Mataio 2
2
1Nou ta’uwa Iesu idaroto Betelehemawa, Iudaia hapuowa, Heroda pai kemidio hiwio’i nouowa, imini meamea oubi kiheheai bati noudo Ierusalemaito o’umo. 2Neiio naiba atodoumo: Tobatiwa oroto mere’i Iudaia oubi Pai‐dubui; mabu nouri imo’o tau neauriumo nou himia huri hiwio kiheheai bati’i nouowa ina imo aino’umo nouido emabitimoi. 3Ina Heroda nou pai‐dubu, wade nouri nouro idairovidio, nou himia imini godogodoha iraromodiowa wia Ierusalema oubi auwoha nei badi. 4Ina nou ta’uwa auwoha Iudaia pai‐kohena oubi wia titi‐oubi nou naibaha idabuaiwa, nouro neido naibaha iatodoi: Tou batiwa oroto Keriso? 5Wia nei nouido naiba aroumo: Betelehemawa, Iudaia hapuowa, mabu nouri peroveta dubu nou titi naibaha iatiwaro:
6Betelehema e, Iuda hapuowa,
Rovia kekebo biahai Iuda pai‐oubimu,
Mabu nouri na’u Pai‐dubu ro mabudo aiwahuoi,
Mo himia oubi, Isaraela oubi, nouro meaha aiwaimeauri, dabi‐dubu aibo.
7Nou ta’uwa Herodaro imini mea oubi sisiboito iamauowa, nouro neido pupuito iatodoi hurii tou ta’uwa omowaetairo 8wia nouro nei Betelehemaito naibaha itiodoi, nou naiba aro; Ta’umo, rio orio mere mea romohodumo ina nou ta’uwa rio’o nou oweamowa rio wade moido tawaiwaumo, nouri mo o’ui ina mo nouido naibaha oroboriai. 9Nou ta’uwa pai‐dubu wade neiio idaorovidioumo neiio naibaha o’umo, wia huri nouri neiio kiorowa ida’eauriumo, nou nei hohoito omodoaumo wia ida’u ida’u ina aiotoa orio mere moto gimini kioidio’i nou gamootoi. 10Ina nou ta’uwa neiio huri naibaha eaurimo neiio tiaha geii emahebidiowaumo. 11Wia nou ta’uwa moto’i nouowa neiio naibaha idowaumo orio mere nou himia mamumu, Maria, neiio naibaha iauriwaumo, ina neiio koroboriatuti oromooutiwaumo wia nouido naibaha emabitiwaumo wia nei himia meamea nana’i neiio naibaha ia’eriwaumo wia kimio nana nouido naibaha emaatiwaumo gold wia nibo mea na neewa. 12Ina nei himia batito nave ata aibo nei naibaha araiwaumo, mabu nouri neiio hiwo hiwoito emitevidioumo Iehova karo wade’i, neiio Herodaido araiwaimo tore.
13Nou ta’uwa nei da’umo Iehova gururu‐mere na’u Iosepaido hiwohiwoito pakeha naibaha o’uro wia nouido nou naiba aro; Taibua, keke mere mamumu taiubuaimama, Aigopitoito ta’ubi; ina rieibi nouowa tamidioubi do’o mo wade arowa. Mabu nouri Herodaro keke mere aiwauro‐omohoi, owotoi. 14Wia nou ta’uwa nou daiibuo, keke mere mamumu duowa nouro naibaha itoraimama, Aigopitoito naibaha o’ubumo. 15Ina nou nouowa emidiotuti Heroda kemidio hiwio’i auwoha; kiao wade naiheha iwai, nouri kiao wade Iehova peroveta dubu puroito naiba aro: Aigopitoudo mo mere moro tau notua. 16Ina Heroda, nou ta’uwa nou umo naibaha oitiwa imini mea oubi neiio nouido naibaha omobuodiowaumo, nou tiaha heauwo gema oiti wia korowoto oubi nouro naibaha itiodoi wia keke ohio auwoha neiio naibaha iwotowaumo Betelehemawa wia Betelehema hapuowa kemidio ohiobaio’i, konobo neewa mere’i wia na’u konobo mere’i wia bamu bamu, naiba nouri konobo Heroda meaha taiba waiti, imini mea oubi’i nei mabudo. 17Nou ta’uwa Ieremaia, na’u peroveta dubu, nou himia kiao wade naiheha oiti. Nouro tau aro:
18Eamo gema Ramawa oubio tau orowaumo;
Idebi irotutiwaumo wia eamo imakakaitutiwaumo;
Rahela nou himia mere idebi imetutiwa wia kemadohuti wade’i nou niro biahai,
Nouri nou mere keke auwoha tau oropoiio.
19Ina nou ta’uwa Heroda idaihiai, Iehova gururu mere na’u Iosepaido hiwohiwoito pakeha naibaha o’uro. 20Nou nouido aro, Taiiboa wia keke mere mamumu taiobuaimama wia Isaraela batibatito naibaha o’ubumo, mabu nouri, keke mere kiwoto niro oubii nei tau oroihiumo. 21Wia nou daibua, ina keke mere wia nou mamuro nou naibaha ebai wia Isaraela batibatito naibaha o’ubumo. 22Ina nou umo naibaha oiti, Akelao nou Iudaia pai‐duburi, Heroda nou abea’i nou batii nou emidai; batii noito nou o’u tore wia nou ta’uwa Iehova hiwoito nouido naibaha adohiomai, nouro Galilaia batibatito naibaha etebeai; 23wia na’u oopo’i noito, paina Nasareta nou airo’u wia nou nouowa emidiotuti, nouri peroveta kiao wade naiheha iwai, nei naibaha aromo, Neiio nou paina aiwaimo‐idodoi Nasareta duburi.
ప్రస్తుతం ఎంపిక చేయబడింది:
Mataio 2: KXW1941
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Published by the British and Foreign Bible Society in 1941.
