LUKA 20
20
Koesioi bik kimnatetab Jesu
1Ak ye kiineti bik eng’ betut age eng’ hekalut, ak koamdoi logoiywek che miach, kobwanji inendet tisiik che eechen ak sirik koboto boisiek koche inendet; 2ak kimwachi inendet kolenji, Mwawech; iyae tuguchu kimnatetab ng’o? Ak ko ng’o ne kigonin kimnatoni? 3Ak kiwolji kolenji, Ateebenok agane ng’olyot; ak omwawa: 4Kabatisanetab Johana ko kibunu kipsengwet, anan kibunu bik? 5Ak king’alaljigei ichegei, kole, Ngot kemwa kele, Kibunu kipsengwet; komwa kole, Ko kilya si moyan inendet? 6Ago ngot kemwa kele, Kibunu bik; kolachech bik tugul eng’ koik: amu kiiyani ichek kole, ki maotio Johana. 7Ak kiwol kole, Magingen ole kibunu. 8Ak kilenji Jesu ichek, Agot ane ko mamwawok kimnatet ne ayae tuguchu.
Kalewenent agobo mbaret ne bo sabibuk
9Ak kitoi komwachi bik kalewenoni, kole: Kimin chi sabibuk eng’ mbar, ak komanakyi meek, ak kwo emet age kotebi betusiek che chang’. 10Ak kingoit betut koyokyi otwogindet meechoto, si kobiit kogochi ichek inendet logoekab mbaranato: ago kibir meek inendet, ak koon kwo buch. 11Ak kiiyokto kogeny otwogindet age: ak kibir noto agine, ak kotewer, ak koon kwo buch. 12Ak kiiyokto kogeny ne bo somok: ak kiiguoten agine ak kotoorji sang’. 13Ak kile chitab kobo mbaret, Ayai nee anyun? Ayoktoi werinnyu chamanennyu: tamangab kogonyit inendet. 14Ago ye kingogeer meek inendet, kong’alaljigei ichegei, kole, Nito ne tun bunjin tuguk: ongebar anyun, si kindii tuguk. 15Ak kitoorta komanda eng’ mbaretab sabibuk ak kobar. Itoi nee anyun chitab kobo mbaret bichoto? 16Nyonei anyun inendet ak kobar meechoto tugul, ak kogochi bik alak mbaretab sabibuk. Ak ye kingogas ichek, komwa kole, Achicha, mat koek ko u noto.
17Ak kiichiilji kong’ ichek ak kole, Nee anyun ne kigisir kele,
Koita ne kiesio teegik,
Kigiyai noto koek metitab luita?
18Ak chi age tugul ne ibutyin koyata koilei konyaknyaksei; ak inendet ne ibutyin koyata, konyinyirsei.
Ng’olyot ne kigiteeb agobo kodi
19Ak kicheng’ sirik ak tisiik che eechen konam inendet eng’ sainato; ak kiiywei ichek bik: amu kinai kole mwaei kalewenoni agobo ichek. 20Ak kiriboti icheget inendet, ak koyokto segeik, che kiyaigei koek che bo imanda, si kobiit koname inendet ng’alekyik, si kogoito inendet kwo taitab bounatet ak kimnatetab bounindet. 21Ak kiteebe inendet kole, Konetindoni, kingen kele imwae ak inetisiei eng’ iman, ago metiytii chi, ak ineti iman oretab Jehovah: 22Tos chamdoi ng’atutik kigochi kodi Kaisari, anan achicha?
23Ago kinai ng’alsenywa, ak kolenji ichek, 24Oborua denarit, Bo ng’o itoni ak sirutik che tinyei? Ak kile, Bo Kaisari. 25Ak kilenji ichek, Ogochi Kaisari tuguk che bo Kaisari, ak ogochi Jehovah tuguk che bo Jehovah. 26Ak kima imuch koname mwaonato eng’ taitab bik; ak kikwong’io eng’ wolunennyi, ak kisisyo.
Ng’olyot ne kegiteeb agobo ng’eetyet
27Ak kibwanji inendet Sadukaik alak, icheget che mwaei kole, mami ng’eetyet; ak kiteebe inendet, 28kole, Konetindoni, kisirwech Musa, kole, Ngo me ng’etab kam, ago tinyei osotiot, ne tom kosich lakwa, kondii ng’etab kam osotiondonoto, si kolalji ma ng’etab kam. 29Kimi anyun werik tisabu che kitupcho: ak kiitunis ne bo tai, ak kime ama kisich lakwa; 30ak kiindi ne bo aeng’; 31ak u noto ne bo somok; ak kiigei noto tugul ko tisab, kibek ama sich lakwa. 32Ak kingobata kome agine kobogoriondonoto. 33Tun eng’ ng’eetyet anyun koegu osotiotab ng’o eng’ ichek? Amu kiitun ichek tugul ko tisab.
34Ak kilenji Jesu ichek, Itunisiei werikab betusiechu, ak kogoitoi kitun: 35ago che kiityin kele nyoljin konyor betusiechoto bwanei, ak ng’eetyet eng’ che kibek, ko matun itunisiei, ama kigoitoi kitun: 36amu ma komuchi kobek agoi: amu kergeitu ak malaikaisiek; ak icheget ko werikab Jehovah, amu werikab ng’eetyet. 37Ago ng’eetos che kigobek, kiibor Musa agine eng’ ye kigisir agobo Ketit, ye kiguure Kiptaiyat, Jehovah ne bo Abraham, ak Jehovah ne bo Isak, ak Jehovah ne bo Jakobo. 38Inendet ko ma Jehovah ne bo che kigobek, ago bo che soptos: amu soptos tugul eng’ inendet.
39Ak kiwolji sirik alak kolenji, Konetindoni, kaimwa komie. 40Amu kimata kogany ichek koteebe inendet teebut age tugul kogeny.
Tos weritab Daudi Kristo?
41Ak kilenji ichek, Teptoi ano si komwaei ichek kole, Kristo ko weritab Daudi? 42Amu kimwa Daudi inendet eng’ bukuitab Tienwogikab Kalosunet, kole,
Kilenji Kiptaiyat Kiptaiyandennyu,
Tebe eunnyu ne bo tai,
43Agoi ayai buniguk koek ng’echeretab kelyeguk.
44Kuure anyun Daudi inendet Kiptaiyat, koegundoi ano anyun werinnyi?
Kiboruech kele mie keribege sirik
45Ak kimwachi alamalyennyi kogasei bik tugul kolenji, 46Oripge eng’ sirik, che chamei kobendat kolaachi ngoroik che koen, ak kochamei kagatosiek eng’ oldinwekab aldaisiet, ak ng’echerok che bo tai eng’ sunagogisiek, ak oldinwek che bo tai eng’ igorwek; 47ak korebe mosogik gorikwak, ak kosaei sautik che koen kong’alsei: tun nyoru chuto kiruoget ne o kosiir.
ప్రస్తుతం ఎంపిక చేయబడింది:
LUKA 20: BUKUIT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
God's word open for all
©Bible Society of Kenya, 2020
