Uan 3
3
Isus ay Nikudemu
1E sik taw Fariseu, at ngayan Nikudemu, taw Udyu at sadi at fun. 2Sik yabi kanya nalo sas Isus, ay glong anya te, “Rabi, nasaful ami te, sik takamoyung o siginans Dius, aroro we mafafakamulun kata am ngay nafakamulun at madulo, Dius nu dway gufud anya.”
3Isus gbalus te, “Matuyan nu glong au emu te, sik taw nu dway nadog ansalug, kanya ban wa mful sas Dius at fagfagtainanan.”
4Ay Nikudemu ginto anya te, “Tain ro sik taw nu gdog nangasalug nu mafagtainan wan? O kanya ro manga masakbo yay sat mina at ungdan laman nandog yay nangasalug?”
5Isus gbalus te, “Matuyan nu glong au emu te, sik taw nu dway ansalug sas mamam#3:5 mamam: at masuad, at Masine fag Falad nu gfasine sik tagafanud at amatanganan. (Damai Efesu 5:26, Titu 3:5) ay sat Masine fag Falad, kanya ban wa manangatap sas Dius at fagfagtainanan. 6At kinsalug siginan sik taw, at leleg tagste way swa daga. Ay at kinsalug sat Masine fag Falad, e fanfalad tua fag leleg. 7Lag o kadulo ku nalong sa emu te, fagayu taw dogi yap asalugi. 8At Masine fag Falad kata tagmara nu glalab nusnga ndaginan, ay dewa o nadungug, wo nasaful te, daginan kanya ay dada ro nu nangadasug. Katanya yangay sas fagayu taw at kinsalug siginan at Masine fag Falad.”
9Nikudemu ginto te, “Tain ro manga nu kafakamulun katanya?”
10Ay Isus gbalus te, “Sik takamoyung o sas taw Israel. O yo gtogdungug takatanya fagayu? 11Matuyan nu glong au emu te, nafatuyan ami em fagsafulun ay em nalag, dewa katanya, wam gafanud. 12Nu dway am gafanud ku foyungan sabaliwa tagste swa daga, tain ro nu gafanud am ku foyungan tagsabaliwas banwa? 13We naulul sas banwa nu bunway au, Taw at Baguama, at natustus siginans banwa. 14Nu setain Muisis nu gfabat ule tansu sis talun at yud e taw, katanya yangay ban au, Taw at Baguama, nu e gfabat angku, 15laman nusnga sinu tagafanud sa angku mul tua ban leleg at yud e fakatabuan.”
16Maksvn tua Dius nu kesug fagayu taw ste swa daga, at fagnafonun at mafilian fag Baguama, laman nusnga sinu tagafanud sa anya di gafaurianan nu bunway mul tua ban leleg at yud e fakatabuan kabavn. 17Aroro Dius at fagnasuguun at Baguama ste swa daga di nanfaurianan ngay taw, nu bunway namalangfe tua. 18Nusnga sinu tagafanud sa anya di ban gafaurianan, dewa katanya, nu dway gafanud, gafaurianan ban, aroro kanya wa gafanud sas Dius mafilian fag Baguama. 19Ngay taw at faginfauriananun aroro fagmayamagun dewa andasug ste swa daga, kesug way fagmadulumun abat ngate sas fagmayamagun aroro at ngay fakamulun mauri way. 20Ay nusnga sinu fag taw tagfakamulun at mauri, kanya kauri fagmayamagun ay wa kaylat nangakbang sas fagmayamagun laman at fakamulun masuksukan. 21Dewa katanya, tagfakamulun at matuyan, kanya nangakbang fagmayamagun laman gfasure te, at fakamulun gfaning Dius at fakaylatun.
Isus nu Mabalyanan Gtungud yay Uan
22Sanya ginan, Isus ay at ngay tagadal nalo wan sas talun Udea ay gbanwan yay sirut sanya laman gfasurung ngay taw. 23Ginanya, Uan sis talun Enun, munakbang sis Salim, gfasurung yangay ngay taw aroro sanya gbia at mamam. Ay fagayu taw nalo sanya laman nangasurung. 24Ginanya Uan ya nkubung.
25Ay sik taw Udyu gfabadbaboan Uan at ngay tagadal sabaliwa nu gfasurung. 26Nu katanya, kanya fag ngay taw nalo sas Uan ay glong anya te, “Takamoyung, am ufud ebi tsi baliwa Liskung Urdan ay am nafatoglag sa sangay taw, kanya gfasurung yangay, ay fagayu taw sanya wa tanan.”
27Ay Uan gbalus te, “We taw mafakamulun takatanya nu dway e nafon anya fagmabalyananun siginans banwa. 28Am yangay tagfatuyan ku nafoyung ayu te, bunwa au Dius at nafili fag Fun.#3:28 Dius at nafili fag Fun: sas Griegu, Kristu. Au sik fagsuguan kway laman at nangguna anya. 29Sa sik fainduganan, kanya wan at ke fagmasineun nangadadwa sat fabubayan. Ay nu gakadadwaun wan, at fainduganan at fagadgalangan gfanya anya, ay nu nadungug at aringang, maksvn nu guseganan. Katanya kyangay, maksvn nu guseganan au. 30At masine kanya nu kabalyanan, ay au tiba daga.”
Tagsiginans Banwa
31Sanya ginan, Uan nalong te, “Tagsiginans tungud, tagtungud fagayu. Ay tagsiginans daga ste way sdaga ay at foyungan ste ginan yangay sdaga. Tagsiginans banwa gtungud tua fagayu. 32Kanya nafatuyan at nalag ay at nadungug, dewa katanya, we gafanud sat famatuyan. 33Nusnga sinu tagafanud sat foyungan gfatuyan te, matuyan tua Dius. 34Ay aroro Dius at nasugu gfoyung Dius at ngay longan, ay Dius nafon sa anya at Masine fag Falad at fagmabalyananun fagdaul. 35Dius kesug at Baguama, ay nafon wan sa anya fagdaul at fagmabalyananun. 36Nusnga sinu tagafanud sat Baguama e leleg tua at yud e fakatabuan, ay at yud gfaning at Baguama wa ban mafabul leleg, nustua Dius kadotama way anya.”
ప్రస్తుతం ఎంపిక చేయబడింది:
Uan 3: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
