Fakasigadan 4
4
Kain ay Abel
1Sanya ginan, Adan nafataladan at bubay Eba, ay Eba nafafion wan. Ay nu nafasalug wan nalong te, “Anke sisian au sik munama siginans Yawi at gubuk.” Nu katanya, nafangayan kafag sisian te, Kain.#4:1 Kain: tibaginan at masuad te, Nagbilug. 2Ay Eba gdog yay anke sisian sik munama ay nafangayan anya te, Abel. Ay duksay nu nbia wan, Abel sik tagalaga ngay tupa ay ngay kambing, ay Kain sik tagfakamulun sis gamasun.
3Andasug sik menit, Kain nafon sik fanggalangun sas Yawi siginan at fananumun at rawvg. 4Ay Abel nabuba at fagbaugun tiba at ngay riangan taguna, ay nafilas laman at fanggalangun, ay nafon sas Yawi at masine fag afud. Ay Yawi guseganan Abel at fakamulun ay at fanggalangun. 5Dewa katanya, Yawi wa naylat Kain ay anggan at fanggalangun. Nu katanya, Kain maksvn nu kadotama ay at kamatan mafaurian. 6Ay Yawi nainto anya te, “Nataw am fakadotamaun? Ay wain fagmauriun am kamatan? 7Nu matuyan di am nafakamulun, mabayan tua ro wo, dewa katanya, madiriani tua! Aroro nu dway matuyan am nafakamulun, asalanan kata sik madot fag mela at mafanyan gugat laman nangagat emu. At masine baboi tua.”
8Sik menit, Kain nalong sat arian te, “Gewan, sa wata sgamasun.” Ay nu ndasug wa sanya, Kain nafabul at arian.
9Ay sanya ginan, Yawi ginto sas Kain te, “Dada wan am arian?”
Kain gbalus te, “Safulun, kwa saful te, sanya. Ay wain, o nunda au yay tagulit anya?”
10Ay Yawi nalong sas Kain te, “Nataw am nafakamulun? Am arian at taguk guro sa angku siginans daga, glong te, ‘Faurianani at nafabul angku fag taw.’ 11Aroro sam nafakamulun, e fagidapun ban o. Siginan katsi, dewa ban o nafananumun sa tagatagukun fag lutuk, wa ban o kae gutluan ya aroro nafabul o am arian. 12Dewa ban o gfananumun gugat, wa ban o e gutluan siginan am gamasun. Gadgalinan way ban o gugat ay wa ban o e fagbanwanan manabayan.”
13Ay Kain gbalus Yawi te, “Maksvn wan am faurianan sa angku. 14Katsi, gaiyan wo angku ste ginan fag daga ay siginan am daga salubangan. Gadgalinan kban gugat ay kwa ban e fagbanwanan manabayan. Ay tiba bank taw nu nalag angku, matuyan, gfabul wan angku.”
15Dewa katanya, Yawi nalong sas Kain te, “Duan, wa ban kafasludan sa emu takatanya! Aroro nusnga sinu ban at nafabul emu, gfasud kban fitu ginan.” Nu katanya, Yawi nafae fakatoglagan Kain laman nusnga sinu ban at lumag anya, wa gfabul. 16Sanya ginan, Kain anyayu Yawi ay nanamanwan sas talun Nud, tagsibaliwas Eden sfakamenitan.
Kain at ngay Kasugfunanan
17Ay Kain nafataladan at bubay ay at bubay nafafion ay nafasalug sik munama ay nafangayan anya te, Inuk. Ay abandi Kain nafawat sik furuan daul ay nafangayan te, Inuk kata at baguama at ngayan. 18Ay Inuk anke sisian yangay sik munama at ngayan Irad. Irad, Mekuyael at mama, ay Mekuyael, Metusael at mama, ay Metusael, Lamek at mama. 19Ay Lamek at bubay dua, Ada ay Sila. 20Ada anke sisian at ngayan Abal. Ay Abal at ngay kasugfunanan taguna namanwan sas bale ramit ay tagulit ngay fagbaugun. 21Abal e faduksay sik mangama at ngayan Ubal, kanya wan taguna gfawang tulali ay fagfawangun ke ngay bakyang. 22Ay Sila anke sisian yangay sik munama at ngayan Tubal-Kain. Ay Tubal-Kain wan at nawat fagayu fagagbilugun at mawatan siginans sanbung ay tansu. Ay e faduksay mangena at ngayan Naama.
23Sik menit, Lamek nalong sat bubay fagdua Ada ay Sila te,
“Ku ngay mangena, dungugani angku.
Nafabul au sik baguama at nafauri angku.
24Nu fitu ginan nu gfasud sat nafabul Kain,
nu namabul au kafag taw, fituk safulu e fitu tua ginan.”
Set at ngay Kasugfunanan
25Adan nadog yay nafataladan at bubay, ay at bubay gdog yay anke sisian sik munama. Ay Eba glong te, “Yawi nafon yay angku sik sisian at fantubus Abel, Kain at nafabul. Nu katanya, gfangayan au anya te, Set.”#4:25 Set: at masuad, At nafon. 26Ay Set anke sisian yangay sik munama ay nafangayan anya te, Enus. Ginanya fag buknga, ngay taw nu gfasigad gseg Yawi.
ప్రస్తుతం ఎంపిక చేయబడింది:
Fakasigadan 4: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
