Madius 9
9
1IS aridjai aien an nelcau, um apan an taka uarin, um apahai an nuarin-pece o un. 2Eris imyiapan ehelen natimi is ethi is emehe aien va napalse, eris atijai yin an nitai ahled: is wat ecetai nimyiisjis ninivaijec ura a Iesu, is ika aien ehele natimi emehe va napalse, Ak inhal unyak, namu imyiacitak aiek; eh mun iknipagki nedo has unyum. 3Ja is ika inliinmopoi ilpu ahaiji atimi esege, Et asan tas has esjilid a nat eigki. 4Is ato naktaktai ura a Iesu, um ika, Eka auri aijaua par aktaktai has anliinmopomia? 5et tup upene nikavaig, Eh mun iknipagki nedo has unyum; ka nikavaig, Atidai aiek, um atga? 6ja, mika aki ato aijaua, nikavaig, et emda a Inhal o natimi an nobohtan par iknipagki nedo has, (is ika aien ehele natimi emehe va napalse,) Atidai aiek, um leh nitai ahled unyum, um atga unyum, um apan an neom unyum. 7Is um atidai aien, um atga o un, um apan an neom o un. 8Eris wat almoi natimi is ahinag, eris imyiali ara, um imyiahpas Atua va nedo o un, nikavaig, is ati nemda ineigki aien ehele atimi.
9Is ahes eahki a Iesu um atga o un, um ecet natimi is ethi nidan Madius, is ateuc aien an neom asjapicnaig mune iran: is ika ehelen aien, Ahced nyak aiek. Is um atidai aien, um ahced yin. 10Is wat ateuc a Iesu anliin neom um hag, eris apan ehelen a ilpu atimi akwanaham is ahinag im ilpu atimi auatatimi, um ateuc ehelen im lep ilpu atimi atahaijeg yin.
11Eris wat almoi a ilpu Farisi, eris ika ara ehele ilpu atimi atahaijeg yin, Et auri a Natimi esege unyimia par ehrihag aien im ilpu atimi akwanaham im ilpu atimi auatatimi? 12Is wat atahaijeg a Iesu, is um ika ehele ra aien, Er eti ika ehele natimi atipagki nemehe yi aminjinai ra era cehcehe ara, ja ara ache era emehe ara. 13Akumu apan aijaua, um ato nesgan tas ineigki, nikavaig, “Ek merit ainyak va nedo aiheuc va atimi, jam eti merit va niji itai ahlap:” kis eti ham ainyak par ahlaig vai ilpu atimi upene, ja vai ilpu atimi auatatimi ache, mika eri adumoij anliinmopura ara.
14Eris apan ehelen a ilpu atimi atahaijeg Joanes, um ika, Ecra auri aijama im ilpu Farisi par ehcahinag atwakam, ja era eti atwakam a ilpu atimi atahaijeg euc? 15Is um ika ehele ra a Iesu, Et ehka vai ilpu laig o natimi leh ehgan nohocredvaig, an namen u natimi leh ehgan ehele ra; ja etpu yetpam nadiat iji ehki, uhu wit atipagki natimi leh ehgan ehele ra, erupu atwakam ara an naopan iyehki. 16Et eti ijei pan inuarin napelumai mat tah natimi an mohtan napelumai; va yi jim ruhra mohtan napelumai va nuarin napelumai mat, um ahpati alupas. 17Era eti atladoi waina mat natimi irai hubej itu acen; va yi jim atpoijej inhubej, um elel waina, um has inhubej: ja era atladoi waina mat ara irai hubej mat, et par upene ehro.
18Is wat tas aien irai tas iji eigki ehele ra, is apan ehelen natimi alupas is ethi, um atpuse an nuhup o un, um ika, Et mun mas inhalav atahaig unyak: namu apan aiek, um atijai nikmam iran, etpu umoh aien. 19Is atidai a Iesu um ahced yin, im lep ilpu atimi atahaijeg yin.
20Im lep ineig, intakata is ethi, is emehe aien va nahlamerai u inja an mesese is twelv, is apan aien an cehen, um atcei pan intid an napelumai iran: 21is ika inliinmopon aien, El ek atcei pan napelumai iran ainyak, ekpu cehcehe ainyak. 22Is um ahidai yin a Iesu, um ecet yin, um ika, Ak intakata ineigki, namu imyiacitak aiek; na mun cehcehe aiek va nimyiisjis ninivaijec unyum. Is um cehcehe a intakata an nuarin-nadiat iyehki.
23Is wat yetpan a Iesu anliin neom o natimi alupas iyehki, um alum ilpu atimi ahlai nau, im lep ra eris ehteigtaig ara, 24is um ika ehele ra aien, Alau ijo aijaua: et eti mas natahaig ineigki, et umjeg aien. Eris um imyilav yin ara. 25Eris wat alau ijo natimi iji ehki, is apan aien, um arapse va nikman, is um atidai natahaig iyehki. 26Is apaahni intas va nedo ineigki an pece iyehki asega.
27Is ahes eahki a Iesu um atga o un, erus apitac yin natimi is ero is aupat nesganimtarau, erus ahlaig arau, um ika, Ak Mapoi Tevit, aiheuc vai cumrau aiek. 28Is wat apan aien anliin neom, erus apan ehelen natimi erahki is aupat nesganimtarau: is um ika ehele rau a Iesu, Aru imyiisjis ninivaijec nemda unyak aijaurau nagovaig nitai ineigki, ka o’o? Erus ika ehelen arau, Maiya, ak Natimarid. 29Is atcei pan nesganimtarau aien, um ika, Uhpu ago imi caurau et idivaig nimyiisjis ninivaijec unyimirau. 30Is um asalgei nesganimtarau arau; is idim acaiji rau a Iesu, um ika, Jim asuptecnaig ehelen tah. 31Ja erus wat atga urau arau, erus asupteenaig nedo o un arau an pece iyehki asega.
32Eris wat alau ijo ara, eris imyiapan ehelen natimi pop is ethi ara, is amen iran nagelo has. 33Is ahlo nagelo has ehelen aien, is um tas natimi pop: eris imyiali natimi is ahinag, um ika, Eris idim eti almoi tah nedo et idivaig ineigki an pece Isreel itu acen. 34Ja eris ika a ilpu Farisi, Et ahlo ilpu agelo has aien vai natimarid o ilpu agelo has.
35IS apan a Iesu irai iji uari-pece esjilid asega, im inuari-pece haklin, um esege irai eom alaigaheni ura, um asuptecnaig intas-upene va nelcau o Atua, um atipagki nemehe asega ira atimi im nauatialidi ira ra.
36Ja is wat alum atimi is ahinag aien, is aiheuc vai ra aien, eris auatialidi ara um tup terimterim, et idivaig siip et ti asgi. 37Is um ika ehele ilpu atimi atahaijeg yin aien, Et idim ahinag nohoai itai, ja et eti elpat natimi asjapienaig; 38akumu ugni natimi alupas ohuun nohoai itai aijaua, mika yi abraig pan ilpu atimi asjapicnai nohoan aien.
ప్రస్తుతం ఎంపిక చేయబడింది:
Madius 9: ATY1863
హైలైట్
షేర్ చేయి
కాపీ
Want to have your highlights saved across all your devices? Sign up or sign in
historic text maintained by the British and Foreign Bible Society
