LUKA 21
21
Sendesiek aeng’ che bo mosoget
1Ak kiyot met, kogeer magorek kondoi kagochinoikwak ole kiyumjin. 2Ak kigeer mosoget age ne kibanania kondoi sendeisiek aeng’ che u kebebertab pesaiyat. 3Ak kile, Amwawok iman ale, Kagonde mosogani banan che siirei cho tugul: 4amu kagonde chu tugul eng’ chang’indanywa ole kindoi kagochinoik; ago kagonde inendet eng’ banandanyi tugul che tinyei, agot che kosobe.
Sib komwaei Jesu agobo kabutetab Jerusalem ak agobo kagesunnetab betusiek
5Ak kingota kong’alali alak agobo hekalut, ole kigimusaganda eng’ koik che kororon ak kagochinoik, kole, 6Eng’ tuguchu ogeere, ko tun bwanei betusiek, che mang’etune koita agot agenge, baragutab age, ne ma tun kiwirjin ng’ony.
7Ak kiteebe, kole, Konetindoni, egu anyun tuguchuto auyo? Ak u nee kaborunet ye tun machei korik kosulda tuguchuto?
8Ak kile, Oripge si ma kibeetok: amu tun bwanei bik che chang’ eng’ kainennyu, kolen, A inendet; ak, Kagorik betusiek: amosub ichek. 9Ak ye tun ogas agobo lugosiek ak chemarget, ko mat oarogense: amu kanyol kosib kosulda tuguchoto korok; ago tom korik kagesunet.
10Kolenji anyun ichek, Tun setyin bororiet age bororiet age, ak setyin bounatet age bounatet age: 11ak kobiit botanosiek che eechen che bo ng’ony, ak rubosiek eng’ oldinwek alak, ak korotwek; ak kobiit kamuisosiek ak kaborunoik che eechen che bunu kipsengwet. 12Ago ye tom kobiit chuto, konamak eng’ eunekwak, ak kousok, ak komutak obe sunagogisiek ak korgorosiek, komutak taitab laitorinik ak bounik agobo kainennyu. 13Egu baornatet eng’ okwek. 14Oegu che begechinotin eng’ mugulelwekwok, si mosib ogerer met agobo ole owolundoi: 15amu agonok kutit ak ng’omnatet, ne maimuchi bunikwok tugul kota kowol kiy anan kogirindaak. 16Ak kong’wektak sigikwok, ak che otupche, ak che bo oreng’wong’, ak choronok; ak kebar alak eng’ okwek. 17Ak kowechok bik tugul agobo kainennyu. 18Ak mabetei sumeiyot agenge ne bo metowekwok. 19Ak eng’ muitaeng’wong’ onyoru sobonwekwok.
20Ak ye tun ogeer lugosiek koyiem Jerusalem, onai anyun ole, kagorik ng’emisiennyi. 21Ingomwechi anyun chi mi Judea tulonok; ak ingomanda che mi kwenutab nganasanato; ak amat kota koba orit ichek che mi emonoto. 22Amu chuto ko betusiekab mugetut, si kobiit kosulda tuguk tugul che kigisir. 23Bwa eng’ ichek che chio ak che reritos eng’ besiosiechoto! Amu biitu bichiindo ne o eng’ ng’ony, ak nereknatet eng’ bichuto. 24Ak kobutyo ichek eng’ ng’atibindab rotwetab chok, ak kimut luulenik koba bororiosiek tugul: ak kotiech Bororiosiek Jerusalem, agoi kosulda betusiekab Bororiosiek.
25Ak kobiit kaborunoik eng’ asista ak eng’ arawet ak eng’ kecheik; ak kobiit eng’ ng’ony bichiindab bororiosiek, ak beng’jinet amu kamuutetab nyanjet ak beek che mildogei; 26ak kobek mugulelwekab bik amu kaiyweisiet, ak amu kagenisietab tuguk che bwanjin ng’ony: amu kitumdum kimnatosiekab kipsengwetisiek. 27Ak eng’ betunoto kogeer anyun Weritab chi konyonei eng’ boldet koboto kimnatet ak lilindo ne o. 28Ak ye toi kosulda tuguchuto, ogeer barak, ak oyot metowekwok; am karik katiageng’wong’.
Kanyol keripge
29Ak kimwachi ichek kalewenet; kole, Ogeer mogoiywet, ak ketik tugul: 30ye ing’atyo ogeere ak onae okwek ole, karik kesisiet. 31U noto anyun ak okwek, ye ogeer koyaagis tuguchuto, onai ole karik bounatetab Jehovah. 32Amwawok iman ale, Masiirtoi ibini, agoi kosulda tuguk tugul. 33Siirtoi kipsengwet ak ng’ony: ago magoi siirto ng’alekyuk.
34Ago oripge anyun okwek, si manyi mugulelwekwok keiyandit, ak bogitet, ak kaiimutikab sobetab betusiechu, ak konyonjok betunoto kocheak ko u mestet: 35amu u noto tun nyonjin bik tugul che menyei ng’ony komugul. 36Ago oripge eng’ betut age tugul, ak osae, si kobiit oterterisie, ochilile tuguchuto tugul bwanei, ak otononse eng’ taitab Weritab chi.
37Ak kiinetisiei eng’ hekalut betut age tugul; ak kimandoi kemout age tugul, kowendi kotebyei eng’ tulwet ne kiguure tulwetab Emitik. 38Ak kimusyin bik tugul inendet eng’ hekalut, si kobiit kogas inendet.
ప్రస్తుతం ఎంపిక చేయబడింది:
LUKA 21: BUKUIT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
God's word open for all
©Bible Society of Kenya, 2020
