Madius 10
10
1Is asjapicnaig ilpu atimi atahaijeg yin is twelv ehelen aien, um alupai ra nemda, mika eri ahlo ilpu agelo has ara, um iknipagki nemehe asega ira atimi im nauatialidi ira ra.
2Nidai ilpu apostolo is twelv iji eigki; Is uhup a Saimona, tak idan Pitrus, im Antrius etoan; im Jakobus inhal o Sebetaius, im Joanes etoan; 3im Filipus, im Bardolomius; im Tomas, im Madius natimi akwanaham; im Jakobus inhal o Alfius, im Lebius, tak idan Datius; 4im Saimona natimi leh imi ilpu Silotai, im Jutas nupu Karyot, aien aigki is aniv yin aien.
5Is abrai atimi is twelv iji ehki a Iesu, um tas ehele ra, um ika, Jim apan aijaua irai efalaig o nup urai iji taka pece, um jim apan an tah anuarin-pece o nupu Samerya: 6jam apan ehele siip ahnag irai nupu Isreel. 7Aku wit apan aijaua, um efehtas, um ika, Et ubutpotet nelcau an nohatag. 8Ago cehcehe ilpu atimi emehe aijaua, um ago adicinadicin ilpu atimi lepros, um imyianusjai ilpu atimi emesmas, um ahlo ilpu agelo has: akis tup leh aijaua, um tup ahtai: 9jim apos colt, im silver, im bras, irai cat unyimia aijaua; 10im nefehcat an nefalaig, im napelumai yi ero, im incedpai eduomia, im niseuc: er alaa natimi auritai nitai caig incan. 11Aku wit apan aijaua an tah anuarin-pece alupas, ka inuarin-pece haklin, um ahodaig, um ika, et upene nedo u di iran? um amen eahki wat uhum pan naopan iyehki aki atga unyimia aijaua. 12Aku wit apan aijaua an tah nimnim, um aiheuc va atimi amen iran. 13El et upene nedo o atameten iran, akumu asan tas upene vai ra aijaua: ja el et eti upene nedo ura, etmu adumoij ehelemia intas upene unyimia. 14Ara eri eti leh caua ara, um eti atahaijeg intas unyimia, aku wit ahes an nimnim iyehki aijaua, im inuarin-pece iyehki, wat atga unyimia, um ucjucjai obohtan irai eduomia. 15Et inivaijec ineig ek asaig ehelemia ainyak mika, Inyi tintin nohocred o nupu Sotom im nupu Comora an nadiat almoijidjid, ja etpu esjilid nohocred o nup an nuarin-pece iyehki.
16Ek abraig pan caua ainyak et idivaig siip irai iblai kuri aleg: akumu arapakau aijaua et idivaig imyiv, um erop nedo unyimia et idivaig alaupa. 17Aminjinai caua aijaua va atimi: erupu ikni caua ara u asjapicnaig u ilpu atimi alupas, erupu aredei caua ara irai com alaigaheni ura; 18uhpu imyiapan caua an nuhup o ilpu atimi alupas im ilpu atimarid vai nyak, nitai asuptecnaig imi ra im lep imi nup urai iji pece. 19Eru wit ikni caua ara, akumu jim aktaktai intas ineig aijaua aki asaig: uhpu alupai caua an nuarin-nadiat iyehki intas ineig akupu asaig aijaua. 20Eka eti tup tas aijaua, ja et ahuin tas iramia a Nesgai Etmamia. 21Etpu alwai etoan tah mika eri atgei yin, im lep inhal o un a etman: erupu atidai a ilpu hal ura um atceijai ilpu atmil ura, mika eri atgei ra: 22erupu amcel vai caua natimi asega vai nyak: aien inyi eti adumoij aien uhpu imyiatamaig yin. 23Eru wit abli caua ara an nuarin-pece inyi ethi, akumu aha pan aijaua an taka uarin: et inivaijec ineig ek asaig ehelemia ainyak mika, Akupu eti arahed ehni irai uari-pece Isreel aijaua, um imyihum pan naopan iyehki etpu ham a Inhal o natimi. 24Et eti esjilid natimi atahaijeg irai natimi esege imi yin, um eti esjilid naheca irai natimi alupas o un. 25Et upene vai natimi atahaijeg nidivai natimi esege imi yin vaig, um lep upene vai naheca nidivai natimi alupas o un vaig. Ele anvi nidai natimi alupas an neom par ika Belsebub, etpu esjilid intas has vai ilpu atimi o un. 26Jim imtitai ra aijaua: uhpu asuptecnaig niji itai asega er adahpoi; um lep ato niji itai asega er adenaig: 27nitai iji eigki ek asaig ehelemia ainyak an naupat, akumu asuptecnaig an lah aijaua: nitai iji eigki eka atahaijeg an tikgamia aijaua, akumu asuptecnaig ijinies irai eom unyimia aijaua. 28Jim imtitai ra aijaua era atgei ohu atimi ara, jam auatialidi par auahas nesgara: akumu imtitai yin aijaua et emda aien par auahas nohumia im lep nesgamia an pece has. 29Er ahtai inhaklin man et ero vai fardig et ethi; ja inyi ti etjose an nobohtan inyi ethi um eti ato a Etmamia. 30Er idim esvi numri idjinimia asega. 31Akumu jim imtitaig aijaua, eka esjilid aijaua irai hakli man et ahinag. 32Aien inyi asuptecnaig nyak an nuhup o atimi aien, ekpu asuptecnai yin ainyak an nuhup o Etmak an nohatag. 33Aien inyi ateri nyak aien an nuhup o atimi, ekpu ateri yin ainyak an nuhup o Etmak an nohatag. 34Jim aktaktai aijaua mika kis ham ainyak par ati neigpa an nobohtan: kis eti ham ainyak par ati neigpa, ja kis ham ainyak par ati nedoa. 35Kis ham ainyak par etinohun nehti jipe atimi, etpu edemda a inhal o un tah vai etman, im inhalav atahaig o un tah vai risin, im intakata vai risi natamnyu un. 36Erupu edemda vaig tah a nup uran nimnim o un. 37Aien et aiyu alupas inliinmopon aien vai etman im risin, jam aiyu tintin inliinmopon vai nyak, et eti upene vai nyak aien: aien et aiyu alupas inliinmopon aien vai inhalav atamaig o un im inhalav atahaig o un, jam aiyu tintin inliinmopon vai nyak, et eti upene vai nyak aien. 38Aien et eti apos nauincai atgeig o un aien, um apitac nyak, et eti upene vai nyak aien. 39Aien et imyicoho yin aien, inyi mas aien: aien inyi mas aien vai nyak, etpu leh nitai umoh iran aien. 40Aien et leh caua aien, et leh nyak aien; aien et leh nyak aien, et leh yin aien is abrai nyak aien; 41aien et leh tah naprofeta aien an nidai naprofeta, etpu leh nimtan va naprofeta aien; aien et leh tah natimi upene aien an nidai natimi upene, etpu leh nimtan vai natimi upene aien; 42aien inyi aluman tah irai ilpu atimi upoupo iji eigki inwai aheyuyu ache an nipjinitai aien an nidai natimi atahaijeg nyak, et inivaijec ineig ek asaig ehelemia ainyak mika, etpu leh nimtan imi yin aien.
ప్రస్తుతం ఎంపిక చేయబడింది:
Madius 10: ATY1863
హైలైట్
షేర్ చేయి
కాపీ
Want to have your highlights saved across all your devices? Sign up or sign in
historic text maintained by the British and Foreign Bible Society
