Fakasigadan 3
3
Taw nu Gasalanan
1Yawi at awatan fagayu ngay mela, ule wan at ke fagsafulun gfandaya. Sayginan, ule ginto sas mangena te, “O anud Dius nalong te, ‘Lag kon nusnga setaw fag fun kayu at rawvg iste fag tanuman’?”
2Ay mangena gbalus ule te, “Kon waymi fagayu fun kayu at rawvg. 3Ay Dius nalong te, ‘Lag kon ay lag gted tagsis wabilug tanuman fag fun kayu at rawvg, aroro umbul ro am.’ ”
4Ay ule nalong sas mangena te, “Wa mafanud Dius at longan te, kabul ro am! 5Dius at fagnalongun takatanya, aroro kanya nasaful te, nu non ro am kafag rawvg, umke fagsafulun am kata anya tagsaful at masine ay at mauri.”
6Ay mangena nafanud ule at nalong, ay kanya nalingaman kafag fun kayu, ay namatangan te, mataba ro siring at rawvg nu kaon. Ay aroro kaylat kae fagsafulun, kanya narabas sadik rawvg ay naon ay sik baltak nafon sat indugan. 7Ay dadwa nu naon kafag rawvg, nasaful wan at masine ay at mauri. Nu katanya, nasaful te, malulasan. Ay nabul sik ngay don ay nawat laman at fantabun at bilug.
8Ay nu gakayabiun wan, dadwa nadungug Yawi nu glao sis wa tanuman Eden. Ay dadwa nasuksuan sa sangay fun kayu. 9Ay Yawi nauro mangama te, “Dada wo?”
10Ay mangama gbalus te, “Nadungug au nung o glao sis wa tanuman, ay kalimu au aroro lulas au ay nasuksuan au emu.”
11Ay Yawi ginto anya te, “Sinu at nalong emu te, lulas o? O naon o kafag rawvg ku nalong emu te, lag kon?”
12Ay mangama gbalus te, “Am nafon angku fag mangena nafon angku kafag rawvg ay naon au.”
13Ay Yawi nainto wa vtv sas mangena te, “Nataw am nafakamulun?”
Ay mangena gbalus te, “Ku fagnaonun kafag rawvg, nadayan au ule.”
Faurianan laman sas Dadwa
14Nu katanya, Yawi nafakamatoan ule te, “Aroro sa am nafakamulun takatanya, gfaurianan kban emu. Sas fagayu tagsis talun fag ngay mangilafang, o way ban lang at dumalan ku faurianan. Kaduge ban o gleleg galafangan wayo, ay girusan ban gugat am ungdan, ay kon ban o gugat lukbu. 15O wo ban ay kafag mangena gawayan ban am gugat. Ay anggan ban am ngay kasugfunanan ay kafag mangena at kasugfunanan gawayan gugat. Ay kanya ban nanrufa am alfuyu ay kagat ban o at sungkulan.”
16Ay kanya nalong yangay sas mangena te, “Aroro nafakamulun o takatanya, gfamut kyay ban am fagidapun. Kaduge ban o gfafion gidapan o, kaugat wan gina o gfasalug. Dewa katanya, kaylat tua ban o gugat am mangama aroro sia wan tagfunan emu.”
17Ay Yawi nalong sas Adan te, “Aroro nadungugan o am bubay ay naon o kafag kayu at rawvg ku nalong te, lag kon, namauri kban lutuk. Kaduge ban o gleleg, gidapan o gugat gfakamulun laman e fakonun o. 18Ay at madugi ban fag ngay makmak gtugbung. Ay am fakonun ban siginans gamasun am ngay natanum. 19Ay maksvn ban nu gidapan o gfakamulun laman e fakonun o yakmay am bilug anfoli sas daga, aroro at fangawat emu daga yangay.”
20Adan nafangayan at mangena te, “Eba,” aroro sia waban fagayu taw at mina. 21Sanya ginan, Yawi nawat lanbung siginan sik mangilafang at balat laman sas dadwa.
Yawi Naiyan Adan ay Eba siginans Tanuman Eden
22Yawi nalong te, “Katsi, taw kata wa antam, aroro nasaful wan at masine ay at mauri. Nu katanya, gsalag ban tam laman di nangon tagfon leleg fag fun kayu at rawvg, aroro nu naon way ban, gleleg way gugat.” 23Nu katanya, Yawi naiyan wan dadwa siginans tanuman Eden laman namakamulun sat nafon fag daga.
24Yawi nu naiyan wan dadwa sanya ginan fag tanuman, nafasas fakamenitan baliwa duak awatan at ke fakfak. Ay nafasanya yangay sik tagigang fag fiso gribungan gugat laman we manangakbang sanya fag fun kayu tagfon leleg.
ప్రస్తుతం ఎంపిక చేయబడింది:
Fakasigadan 3: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
