KALAQAMA 23
23
SAARA REYITEENNA ABIRIHAAMI WAAMMATE DARGA HIDHI
1Saara 127 diro heedhuhu gedensaanni, 2Kana"aani baattora, Qiriyaati Arbai yinannihura Kebirooni Katamira reyitu; Abirihaamino Saarara wi'le lowo geeshsha manchiti.
3Abirihaamino reeshshu mulinni kae, Heeti oosora, 4«Ani ki'nera wosinchoho; qoleno manni gobba manchooti; galte'ya madaadheemmo gede, waammate darga hirre"e» yiinsa.
5Heeti oosono, Abirihaamira, 6«Mooticha hanni macciishshinke; ati ninke mereero ayirrado manchooti; ninkewa galtekki madaadhattoha waammate darga doodhite adhi; galtekki madaadhatto darga atera hoolannohehu dino» yite dawartusi.
7Abirihaamino kae, gobbate manna Heeti ooso umo heeshshi yee galaxxe, 8«Galte'ya konne madaadhate fajjitiniero Tsohaari beetti Efirooni, 9gobba dannira nooha Makiphela yinanni goda hirannoe gede xa'me"e; kuni dargi waammate darga ikkannoe gede ki'ne affinanna baatto fushshitannore baate adheemmo gede asse"e» yii.
10Hatte yannara Efirooni katamu waalchi mule songote darga wolootu Hitooti ledo ofolle no; isino hakkiicho noo manni baalunku macciishshanna Abirihaamira, 11«Dee'nina, hanni mooticha macciishshi! Baattonna aanase noo goda oommohe; galtekki madaadhatto gede fiixi'ya Hitootu affanna oommohe» yee dawarisi.
12Abirihaami kayinni Hitootu affanna xaano umo heeshshi yee galaxxe, 13baalunku macciishshitanna Efiroonira, «Eeggatena macciishshie; darga raawe hidheemmona, kuneeti womaashsha adhi; galte'yano hakkiicho masse madaadheemmona» yiisi.
14Efiroonino Abirihaamira, 15«Mooticha ballo atino macciishshie! Baatto 400 kinchu birralla fushshitanno; kuni assannori dinona, agurte galtekki massite madaadhi» yee dawarisi. 16Abirihaamino Efirooni yiinota macciishshe, mannu afanna kulino garinni Abirihaami 400 kinchu birra keene uyisi.
17Kunni garinni Memire baattora soojjaatoonni Makiphelaho Efirooni gobba Abirihaamira utuwasi ikkitu; baattonna hakko noo godi, baattosi gaangaawira noo haqqe baalanti, 18Abirihaamita ikkitinota hakkiicho noo Hitooti baalu affu.
19Hakkunni gedensaanni, Abirihaami galtesi Saara Kana"aani Gobbara Kebirooni (Memire) Katamira soojjaatoonni Makiphela noo godira madaadhi. 20Kunnira, tini Hitootu baatto giddo noo godi ledo Abirihaamira waammate darga ikkitu.
ప్రస్తుతం ఎంపిక చేయబడింది:
KALAQAMA 23: QulMax
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© The Bible Society of Ethiopia; Sidama Holy Bible BSE-UBS 262 P 2014
