PĚNDARIADI 14
14
I Abram nẹ̌tul᷊ung i Lot
1Datu ěpạ u katau: i Amrafel bọu Babilonia, Ariokh bọu Elasar, i Kedorlaomer bọu Elam, dingangu i Tideal bọu Goyim, 2nẹ̌sekẹ dimokạ datu lima wal᷊ine: i Bera wọu Sodom, i Birsya wọu Gomora, i Syinab wọu Adma, i Semeber wọu Zeboim, dingangu ratu wọu Bela kụ isẹ̌sẹ̌bạ l᷊ai si Zoar. 3Datu i sire lima ene nẹ̌sẹ̌ngkanaung kụ něnampungu sordadon sire su Wal᷊ang Sidim, kụ orasẹ̌ ini e isẹ̌sẹ̌bạ Laudẹ̌ Nate. 4Karěngụ u mapul᷊o dua su taunge, i sire nikawatạ u Ratun Kedorlaomer arawe su taung kapul᷊o těllune, i sire němpěndongka kụ dimokạ si sie. 5Su taung kapul᷊o ěpạ e, i Kedorlaomer ringangu manga hapị e nahunděnta ringangu sordadon sire kụ namatạ tau Refaim su Asyterot-Karnaim, tau Zuzim su Ham, tau Emim su Syawe-Kiryataim, 6dingangu tau Hori su wawul᷊urangu Edom, bọu e něnahusu si sire sarang El-Paran su wiwihʼu wanua tạ taune. 7Bọu ene i sire mananahusu e němpẹ̌sul᷊e kapia kụ nẹ̌bal᷊ị sol᷊ong En-Mispat kụ orasẹ̌ ini e isẹ̌sěbạ Kades. I sire nẹ̌kawasa kasěllahu ěntanang Amalek ringangu němatạ tau Amori nạung mạtanạ su Hazezon-Tamar.
8Bọu ene kal᷊awọu manga ratu wọu Sodom, Gomora, Adma, Zeboim dingangu Bela nangatorẹ̌ barisang u sordadon sire su Wal᷊ang Sidim mase nẹ̌sekẹ, 9něndokạ manga ratu wọu Elam, Goyim, Babilonia, ringangu Elasar; kụ datu i sire lima něndokạ ěpạ u katau. 10Bědạ e ene napenẹ u pahighing aspalẹ̌, kụ piạ e manga ratun Sodom dingangu Gomora e mạhuntal᷊ang bọu pẹ̌seketang e, tangu i rẹ̌dua e něngkanawo su ral᷊ungu manga pahighi ene. Arawe ratu i sire těllu wal᷊ine apạewen nal᷊embe ute němpẹ̌tal᷊ang sol᷊ong bawul᷊urange. 11Datu i sire ěpạ apạewen nakawatạ e němpěmul᷊ahọewe kal᷊awọu sabarang su Sodom dingangu Gomora, narekeng dingangu laidopẹ̌ e, mase i sire rimal᷊eng. 12I Lot anạu tuaring Abram e mal᷊aing měmpẹ̌tẹ̌tumanạ su Sodom, kụ ual᷊ingu ene i sie lai nitawengu rokạ dingangu kal᷊awọu rarotonge.
13Arawe piạ sěngkatau kụ nakatal᷊ang tangu simongo naul᷊ị u kěbịewe apan nariadi e si Abram, tau Ibrani ene. I Abram nẹ̌tanạ su rěduhu manga kakaluang u jati tampạ u pẹ̌kakal᷊iomanengang i Mamre tau Amori. I Mamre ringangu manga anạ u sěmbaụ e i Eskol dẹ̌duan Aner e kai hapị sěndědagʼi Abram. 14Piạ i Abram nakaringihẹ̌ u anạu tuarine kawe nitaweng, měngkatewe nitampunge patikụ taumata su ral᷊ungu tentane kụ apạeweng tahapẹ̌sekẹ e kakěpal᷊e 318 su kataune, bọu ene němpěnahusu datu ěpạ ene hakịu nẹ̌datingu soan Dan. 15Sene tangu i Abram namahiạ u taumatane pira-pirang kamonaěng, bọu ene něngalo sekẹ i sire su tempong hěbi sarangkewe kinawatạ. I sie něnahusu si sire sarang Hoba su sěmběkan sawěnahẹ̌ bọu soan Damsyik. 16I Abram e nakaul᷊e kal᷊awọu rarotong nitangehẹ̌, kerene lai i Lot dingangu kal᷊awọu arětạ e, dingangu manga wawine ore lai apan nitaweng bal᷊ine e.
I Melkisedek něngal᷊amatẹ̌ si Abram
17Ene wọuten nakawatạ Datu i Kedorlaomer dingangu manga ratu sěndědagʼi sie tangu i Abram nẹ̌sul᷊e e. Bọu e ratun Sodom dimal᷊eng nanẹ̌nsomahẹ̌ si sie su Wal᷊ang Syawe kụ mal᷊aing isẹ̌sẹ̌bạ Bal᷊ang Datu. 18#Ibr. 7:1-10 I Melkisedek, datun Salem kụ mal᷊aing měngẹ̌ngumpaedẹ̌ diabatangu imang u Ruata Karangetange nẹ̌bawa e borotẹ̌ dingangu anggorẹ̌ e waugʼi Abram, 19kụ bọu ene něngal᷊amatẹ̌ si Abram, angkuěnge, ”Karimạko Duata Karangetange nạung seng něndiadi langị dingangu dunia e, měngal᷊amatẹ̌ si Abram! 20Karaloko Mawu Ruata Karangetange, kụ seng něngonggọ u kal᷊auntu si kau wọu sědụ u.” Bọu ene i Abram něngonggọ u sěngkatahạpul᷊o wọu rarotong pul᷊aho kụ seng niwawane kapia, si Melkisedek.
21Bọu ene něnitạe datung Sodom si Abram, ”Al᷊ạ e apal᷊iwụ pul᷊aho ene, kateweho mal᷊owọko isul᷊e si siạ e kal᷊awọu taumataku e.”
22Arawe i Abram e simimbahẹ̌ u, ”Iạ e kai mẹ̌salu su těngom Mawu Ruata Karangetange něndiadi langị dingangu dunia, 23u iạ e tawe rumaẹ apa sarang kadidị-didị bọu rarotongu e manilaing banaěng sěmběsụ arau tal᷊in solopẹ̌ e kai mang tala. Kụ ual᷊ingu kerene tangú i kau e tawe makapẹ̌bera u, ’Seng iạ e nakakalạ si Abram.’ 24Iạ e madiri wue měngal᷊ạ apa-apa waugu watangengku sẹ̌saku e. Iạ tumbạeweng mapulu rumaẹ apan seng bọu nipakẹu taumataku e. Kai walạekere manga hapịku sěndědagu iạ e, kụ i Aner, i Eskol, dingangu i Mamre e apěngal᷊ạ buạ e sěngkatau-sěngkatau e.”
ప్రస్తుతం ఎంపిక చేయబడింది:
PĚNDARIADI 14: SXN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
