Yoano 5
5
Yesu yawuka mweji ku chitende cha Betzata
1Kulutwe lia yuma yize, yikubwa chiwanyino cha Ayuda. Kashika Yesu yaya ku Yerusaleme. 2Mu limbo, hakamwihi ni chikolo cha Mapanga, chitende chili ko chikwete yisambwe yitano, chize akuvuluka mu hebreu ngwo, Betzata. 3Mu yisambwe yino, mieji anji te akubomba mo: tupuputa, ni yitonji, ni akwa mijimba yasosewa. [Atu te kaakushimbwila kufuza cha meya, 4mumu yisuho yikwo kanganda ka mwilu te kakuhulumuka mu chitende chize ha kufuza meya. Muze meya maafuza, mweji mweswe yoze malianga kunjila, mahinduka, chibwe weswe musongo te akwete.] 5Yikubwa umwe mutu te kayiza miaka makumi atatu ni nake. 6Muze Yesu hamumona kanabombo, yanyingika ngwenyi, habwa kulu ni musongo miaka yinji. Mba yamuhula ngwenyi: “Unazange kubwa mungunu, nyi?” 7Mweji ngwenyi: “Mwata, Chishi ni mutu yoze mangunjisa mu chitende ha kufuza cha meya. Muze mungweseka kunjila, mukwo mapalumuka kulutwe liami.” 8Yesu yamwamba ngwenyi: “Katuka, anda muhela we, yako kwe.”
9Shimbu lizeliene lume, mwe mutu yahinduka, yanda muhela wenyi, yabutuka kwenda.
Te tangwa lia kuhwima lia Ayuda. 10Kashika Ayuda yambila mutu yoze ngwo: “Musono tangwa lia kuhwima. Kuchalitele ni Shimbi kumbata muhela we.” 11Neye yaakumbulula ngwenyi: “Yoze wanguwukanga mwenawo wangwambanga ngwenyi: ‘Anda muhela we, yako kwe.’ ” 12No yaamuhula ngwo: “Haa! Iya yoze wakwambanga ngwenyi: ‘Anda muhela we, yako kwe’?” 13Alioze yoze wahindukile kamunyingikine ko, mumu mbunga yinene abwile ko, ni Yesu te haya.
14Kulutwe Yesu yamutakana mu zuwo lia Zambi lia Ayuda, yamwamba ngwenyi: “Tala, hiwahinduka, kanda uvulumuna nawa. Nyi ka, Chuma chibi chahiana muchikuwana.” 15Mwe mutu yaya, yambila Ayuda ngwenyi: “Mutu yoze wanguwukanga kali Yesu.” 16Kashika Ayuda yaabutuka kuhungumiona Yesu, mumu wachilingile ha tangwa lia kuhwima. 17Yesu yaamba ngwenyi: “Tata kakulinga matangwa eswe, kashika ni yami nawa nakulinga.”
18Kashika Ayuda yaafupa kuhiana kumushiha. Hi ha kushiha Shimbi ya tangwa lia kuhwima wika ko, alioze nawa mumu yamba ngwenyi, Zambi kali lume Tato, nikulitesa ni Zambi.
Chiyulo cha Mwana Zambi
19Mba Yesu yaakumbulula ngwenyi: “Chamwenemwene ngunanwambulwila ngwami, mwe Mwana keshi kulinga nichimwe iye mwene. Kakulinga chize akumona kuli Tato. Yize yeswe Tata akulinga, ni mwe Mwana kakuyilinga. 20Mumu Tata kakuzanga mwe Mwana. Kakumulweza yize akulinga iye mwene. Makamulweza nawa yitanga yikwo yinahiana yino. Munukalishimwoka, 21mumu ngwe chize Tata kakuhindwisa afu ni kwapwisa ni mwono, chimuwika nawa mwe Mwana neye kakupwisa ni mwono waze anazange. 22Tata keshi kubatwila mutu niumwe, alioze hanakunjika chiyulo cheswe cha ubatwilo kuli mwe Mwana, 23hanga atu eswe akalemese Mwana ngwe chize akulemesa Tata. Yoze keshi kulemesa Mwana, keshi kulemesa Tata yoze wamutumine.
24“Chamwenemwene ngunanwambe ngwami, yoze wakwivwa maliji jami ni kufuliela yoze wangutumine, mwono wa miaka yeswe ali nawo. Kechi kamuhisa, alioze hahinduka kulu ku kufwa, habwa ni mwono. 25Chamwenemwene ngunanwambe ngwami, ola muyiza, hiyeza kulu, muze afu maakevwa liji lia Mwana Zambi, ni muze maakalivwa, maakabwa ni mwono. 26Mumu Tata chiyulo akwete cha kupwisa atu ni mwono, chimuwika nawa hanakunjika chiyulo kuli Mwana cha kupwisa atu ni mwono. 27Hanakunjika nawa kuli Mwana chiyulo cha kubatwila, mumu iye mwe Mwana Mutu#5:27 mwana mutu: tala 1:51. 28Kanda nulishimwoka, mumu ola muyikeza muze afu eswe waze ali mu mafuka, maakevwa liji lienyi. 29Maakatuhuka mu mafuka jo. Waze alingile yibema kumaakahinduka ni kubwa nawa ni mwono, alioze waze alingile yibi kumaakahinduka ha kwahisa.”
Shindakenyo hakutwala kuli Yesu
30“Chishi kuhasa kulinga nichimwe ukawami. Nakubatwila nikulita ni chize nakwivwa. Ubatwilo wami wa ululi, mumu Chishi kulinga chize ngunazange alioze chize anazange yoze wangutumine.
31“Nyi nakulishindakenya yami mwene, kachi yize mungwamba atu keechi kuyalula. 32Alioze mukwo uliko yoze wakungushindakenya. Ngunanyingika ngwami, kakushindakenya ni umwenemwene. 33Hinunatumina Yoano tunganda. Neye hanashindakenya hakutwala ku umwenemwene. 34Alioze Chishi kushachila ha shindakenyo ya mutu. Chino ngunambe hanga nuhase kulilamwina. 35Yoano wabwile ngwe ndeya yakuwika yize yinapanguka. Nwawahililile ni kubwa nenyi shimbu likepe. 36Alioze nguli ni shindakenyo yahiana yize ya Yoano. Yitanga yize nakulinga, yize Tata anguhele kulinga, yakungushindakenya, yakulweza ngwo, Tata wangutumine. 37Mwe Tata, yoze wangutumine, hanangushindakenya nawa. Kunwevwile kama liji lienyi nilimwe tangwa, kunwamwene kama meso jenyi nilimwe tangwa. 38Kunushi kufunga maliji jenyi, mumu kunushi kufuliela yoze atumine. 39Nwakuhengula mu Mukanda wa Zambi, mumu mwenamo nunashinginyeka kubwa ni mwono wa miaka yeswe. Wenawo wakungushindakenya. 40Alioze kunusolo kwiza kuli yami hanga nukabwe ni mwono.
41“Chishi kufupa lufuma wa atu, 42alioze ngunanunyingika. Ngunanyingika ngwami, kunushi kuzanga Zambi mu mbunge jenu. 43Yami hinguneza mu jina lia Tata, kunusolo kungutambula. Alioze nyi umwe mukwo meza mu jina lienyi mwene, munukamutambula. 44Nwakuzanga kulifumanyisa yenwene. Kunushi kufupa lufuma wa Zambi, mba ngwe kuchi munuhasa kufuliela? 45Alioze kanda nunyonga ngwenu, yami mungunusuma mulonga ku meso ja Tata. Mose, hali yoze nwakushachila, mwe makanusuma. 46Nyi chamwenemwene nwafulielele Mose, kachi ni yami munungufuliela, mumu iye hanasoneka hakutwala kuli yami. 47Nyi kunushi kufuliela yize hanasoneka, ngwe kuchi munufuliela yize ngunambe?”
ప్రస్తుతం ఎంపిక చేయబడింది:
Yoano 5: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
