PĚNDARIADI 15
15
Kědon Duata e si Abram
1Bọu ene i Abram e nakahombangke papasilo ringangu nakaringihẹ̌ko Mawu e něhengetang si sie, ”Abe katakụ, Abram, Iạ e sarung maněntanudẹ̌ si kau wọu kal᷊awọu silakạ, dingangu mẹ̌gěllịu wawal᷊ise masaria si kau e.”
2-3Kai i Abram simimbang, ”Mawu Karangetange, Mawu e tawe mangonggọu anạ si siạ e. Taumata kụ sarung managhuang arětạku e kětạbeng i Eliezer, ěllangku wọu Damsyik.#15:2-3: Taumata … Damsyik, su werang Ibranine tawe nal᷊ahẹ. Kụ apa wue gunane Mawu e mangonggọu wawal᷊ise si siạ tangu?”
4Bọu ene i Abram e nakaringihẹ̌ Mawu e něhengetang kạpia si sie, ”Bal᷊inewe ěllangu sarung makoạ taghuang arětạ u e, kaiso kawe anạu esẹ tutune.” 5#Rm. 4:18; Ibr. 11:12 Mawu e něngahạeng Abram iapasěbang bọu e něhengetang si sie, ”Dal᷊ingarako sol᷊ong langị kụ pěndekengko wituing kụ i kau tangú sarung měhite kere kal᷊awọu wituing ene.”
6 #
Rm. 4:3; Gal. 3:6; Yak. 2:23 I Abram nangimang su Mawu, kụ ual᷊ingu ene Mawu e něnarimạ i sie kere taumata makạl᷊uasẹ̌ naung e.
7Bọu ene Mawu e něhengetang kapia si sie, ”Kai Iạ e Mawu, kụ seng něngahạ i kau e siměbang bọu soan Ur su Babilonia, baugu mẹ̌gěllịu ěntana ini si kau makoạ tataghuanengu.”
8Arawe i Abram e nakiwal᷊o, ”O Mawu Kasěllahenge, kereapa ral᷊enge tadeạu iạ makakasingkạ u ěntana ene sarung makoạ tataghuanengku e?”
9 Mawu e simimbang, ”Pěngal᷊ạko waugu Iạ sapi wawine sěmbaụ, kambing bawine sěmbaụ dingangu domba esẹ sěmbaụ, sěmbaụ-sěmbaụ umure 3 taung, dingangu manụ kuhono sěmbaụ dingangu paluma sěmbaụ. 10Mase i Abram něngal᷊a e manga binatang ene waugu Ruata. Sapi, kambing dingangu domba e sěmbaụ-sěmbaụ nipahiạ e ruang kapahiakeng, kụ pẹ̌sěmběka-sěmběka e piněllọe pinẹ̌darokạ su ruan tara. Arawe manga manụ u kinoaěng e tawe nipahiạ e. 11Gẹ̌sine pinẹ̌papalang ene e nirorokangu manụ u winalangeng tahakinạ kasuang, kaiso taghal᷊ẹ̌ niliwuaheng i Abram.
12 #
Ayb. 4:13, 14 Ene sarạeng matangěllo e kate kadodọ su mědạ e, i Abram kinahuntikilang mal᷊ěna-l᷊ěnabẹ̌. I sie sěngkelěndịu nihombangengu takụ marasai. 13#Sas. 1:1-14; MMR. 7:6 Mawu e něhengetang si sie, ”Tahěndungeko, hitenu e sarung makoạ taumata mananumpang su wanua wal᷊ine; i sire sarung makoạ ěllang sene, ringangu sarung ipẹ̌tahuěllang kụ tumbiageng karěngụeweng 400 su taunge. 14#Sas. 12:40-41; MMR. 7:7 Arawe umatẹ̌ pạhamawuang i sire e mal᷊aing Takụ ihukung, bọu ene su tempong hitenu e maněntang u wanua ene, i sire sarung makawawa rarotong maěnasẹ̌. 15I kau sẹ̌sanu e sarung makaratingu umburẹ̌ marangẹ; i kau e sarung mairị su pẹ̌darame, mase itampạ. 16Kụ pahědong kaěpạ u hawengu hitenu e makapẹ̌bal᷊ị sini; batụu Iạ deng tawe manokol᷊u tau Amori těntal᷊ang pẹ̌sasal᷊an sire reng tawe tumanịe mědeạu reng ihukung.”
17Ene sarang ěllo e nahěbi e sěngkianụ e piạ dapuhang tụtipu ringangu piạ utụ dụděllị kụ dụdal᷊eng su wěllạu kinạ pinẹ̌papalang ene. 18#MMR. 7:5 Su tempo ene lai Mawu e nẹ̌taingu pẹ̌kakakědo ringang i Abram. Angkuěng u Mawu, ”Iạ e mẹ̌taingu pẹ̌kakědo kụ sarung mangonggọu kạguwạu wanua ene su hitenu, manětạ bọu ěntanang Misirẹ̌ sarang Sal᷊ụ u Efrat, 19nasowa l᷊ai ěntanan tau Keni, Kenas, Kadmon, 20Het, Feris, Refaim, 21Amori, Kanaan, Girgasi ringangu Yebus.”
ప్రస్తుతం ఎంపిక చేయబడింది:
PĚNDARIADI 15: SXN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
