Luka 24
24
Uhindukilo wa Yesu
(Tala nawa Mat 28:1-10; Mar 16:1-8; Yoa 20:1-10)
1Chichamene cheswe mu lumingu,#24:1 lumingu: tangwa litangu lia semana. mapwo yaaya ku fuka, yaambata yuma ya vumba libema yize alulikile. 2Yaawana liwe halilangumuna ku fuka, 3yaanjila, alioze mujimba wa Mwene Yesu kaauwanyine mo. 4Muze te anayambashana, malunga aali yaasolokela ni mahina akubeyima. 5Mapwo waze yeevwa woma unji nikuhetama hashi. Malunga waze yaamba ngwo: “Kuchi mba nunafupu mukwa mwono mukachi ka afu? 6Amuno keshimo, hahinduka. Iwulukenu chize anwambile muze te achili mu chifuchi cha Galilea, ngwenyi: 7‘Chatamba kukunjika Mwana Mutu#24:7 mwana MUTU: tala 5:24. ku moko ja yivulumunyi akamuhate ha kulusu, mba ha tangwa lia muchitatu kumakahinduka.’ ”
8Hohene yeewuluka maliji ja Yesu, 9yaakatuka ku fuka, yaaya ni kwambulwila tumbaji kumi ni kashi, ni akwo eswe yuma yize. 10Mapwo waze majina jo: Maria Kamandala, ni Yoana, ni Maria naye ya Tiangu (Jake). Wano hamwe ni mapwo akwo yaambulwila tunganda twa Yesu. 11Alioze e tunganda yaanyonga ngwo, yeswe yize ambulwile yili yuma ya mahuza, kaafulielele ko. 12Alioze Petulu yakatuka, yazomboka fuji ku fuka, yahetama, kamwene nichimwe shina mahina atoma, mba yahiluka ku mahienyi nikulishimwoka ha yize yeswe.
Yesu yasolokela tumbaji aali mu jila ku Emause
(Tala nawa Mar 16:12-13)
13Ha tangwa lizeliene, aali Hakachi ko yaaya ku limwe limbo, jina lialio Emause. Chabwile ngwe kilometro kumi ni yimuwika ku Yerusaleme. 14Te kaanalihanjekesa ha yize yeswe yabwile. 15Shimbu te analihanjekesa ni kulihula, Yesu iye mwene yakundama, yaya hamwe no. 16Yaamumona, alioze chimwe Chuma chaakinjile ha kumunyingika. 17Yesu yaahula ngwenyi: “Yika nunalihula muze nunende?” No yaamana kikilii nikuhombola ku meso. 18Umwe hakachi ko, jina lienyi te Kleofase, yamuhula ngwenyi: “Kuma yena wika mu Yerusaleme kuwanyingikine yuma yize yinakabwa mo matangwa wano, nyi?” 19Yahula ngwenyi. “Yuma yika?” No yaamukumbulula ngwo: “Yize ya Yesu Kanazare, te mukwa munanyi wa Zambi wa ndundo ku yitanga ni ku maliji ku meso ja Zambi ni ku meso ja atu eswe. 20Mahako a lutwe ni makulwana jetu anakamukunjika ha kumushiha ni kumuhachila ha kulusu. 21Tunakasa mbunge ngwetu, kali yoze makula Aisraele. Alioze kuwezela ku yino yeswe, musono lie tangwa lia muchitatu chize ku kabutu ka yuma yino. 22Amwe mapwo a ku mbunga yetu atushimwokesanga. Kaayanga chichamene cheswe ku fuka, 23alioze kaamwene mujimba wenyi. Yaahiluka ni kutwambulwila ngwo: Twamona Usolwelo wa tunganda a mwilu waze atwambulwilanga ngwo: ‘Kali ni mwono.’ 24Amwe a ku mbunga yetu kaayanga ku fuka, kaamonanga yeswe ngwe chize ambanga mapwo, alioze Yesu kaamumwene.”
25Mba Yesu yaamba ngwenyi: “Mhmm, yenu atu kunushi malinjekela, nuli akwa kukokoloka ha kufuliela yize yeswe ambujolele akwa munanyi a Zambi! 26Kuchatambile Chilamwina yoze Zambi alakenyene kwivwa lamba ngwe chino ni kunjila mu uhenya wenyi, nyi?” 27Mba Yesu yaalumbunwina Mukanda wa Zambi weswe hakutwala kuli iye mwene, butu ku Mikanda ya Mose ndoo ku mikanda yeswe ya akwa munanyi a Zambi.
28Muze haakundama ku limbo kuze te anayi, Yesu yalinga ngwe kanahiana. 29Alioze yaamushinjila ngwo: “Tweya ubombe, mumu tangwa hiliaya ni ufuku hiweza.” Neye yanjila no. 30Yatwama ku mesa hamwe no, yanda mbolo, yasakwila Zambi, yabalula mbolo, mba yaaha yo. 31Hohene meso jo yaalaula, yaamunyingika. Alioze yatoka ku meso jo. 32No yaalihanjikisa ngwo: “Mbunge jetu kujevwile kahia muchima lietu muze te anatuhanjikisa mu jila ni kutulumbunwina Mukanda wa Zambi, nyi?”
33No yaakatuka hazehene, yaahiluka ku Yerusaleme, yaawana kumi ni kashi kaanalikungulula hamwe ni akwo, 34waze te anambe ngwo: “Chamwenemwene Mwene hahinduka! Kasolokelanga Simone!” 35Ni ayo nawa yaambulwila yize yabwile mu jila, ni chize anyingikine Yesu ha shimbu lize abalwile mbolo.
Yesu yasolokela tumbaji twenyi
(Tala nawa Mat 28:16-20; Mar 16:14-18; Yoa 20:19-23; Yil 1:6-8)
36Shimbu maachihanjika, Yesu mwene yasoloka mukachi ko, yaamba ngwenyi: “Hwimenu mbunge.” 37Tumbaji yaatungumuka, yeevwa woma, mumu anyongene ngwo, mujimu anamono. 38Alioze Yesu yaamba ngwenyi: “Kuchi kevwe nunalibikala? Kuchi mba nunayambashana mu mbunge jenu? 39Talenu moko jami ni molu jami. Yami mwene. Ngupapatenu nutale, mumu mujimu keshi musunya ni yifwaha ngwe chize nunangumono nayo yami.” 40Yamba maliji wano, mba yaalweza moko jenyi ni molu jenyi. 41Chibwe chocho hindu kaafulielele ko, yeevwa chiseke chinji ni kulishimwoka. Ha chino, Yesu yaahula ngwenyi: “Nuli ni chimwe Chuma hano cha kulia, nyi?” 42Yaamwaha Chipinji cha yishi wakwocha. 43Neye yachitambula, yachilia ku meso jo.
44Mba yaamba ngwenyi: “Wano e maliji nanwambile muze nabwile hamwe ni yenu, ngwami, yize yeswe yasonewene hakutwala kuli yami mu Shimbi ja Mose, ni mu mikanda ya akwa munanyi a Zambi, ni Miaso (Masamu) chatamba yikamanunuke.” 45Mba yaakwasa hanga anyingike Mukanda wa Zambi, 46yaamba ngwenyi: “Chenacho hichinasonewa ngwo: Chilamwina yoze Zambi alakenyene chamutamba kumona lamba, ni kuhinduka ku kufwa ha tangwa lia muchitatu. 47Ni chatamba kwambujola mu jina lienyi sango jino kuli mavungu eswe butu ku Yerusaleme. Ngwenu: ‘Alumukenu ku mbunge, mba Zambi manukonekena milonga yenu.’ 48Yenu nuli yela ja yuma yize. 49Mungukanutumina yami mwene chawana chize Tata hanalakenya. Alioze chanutamba kushimbwila ku limbo ndoo ndundo ja mwilu mujinuhulumukina.”
Yesu yazezuka mwilu
(Tala nawa Mar 16:19-20; Yil 1:9-11)
50Mba Yesu yaatwala haze lia limbo ndoo ku chihunda cha Betania.#24:50 betania: tala 19:29. Kwenako yolola moko, yaawahisa. 51Shimbu te maachawahisa, yalihandununa no, yamuzundula kwilu. 52Alioze ayo yaamuwayila, yaahiluka ku Yerusaleme, ni chiseke chinji. 53Matangwa eswe yaabwabwa mu zuwo lia Zambi ni kuchichimieka Zambi.
ప్రస్తుతం ఎంపిక చేయబడింది:
Luka 24: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
