Fakasigadan 8
8
Lino nu Kalay
1Dius di nalyam Nui fag talanan ay anggan ngay mangilafang sisad sakayan lino. Ay kanya nafadasug sik tagmara, ay lino sas fagdaul daga kalay wan. 2Ay kanya nafaut ngay bulbug, ay nafaragang nu karak. 3Lino gtaglayun nu kalay kaduge sadik sandan limak safuluk menit. 4Ay gina sis falabi fituk menit sis fafituk magdanun, sakayan lino antungkud sis Buksul Ararat. 5Ay lino gtaglayun nu kalay. Ay sis fasafuluk magdanun taguna fag menit, ansure wan ngay tungud buksul.
6Nu nlangfe ufatk safuluk menit, Nui naluang sakayan lino at fagbanawanan, 7ay nafalfas sik ugak. Kanya gfoyfolian glayugan yakmay lino anlanggang. 8Ay Nui nafalfas yay fia sik labikung laman ginsaful te, o lino ankalay wan. 9Ay dewa katanya, kafag labikung ye fagnangafunan aroro lino gsuklub yay fagdaul daga. Nu katanya, labikung anfoli yay sas sakayan lino. Nui nafalugde at take ay labikung naafun ay nasakbo wan. 10Ay Nui nafanya yay fituk menit ay nafalfas yay gayvd labikung. 11Ay nu nyabi wan, labikung anfoli ay e tangagan sik don melo. Ay Nui nasaful te, lino anlanggang wan. 12Ay Nui nafalangfe yay fitu ya gayvd kmenit, ay sanya ginan nafalfas yay gayvd labikung, ay wa nfoli ya.
13Gina Nui at banwa unumk sandan sadi, gina taguna fag magdanun, sis fasadik menit, lino anlanggang wan. Nui naluang sakayan lino at fagbanawanan ay nalag te, daga marugme yay. 14Ay nu siwas faduak safulu e fituk menit sis faduak magdanun, daga matat wan.
15Ay Dius nalong sas Nui te, 16“Fagayu am duksuni wan siginans sakayan lino, o ay am mangena ay am ngay baguama ay anggan am ngay nugang. 17Ay faduksuni yangay fagayu mangilafang laman nangayu ay nangarapyag sas fagdaul daga.” 18Nu katanya, Nui naduksun gasfuan at mangena ay at ngay baguama ay anggan at ngay nugang. 19Ay nafaduksun yangay fagayu mangilafang: taglao, taglayug, tagalafang, ay galay sik mangilafang gadgaloan at mesa gaban.
Nui Nafon sik Fanggalangun
20Ay Nui nawat fagirugan fanggalangun laman sas Yawi. Sanya ginan, kanya nabul ngay mangilafang at masine#8:20 masine: at masuad, masine sik fanggalangun ay masine kon. ay anggan yangay manuk tungud at masine, ay nairug sas fagirugan laman at fanggalangun sas Yawi. 21Ay Yawi nu nayuk kafag fanggalangun at anus, nalong te, “Kwa ban gfadog ya gfaurianan daga aroro sas taw at nafakamulun, dewa au nasaful te, taw at ngay amatanganan kabavn mauri way siginan nu masisian. Kwa ban gfadog ya gfamin fagayu tagleleg, kata ebi ku nafakamulun. 22Kaduge ban e fagdaul daga, di ban karagang nu e fananuman, ay nu e fanggutluan, ay nu e marios, ay nu e maroy, ay nu e abagat ay nu e mangune, ay anggan nu e menit ay nu e yabi.”
ప్రస్తుతం ఎంపిక చేయబడింది:
Fakasigadan 8: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
