Uan 2
2
E Ndadwa sis Furuan Kana
1Nu nlangfe duak menit, e kadadwa sis furuan Kana sis talun Galilea, ay sanya Isus at mina. 2Isus ay at ngay tagadal nagewanan yangay. 3Ay at fanlangu nu namin, Isus at mina nalong anya te, “Namin wan fanlangu.”
4Ay Isus gbalus te, “Fagmangena, fabayani wa angku. Ya ndasug at kasakan fag buknga sa angku.”
5At mina glong sa sangay fagsuguan te, “Fakamuluni nusnga setaw at longan ayu.”
6Sanya e unumk fagsuadan mamam, mawatan siginans gang. Galay at sadi nu gbilug duak safulu anggan tuluk safuluk baringan.#2:6 At masuad, 75 anggan 115k litru. Kanya at falganan at famegus gfaning taw Udyu at faugali. 7Isus nalong sa tibak fagsuguan te, “Fapnui mamam snay fag ngay fagsuadan.” Ay nafapnu wa fia fagayu.
8Ay sanya ginan Isus glong te, “Katsi namul am tiba sirut, ay namuba am sa tiba tungud fag fagsuguan.” Ay nanamuba wa fia.
9Ay tiba tungud fag fagsuguan nafaskud nainum kafag mamam, ay kafag mamam mangaro ansik fanlangu. Ay kanya wa saful te, daginan, dewa at ngay fagsuguan saful. Nu katanya, kanya nauro at kindadwa fag mangama, 10ay nalong te, “Taglayun ngay taw at fagfagunaun ginum at mataba tua fag fanlangu, ay at ngay betaw nu nainum wan, gfaungbus at yud fia mataba. Dewa katanya, saman am fakamulun. Katsi nafaguyanan tuo at mataba fag fanlangu.”
11Isus nu gfakamulun katanya, sis Kana fag furuan, sis talun Galilea. Kanya yay lang Isus at nafalag taguna at madulo fag fakamulun, tagfatoglag te, siginans Dius. Siginan at nafakamulun takatanya, Isus nafasure at fagmasineun, ay sanya ginan at ngay tagadal nafanud.
12Nu ntabu wan, Isus glo wan sas furuan Kapernaum gadgaloan at mina ay at ngay faduksay ay anggan at ngay tagadal, ay gbanwan yay sirut sanya.
Isus Naiyan Tagfaebayad siginan Dius at Bale
Mt 21:12-13; Mk 11:15-17; Lk 19:45-46
13Ngay taw Udyu at fagmafulun sabaliwa Tagbarita nu Glangfe nu munakbang wan, Isus naundaud sas Erusalem. 14Ay Isus nalag sis Dius at bale ngay tagfabayad ngay baka ay tupa ay ngay labikung, ay anggan ngay tagfabangsi salapi. 15Isus nabul sik lubid laman at famalang ay nasabug ay nafaduksun ngay tupa anggan ngay baka. Ay Isus nafarapyag ngay tagfabangsi salapi at salapi ay nafalub at ngay fagfatungkudan. 16Isus nalong sa sangay tagfabayad labikung te, “Buli wan ste ginan kanya fagayu. Lag am kawat ku Mama at bale laman sik fagfungsuan.”
17Isus at ngay tagadal namatang foyungan sis rirukan te, “Nu kesug au am bale kata sik afuy gigang sa ku amatanganan.”#2:17 Alubad 69:9.
18Nu katanya, taw Udyu at ngay tagfangguna ginto sas Isus te, “Nataw fag madulo am fagmafalagun emi laman gfatuyan o te, e fagmabalyananun o gfakamulun takatanya?”
19Isus gbalus te, “Agvd, rasrasi Dius at bale ay gdog kyay kawat ay sis fatuluk menit gfatabu kwan.”
20Ay taw Udyu at ngay tagfangguna glong te, “Nu kawat tuy fag bale ufat safulu e unum tuak banwa, o ay owo ro tulu way kmenit nu kawat o?”
21Isus at fagfatungulan fia at bilug tua. 22Nu katanya, gina Isus nadog naleleg, at ngay tagadal namatang at longan, ay nafanud at marirukan sis Dius at Longan ay anggan Isus at ngay foyungan.
Isus Saful way ngay Taw at Amatanganan
23Gina fagmafulun sabaliwa Tagbarita nu Glangfe, Isus sis Erusalem. Ay ngayuk taw at nafanud sa anya aroro nalag at madulo fag ngay fakamulun tagfatoglag te, kanya siginans Dius. 24Dewa katanya, Isus wa gafanud ngay taw at longan aroro saful way fagayu taw at ugali. 25Isus wa gafanud dewa e gfoyung sa anya te, matuyan ngay taw at ugali, aroro saful way ngay taw at amatanganan.
ప్రస్తుతం ఎంపిక చేయబడింది:
Uan 2: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
