Mataio 3
3
1Wia nouri hiwio’i Ioane Babatiso naibaha o’uro, Iudea burubatiwa nou naibaha itomututi. 2Nou naiba iaotuti, Rio ubauba kidiaudo imini taimowa’imo nouri toboro bububati nou tariwai.
3Nouvia dubui nouri Isaia Peroveta dubu nouro nou owahuo, Nou naiba aro:
Na’u dubu nou wade burubatiwa ai’iaotuti,
Paidubuido nave mea tadodiaimo,
Nouido nave gamooiha tadodiaimo.
4Wia Ioane nou himia kamela muho tama hipura’i naibaha oro’oi, wia koko tama ba’e’i naibaha oro’oi, wia nou kihona gaii wia morobo. 5Ina Ierusalema oubio wia Iudea oubio wia oubio Ioridana hapuo auwohaudo nouido naibaha orohotutiumo. 6Wia nei babatiso nou mabudo naibaha oitutitutiumo; nei himia ubauba kidia naibaha obodutitutiumo. 7Wia nou ta’uwa Parisea oubi wia Sadukea oubi godogodo nouro naibaha iauri, neiio nou babatisoido naibaha o’umo, neido nouro naibaha iaowa: Rio kewahauke aramio, botiro rioido imowahuo rio doo heauwo ta’udo odaumoi. 8Doihabuo iopu mea rio naibawa taiviamo, rio ubauba kidiaudo oroiitoutimoi nou aibo. 9Ina wade nouri rio araromomo aue, Na’u abea, Aberahamo imo ainarahohodumo mabu nouri mo rioido ainaro, Iehova nou pupo ramu akabu nouri, nou au’eudo, mere’i Aberahamoido ahomai. 10Wia doihabuo ibua nou tau romohi nua hipi mabuwa, ina nouri nua nou iopu meaha omohaudio tatowa nou aiwarahiai wia kupoito waimoiheei. 11Naiheha moro rioido oboito babatiso nimowai, ubauba kidiaudo imini imowaimoi; ina dubu nouri nou mo dooudo aiwauro o’ui, nou tiaha pairi mo aibo biahai. Mo meaiha biahai nou douboi kono omohidioi. Nourovia rioido Tana‐urioito wia kupo ramu babatiso aiwaiwai. 12Nou komumu nou tuito rohidio wia nou himia koni teiwa airia nouro sovioiha aiwaiwai wia koni nou himia koni motowa nouro aiwaihioi ina touha touha nouro aiwaipihamuti kupo odoo tato batii nouowa.
13Nou ta’uwa Iesu Galilaiaudo naibaha o’uro Ioridana omoito. Nou Ioaneido naibaha o’uro ina nouro nou babatiso owai. 14Wia Ioane nouido adohiomai. Nouro naiba aro: Movia roro babatiso owai niroi ina ro moido aro’uro? 15Wia Iesu nouido naibaha omowameai: Doihabuo roro mo adohiomai biahai, mabu nouri nou meaha imo meamea kidia auwoha idodiaiwamoi. Nouri nou ta’uwa Ioanero nou adohiomai biahai. 16Wia Iesu, nou ta’uwa nou babatiso tau owai, oboudo gamooiha nouro naibaha idiai wia toboro nouido naibaha ara’erai wia Iehova Tana‐urio, badu aibo, nouro naibaha eauriwa nou ohudo naibaha oruoro. 17Wia na’u wade toboroudo naibaha araro: Nouri mo himia auwo niro Mereri. Nouido mo auwo geii nemahebidio.
ప్రస్తుతం ఎంపిక చేయబడింది:
Mataio 3: KXW1941
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Published by the British and Foreign Bible Society in 1941.
