Fakasigadan 9
9
Dius at Fatuyanan sas Nui
1Sanya ginan, Dius nafadante Nui ay anggan at ngay sisian ay nalong te, “Sisiani laman ban umkayu am ay umkapnu sas fagdaul daga. 2Ay fagayu ban mangilafang: taglao, taglayug, tagalafang, ay anggan tagsisad lino kalimu tua ayu. Ay gfagbilug kban sa ayu kanya fagayu. 3Siginan ban katsi kon wam ngay fagbaugun, ay gfon kwan sa ayu laman ban ay fakonun, kata ku nafon ayu fag ngay tanum takaon tua at ngay rawvg. 4Ay dewa katanya, lag ban am kon fagbaugun at yamas at yud naduksun at taguk gina kabul, aroro taguk wan leleg. 5Fakabulun ban ku faurianan sas nusnga sinu at nafabul taw ay anggan ban ngay fagbaugun at nafabul ayu, ay namaurianan kyangay ban nusnga sinu at nafabul at iba. 6Ay nusnga sinu ban at nafabul at iba, at ngay iba yangay ban at namabul anya, aroro Dius nawat taw kata anya. 7Ay sisiani ban laman umke ngay taw sas fagdaul daga.”
8Dius nalong yay fia sas Nui ay anggan sat ngay baguama te, 9-11“Katsi gfatuyanan au sa ayu ay sa ay ngay kasugfunanan, ay sas fagayu tagleleg, ngay manuk tungud, ngay fagbaugun ay fagayu tagsis talun fag ngay mangilafang at nafasfuan ayu naduksun siginans sakayan lino. Kata tuy ku fatuyanan: kwa ban gdog ya gfaurianan fagdaul daga siginans lino laman namamin fagayu tagleleg.” 12-13Ay Dius nalong yangay te, “Katatuy ban at fakatoglagan ku fatuyanan sa ayu ay anggan sa sangay mangilafang at nanangalo ayu: gfasa kban sad linyabu ku balango, laman ban famamatang sas fagayu kasugfunanan kabavn ban. 14Galay kban namae linyabu, ay balango kasure, 15gamatang kban ku fatuyanan sa ayu ay sas fagayu awatan tagleleg. Anud, wa ban gdog ya e lino daul at namamin fagayu tagleleg. 16Galay ban balango kasure sa sangay linyabu, gamatang kban gugat ku fatuyanan sas fagayu ku awatan tagleleg sas fagdaul daga.”
17Nu katanya, Dius nalong sas Nui te, “Balango ban at fakatoglagan ku fatuyanan sas fagayu tagleleg sas fagdaul daga.”
Nui at ngay Baguama
18Nui at ngay baguama: Sem, Kam ay Afet. Kanya fag tulu galo anya sis sakayan lino. (Kam, Kanaan at mama.) 19Ay siginan kafag duksayan ngay taw sas fagdaul daga at fakasigadan.
20Nui sik tagtanum, ay sia wan taguna gtanum wat ubas. 21Sik menit, Nui nainum at malangu siginans wat ubas at mamam, ay nalangu. Ay malulasan gtaygilidan sit bale ramit. 22Ay Kam, Kanaan at mama, nasakbo sat bale ay nalag at mama nu malulasan. Ay kanya naduksun laman namasaful sat faduksay fagdua. 23Ay duksay Sem ay Afet nabul sik ramit ay nafasat lafi ay gtalyuyan glao. Ay duksay nasakbo laman nangumut at mama at bilug. Kanya wa gdama aroro wa kaylat glag at mama nu malulasan. 24Ay Nui nu nfia wan nu galangu, ay nu nasaful at faglon at nafakamulun sa anya, 25kanya nalong te,
“Kanaan ban gafaurianan
ay nangasik fagsuguan
sat ngay faduksay.”
26Ay kanya nalong yangay te,
“Segi Yawi, Sem at Dius.
Kanaan ban nangus, Sem wa fia at fagsuguan.
27Dius ban nangus gfabia Afet at talun.
Ay Sem ban nangus at gaban namanwan sas Afet fag gaban.
Ay Kanaan ban nangus Afet wan at fagsuguan.”
28Ay siginan nu kalino, Nui nu gleleg tuluk yak sandan limak safuluk banwa. 29Ay Nui anbul gina at banwa siamk sandan limak safulu.
ప్రస్తుతం ఎంపిక చేయబడింది:
Fakasigadan 9: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
