KALAQAMA 24
24
YISIHAAQINNA RIBIQA ADHAMA
1Abirihaamino lowo geeshsha geedhi; Kaaliiqino baalunku coyinni maassi'rinosi. 2Mitto barra Abirihaami, jajjisi baalaho annimma uyineenna minesi lowo yanna soqqamanni hee'rinoha soqqamaanchosi, «Angakki giwoodi'ya aana#24:2 giwoodi'ya aana yaannoha Ibiraawootu afiinni borreessinoonnihura giwoodi'yara woroonni yaanno. worte xaarie. 3-4Beetti'yara Yisihaaqira seenne gobba'yanninna fiixi'yawiinni marte haa'rattosita ikkinnina, ledonsa hee'reemmo Kana"aanooti seenne haa'rattosikki gede, gordunna baattote Magani Kaaliiqi su'minni xaarsiiseemmohe» yiisi.
5Soqqamaanchuno, «Miteekke hatte gobba seenni ane ledo kawiira daa giwiro beettokki galagalche ati dayotto gobba haa're ha'roni?» yee xa'mi.
6Abirihaami qole, «Beetto'ya galagalchite haadhe ha'rattokki gede qorophi; 7anni'ya mininninna ilamoommo gobbanni fushshe, ‹Tenne baatto sirchikkira eemmo› yee kulinoehunna xaarinoehu gordu Magani Kaaliiqi, sokkaasinchosi alba qole soyannohena, atino marte hakkiinni beetti'yara seenne haa'risi. 8Beetto ledokki daa gibbuha ikkiro kayinni, xaarsiisoommohe xaaro diamaddannohe; beetto'yalla hakkiira qoltooti» yiisi. 9Soqqamaanchuno mootichisi Abirihaami giwoodira woroonni anga wore xaari.
10Hakkunni gedensaanni mootichisi gaalla giddonni 10 haa're, uduunnisi giddonnino uyinanniha seyino uduunne doore haa're, Mesiphexoomiya Naakoori hee'ranno katama ha'ri. 11Hakkiira iilli yannara gaalla katamaho gobbaanni noo bale wayinnite mule guluphite fooliishshidhanno gede assi. 12Qoleno, «Mootichi'ya Abirihaami Magano Kaaliiqa! Huucci'reemmohe; mooticha'ya Abirihaami bagamannokki baxillikkinni laisi; anerano techo haja'ya qineessie. 13Kuneeti, ani tenne wayi bale mule uurre noommo; kunni katami seenni waa dirri'rara daanno. 14Insa giddonni mitticho, ‹Waa ageemmona gambayichokki heeshshi assie› yeenna, ‹Atino agi; gaallakkirano hayikkisi'ri› yitannoe beetto, soqqamaanchikki Yisihaaqira qixxeessoottota ikkito; mootichi'yara eloottota tennenni afeemmo» yee huucci'ri.
15Huuccattosi gudikkinni, Milka iltinoti Beetueeli beetto Ribiqa gambayicho bayidhe daggu; Milkano Abirihaami rodii Naakoori galteeti. 16Beettono lowo geeshsha xumate; labbaahunni xaaddinokki seemooti; iseno wayi balewa dagge gambayichoho waa wonshidhe fultu. 17Soqqamaanchuno isewa rahe mare, «Gambayichikkinni ballo shiima waa hayikkisie» yee huucci'ri.
18Iseno, «Maahoyyena mooticha'ya agisi» yite, gambayichono rakke badhetenni dirrisse waa hayikkissusi. 19Isira hayikkissusihu gedensaanni, «Gaallakkirano duubba geeshsha waa tooheemma» yitu. 20Waano rakke gambayichunni saada agganno badirira galchite, marro marro higge hinkiiltanni gaalla duubba geeshsha tookku. 21Manchu mittoreno coyi'rannokkiha, Kaaliiqi hajasi wonshannoronna hoogannoro afate sammi yee assitannore lai.
22Gaalla agge ka'uhu gedensaanni, manchu beettote 5 giraame geeshsha ikkannoha culku butichanna 2 gume fushshe anga wore, 23«Hanni ballo kulie; ati ayete? Mine'ne gallanniwi nooni?» yee xa'mise.
24Iseno, «Ani Beetueeli beettooti; Beetueelino Milka Naakoorira iltinoho. 25Minenke galtinanniwi hee'ranno; gaallateno ikkanno geeshshi galawinna birqooshu no» yitusi.
26Manchuno umo heeshshi yee Kaaliiqira kumbuule, 27«Mooticha'ya ammanamasinninna bagamannokki baxillisinni towatinohu mootichi'ya Abirihaami Magani Kaaliiqi galatamo» yii.
28Beettono doddanni marte, amaseranna amase ledo noorira konne coye kultu. 29Ribiqara Laaba yinanni rodii noose; isino Abirihaami soqqamaanchi noowa wayi balewa dodanni mari. 30Laaba manchunniwa marinohu rodoosi wodhitino butichanna gume afinohuraatinna manchu yiinosere macciishshino daafiraati; maranno woyite manchu wayi bale mule gaallasiwa uurre no. 31Laabano, «Ati Kaaliiqi maassi'rinohehu amo minira ha'nona; konne gobba mayira uurratto? Mine ateranna gaallakkirano qixxaawino dargi no» yiisi.
32Manchuno ledosi minira ha'ri; Laabano gaallasira hogowo tire, galawanna birqoosha shiqishi; Abirihaami soqqamaanchiranna ledosi noorira lekka hayishshidhanno waa uyinsa. 33Sagale haa'ne abbinita manchu, «Dayommo haja hasaawummokkinni di"iteemmo» yii. Laabano, «Maahoyyena hasaawissiyya» yiisi.
34Manchuno, «Ani Abirihaami soqqamaanchooti; 35Kaaliiqi mooticha'ya lowo geeshsha maassi're ayirrado assinosi; ge'reewonna lalo, birra, culka, meyanna labbaa borojje, gaalanna harre baala uyinosi. 36Mootichi'ya galte Saara geedhimmate yannara isira labbaa beetto iltinosi; isino noosire baalanka kunni beettira ragisiisino. 37Mootichi'ya aneno, ‹Ani hee'reemmotenni Kana"aanootu gobbanni beetti'yara seenne haadhootina, 38ilamoommo gobba fiixi'yawa hadhe seenne hakkiinni haa'risi› yee xaarsiisinoe. 39Anino, ‹Miteekke hatte gobba seenni kawiira daa giwiro hiissoyya?› yoommo. 40Isi qole, ‹Ledosi qaafeemmohu Kaaliiqi sokkaasinchosi ledokki soyanno; maratto hajano qineessannohe; atino anni'ya ilama giddonninna fiixi'ya mereerinni beetti'yara seenne haa'risi. 41Ati fiixi'yawa hadheenna insa seenne aa gibbuhero calla xaarotenni gatatto› yiinoe.
42«Anino techo wayi balewa daye, ‹Mootichi'ya Abirihaami Magano Kaaliiqa! Haja'ya qineessie; 43waa hinkii'litara dagganno beetto waa hayikkisie› yeenna, 44‹Atino agi; gaallakkino tooheemma› yitannoti Kaaliiqi mootichi'ya beettira qixxeessinota ikkito» yee huucci'roommo.
45«Anino huuccatto'ya gudummokkinni, Ribiqa gambayicho adhite daggino; wayi balewa dagge waa hinkii'lite ka'eenna ani, ‹Hanni ballo waa hayikkisie› yoommo.
46«Iseno rakke gambayicho badhesenni dirrisse, ‹Atino agi; gaallakkirano hayikkiseemma› yitinoe. Anino agoommo; gaalla'yarano hayikkissino.
47«Hakkunni gedensaanni, ‹Ati ayete?› yee xa'moommose; iseno, ‹Ani Beetueeli beettooti; Beetueelino Milka Naakoorira iltinoho› yitino. Anino maccasera buticha, angaserano gume woroommo.
48«Hakkunni gedensaanni mootichi'ya beettira galte ikkitanno beetto afi'reemmowa mootichi'ya rodii minira haa're massinoe Kaaliiqira heeshshi yee kumbuuloommo; mootichi'ya Abirihaami Magano Kaaliiqa galaxxoommo. 49Xa ki'ne mootichi'yara eltinannironna hoogginanniro kulle"e; ‹Dee'ni› yitiniro kayinni ikkeemmota ma'leemmo» yii.
50Laabanna Beetueeli, «Kuni coyi Kaaliiqiwiinni dayinoha ikkino daafira, kawiinni sa'ne yine anfeemmori dino. 51Ribiqa kuneetina adhite ha'ri; Kaaliiqi coyi'rinonte gede mootichikki beettira galte ikkitona» yitusi. 52Abirihaami soqqamaanchi yitinota macciishshe, baattote aana heeshshi yee Kaaliiqira kumbuuli. 53Qoleno birrunna culku irra imaanano fushshe Ribiqara uyise; rodiiseranna amaserano ayirrado uduunne uyinsa.
54Hakkunni gedensaanni Abirihaami soqqamaanchinna ledosi noori sagale itte agge hakko galtu.
Abirihaami soqqamaanchino soodo gute kae, «Xaate mootichi'yawa ha'reemmona fajje"e» yiinsa.
55Rodiisenna amase, «Beetto 10 barri geeshshano ikkiro ninkewa keeshshitona; hakkunni gedensaanni ledokki hadhannona» yitusi.
56Soqqamaanchuno, «Kaaliiqi haja'ya wonshinoena keeshshiishshinoonte"e; rahe mootichi'yawa ha'reemmona agurre"e» yiinsa.
57Insano, «Hanni agarixa, beetto woshshine yitannore anfeemmona» yitu. 58Iseno woshshite, «Kunni manchi ledo ha'ra baxattani?» yite xa'mituse. Iseno, «Ee ha'reemma» yite dawartu.
59Insano Ribiqa awuutte lossitinose mancho ledo worte Abirihaami soqqamaanchinna ledosi manni ledo hadhanno gede assituse. 60Ribiqano, «Ati rodoonke, lowo kumi manni ama ikki; ati ilatta sirchino diinnansa katamma ragi'ro» yite maassidhuse. 61Hakkunni gedensaanni Ribiqa soqqamannose meenti ledo hadhara ka'u; gaalla gulufe Abirihaami soqqamaanchi ledo ha'ri; soqqamaanchuno kunni garinni Ribiqa haa're ha'ri.
62Hatte yannara Yisihaaqi Bieeri Lahayi Rooi woy La"annoehu Heeshshote Magani yinanni buewa halalla Negebi mare no. 63Isino hawarro yannara wodanunni malanni xawoho ka'anna kawa ha'ramanni hee're, wido qole la"anno woyite, gaalla dagganni noota afi. 64Ribiqano widira qolte la'e Yisihaaqi affu; gaalu aaninni dirrite, 65«Kuu"u xawoho ninkewa hige daanni noohu ayeti?» yite Abirihaami soqqamaancho xa'mitu. Isino, «Mooticha'yaati» yee dawarise. Ribiqano rakke uddanotenni umo guggu'litu.
66Soqqamaanchuno baalanka coye Yisihaaqira kulisi. 67Yisihaaqino Ribiqa haa're amasi Saara dukkani giddora massi'ri; iseno adhe galtesi assi'ri; Yisihaaqi Ribiqa baxise; amasi reyora manchitino manchitano hawi.
ప్రస్తుతం ఎంపిక చేయబడింది:
KALAQAMA 24: QulMax
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© The Bible Society of Ethiopia; Sidama Holy Bible BSE-UBS 262 P 2014
