siukz hnhz keui ngot keulz Hnhz, plang Hnhz. Keuh kap aez Hnhz nahz kreung laep kaw phuhz mial tawz khunz Pilat. 12Kaai seu ngihz an diz khunz Herot boh khunz Pilat penz kuanz bohz, meuz aacz an diz kaar teur naeh raan su daehz.

Tatz traz aez Yesuhz yam

(Matthe 27:15-26, Markus 15:6-15, Yohn 18:39, 19:16)

13Khunz Pilat raak teur cuhz beunz caangz, ihz peur aacz boh ihz keui, 14hnhz daz keuh nahz, “Pehz leh Hnhz truz cu ohz naeh ceun ihz peur aacz seuk weur tiukz. Ohz a wa caetz Hnhz aacz ngaai pehz kaw ohz nam awlz reung dengz kawi naehz ceun pehz maap. 15Khunz Herot kaw nam awlz rae phuhz mial tawz ehz. Hnhz an ni nam cih naehz an theukz yam. 16Kawp ceun diz ohz ngaz leh kawn nuarz tiz Hnhz rae plawiz mial.” 17Kawp daz meuz phangz pawiz ne khunz tomz plawiz ihz wit teun akz.

18Ihz keui raak daz, “Piamz thengz Hnhz! Plawiz ehz nahz Barapbas!” 19Barapbas samz naeh ihz klaez thang kawp seuk weur tiukz tuhz weng rae piamz ihz.

20Khunz Pilat sunz plawiz Yesuhz rae lao plaez thaengz keuh. 21Keuiz daz keuh yeung raak daz, “Tawkz piamz Hnhz kaai keun rang! Tawkz piamz Hnhz kaai keun rang!”

22Khunz Pilat kaw lao keuh ta waiz laehz, “Kawp naehz? Hnhz cih pleung naehz? Ohz nam awlz reung dengz kawi naehz an theukz yam. Ohz ngaz leh kawn nuarz tiz Hnhz rae plawiz mial.”

23Keuiz daz reus ihz maanyz piamz Yesuhz kaai keun rang ne raak bawrz baaiz usz rae pae lan. 24Kawp ceun diz khunz Pilat kaw tatz traz tawiz ceun ihz maanyz. 25Hnhz plawiz ihz an naeh tuhz thang, an seuk weur tiukz rae piamz ihz an ihz maanyz, samz aapz aez keuh nahz Yesuhz teur keuh sunz cih.

Piamz Yesuhz kaai lakz klawngz klaengz

(Matthe 27:31-44, Markus 15:21-32, Yohn 19:17-27)

26Meuz siukz keui leh lan Yesuhz ne, keuh takz leh Simon an naeh ihz prih Siren an truz thaz pruh rae ngaz kut tuhz weng. Keuh cao hnhz baekz keun rang klawngz klaengz, aez lan tawiz puatz Yesuhz.

27Ihz wungz mawh keui lan tawiz Yesuhz, pa tang keun nyah phawmz kawcz yaam krai tawiz Hnhz. 28Yesuhz waaiz lao keuh nahz, “Keun nyah weng Yerusalem keui aez, yak yaam kawp Ohz! Yaam ta pehz boh ta kuanz pehz nahz raez. 29Seu ngihz ihz keui ngaz daz, ‘Keun nyah manz, klungz an nam ti keun meur boh buhz an nam ti peun buhz kuanz keui naeh an rak mawn,’ ne ngaz phraeoz. 30Meuz phangz an diz ihz keui ngaz daz rang keui nahz, ‘Yaatz sapz ehz,’ daz pukz keui nahz, ‘Reupz ehz.’ 31Beuk keuh cih kaai khaehz imz thanz teur ni kaw meuz khaehz an diz hawngz ne ngaz naeh seu naez?”

32Ihz raai keu aarz kaw leh lan piamz tawiz Yesuhz. 33Meuz keuh phraeoz ti Klakz Kingz ne leh Yesuhz tawkz kaai keun rang klawngz klaengz, ihz raai keu aarz kaw tawkz plaakz takz dahz hawkz, takz kaaiz hawkz. 34Yesuhz daz, “Plawiz lawt aez keuh raez, Paz! Keuh nam mas daehz cih naehz lawh.”

Keuh teuk klaez ceu kawk teur baengz leh kreung Yesuhz. 35Ihz keui ceng yawt boh. Ihz peur aacz keui ngot keulz Hnhz daz, “Hnhz an ni khyawt ihz, beuk Hnhz naeh Khris kaw aez khyawt mial Daehz raez.”

36Siukz keui cih peuk pyaak Hnhz, truz cu Hnhz rae aez Hnhz nahz omz seu pit praang. 37Keuh daz Hnhz nahz, “Beuk Mih naeh Khunz Yio kaw khyawt mial Daehz raez!”

38Taemz mok lik lang kol Hnhz daz, “Hnhz an ni naeh Khunz Yio.”

39Ihz raai hawkz an talz ihz tawkz mok kaw mony Hnhz daz, “Mih nam anz Khris haz? Khyawt toz Daehz boh khyawt aaiz raez.”

40Keuiz daz ihz raai thaengz hawkz samz nal daz, “Mih nam doz Phraz haz? Mih kaw talz taam tang daehz ceun Hnhz. 41Aaiz kiungz boh talz kawp daehz pleung, keuiz daz Hnhz nam cih pleung naehz.” 42Hnhz lao Yesuhz nahz, “Tang tang ohz, meuz Mih truz tuhz prih Daehz ne.”

43Yesuhz mial daz hnhz nahz, “Ohz daz mawn mih nahz, meu ni mih naeh kawmz Ohz tuhz prih Paradiso.”

Yesuhz yam

(Matthe 27:45-56, Markus 15:33-41, Yohn 19:28-30)

44Meuz diz naeh kraao seu ngihz teun cang, bimz lang tang prih taw phraeoz waiz na ri teuk borz. 45Prih bimz seuk ngih, pahz kangz tuhz wat ne seuk siarz lae aarz plaakz. 46Yesuhz raak keurz daz, “Paz, Ohz leh khuanz Daehz aapz tihz Mih.” Hnhz daz ceun diz kaw plotz phawmz Daehz.

47Meuz ihz mawh siukz awlz an naeh keu diz ne lupz phrawz Phraz Pen Caoh daz, “Hnhz an ni naeh mawn ihz keu sangz.”

48Meuz wungz ihz hacz aamz an yawt boh lawng a wa naeh keu diz kaw beutz seu ongz daehz, phawmz kyehz weng kaang daehz. 49Ihz tomz Yesuhz boh keun nyah tawiz puatz Hnhz thaz meuz prih Kalile samz ceng teun yaan teuk soz an keu diz.

Saangz keo Yesuhz

(Matthe 27:57-61, Markus 15:42-47, Yohn 19:38-42)

50Meuz phangz an diz tuhz prih Yio, weng Arimathe ne maang ihz mawh rumz hawkz, mus hnhz daz Yosep, hnhz naeh ihz rak ihz keu sangz. 51Hnhz naeh ihz mang prih Phraz Pen Caoh rae hnhz nam prawm tawiz ceun keuh tatz traz boh an keuh cih. 52Hnhz kut maanyz toz yam Yesuhz tawz khunz Pilat. 53Waaiz an diz, hnhz leh teuk klaez thaz keun rang klawngz klaengz, wian nahz banz khyawz teun mehz. Samz lan mok tuhz tham peun lu reu aangz, an yaeh maat ti saangz keo seu pawk. 54Seu ngihz an diz maen kaai seu ngihz phit, a wa thatz seu ngihz sinz.

55Keun nyah an truz tawiz Yesuhz thaz prih Kalile keui lan tawiz Yosep, yawt toz yam Yesuhz mok ceun nae tuhz tham. 56Keuh weng raenz nam man hawm boh meoz an hawm keui.

Kaai seu ngihz sinz ne keuh preumz tawiz traz.

ప్రస్తుతం ఎంపిక చేయబడింది:

Lukas 23: ril

హైలైట్

షేర్ చేయి

కాపీ