Yoano Maliji Atangu
Maliji Atangu
Mukanda uno unashindakenya ngwo, Yesu lie Liji lia ku miaka yeswe lia Zambi, lize lialumukine mutu yoze watwamine mukachi ketu. Yoano yasoneka Sango jino Jibema hanga akwa kutanga afuliele ngwo, Yesu mwe Chilamwina yoze Zambi alakenyene, mwe Mwana Zambi, ni hanga ku ufulielo uno, maahasa kubwa ni mwono (20:31).
Muze halumbununa ngwenyi, Yesu lie Liji Iia ku miaka yeswe, Yoano kanatulweze yilayi yeka ni yeka ya Yesu yize yinashindakenya ngwo, Yesu kali Chilamwina yoze Zambi alakenyene, kali mwe Mwana Zambi. Mwabwamuze kanatulweze longeso lia Yesu lize linalumbununa yilayi yize, tunamono nawa chize atu amwe anafuliela Yesu ni anamukaula, alioze akwo kaanalituneye ni kaanalimika nenyi. Mu tuputulu 13-17 tunamono kulivwa chinene mukachi ka Yesu ni tumbaji twenyi ha ufuku uze amukwachile, ni tunevu chize anaakolesa muze akwa kole jenyi anambe kumuhata ha kulusu. Tuputulu akusula kaanalumbununa chize akwa kole amukwachile, ni amusopesele, ni amuhachile ha kulusu, ni chize Yesu ahindukile ni asolokele kuli tumbaji twenyi.
Sango ja pwo yoze wakwachikile mu utanji (8:1-11) twajikasa […] mumu yisoneko yikwo yikulu kuyishi najo, ni yisoneko yikwo yinajise sali lieka.
Yoano kanashindakenya ngwenyi, mwono wa miaka yeswe muli Kristu, uli chawana, ni wakubutula haliabwila. Atu waze akutayiza Yesu ye jila, ni we umwenemwene, ni we mwono, e akubwa nawo. Mu mukanda uno tunatange chize Yesu akutakenya yuma ya hano hashi (ngwe meya, ni mbolo, ni ndeya), ni yikuma ya uzambi.
Yikuma yinene
1. Maliji atangu 1:1-51
Lie Liji lia mwono 1:1-18
Lie longeso lia Yoano Chipapachisa 1:19-34
Tumbaji atangu a Yesu 1:35-51
2. Milimo ya Yesu 2:1—12:50
3. Matangwa akusula ku Yerusaleme 13:1—19:42
4. Uhindukilo wa Mwene Yesu Kristu ni kusoloka chenyi 20:1-31
5. Maliji akusula: Mwene Yesu Kristu yasoloka nawa mu Galilea 21:1-25
ప్రస్తుతం ఎంపిక చేయబడింది:
Yoano Maliji Atangu: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.