Yoano 4
4
Yesu ni pwo wa ku chifuchi cha Samaria
1Afariseu#4:1 AFARISEU: tala 1:24. yeevwa atu nikwamba ngwo: “Yesu kakupwisa ni kupapachisa tumbaji anji kuhiana Yoano.” 2(Kafwa, Yesu iye mwene kapapachishile niumwe, tumbaji twenyi wika te akupapachisa atu.) 3Muze Yesu achivwile, yakatuka ku chifuchi cha Yudea, yahiluka ku chifuchi cha Galilea.#4:3 GALILEA: tala 2:1. 4Ha kuya ko, chamutamba kubalikila mu chifuchi cha Samaria.#4:4 SAMARIA: chifuchi mukachi ka Yudea ni Galilea. Ayuda ni Asamaria te keeshi kulizanga mumu ha kulituchika mukachi ko hakutwala ku vungu, ni ndako, ni ufulielo.
5Yaheta ku limwe limbo lia mu Samaria, jina lialio Sikare.#4:5 SIKARE: kota Shekeme (Ubu 33:18-19), mukachi ka mulundu wa Gerizime ni mulundu wa Ebale, hanji limbo lia Askare kilometro 1 ku norde ya shima lia meya lia Yakoba. Chasulangana ni munda uze Yakoba ahanyine kuli mwanenyi Josefe. 6Yikubwa shima lia meya lia Yakoba. Yesu te hahonga mumu ha wenyi, yatwama ku sesa lia shima, tangwa ha muchima.
7Umwe pwo wa ku Samaria yeza ni kutaha meya. Yesu yamwita ngwenyi: “Ngwehe kama meya a kunwa.” 8(Tumbaji twenyi te haaya ku limbo ni kulanda yakulia.) 9Pwo, Kasamaria, yahula Yesu ngwenyi: “Mhmm! Ngwe kuchi yena Kayuda unangwichi yami Kasamaria meya a kunwa?” (Mumu Ayuda ni Asamaria te keeshi kulikata.) 10Yesu ngwenyi: “Ehee! Nyi kuwanyingika chawana chize Zambi akuhana kuli atu, nawa nyi kuwanyingika yoze unakwichi meya a kunwa, kachi wamwita, neye makwaha meya a mwono.” 11Pwo ngwenyi: “Mwata, chikashi kuushi nacho, ni shima kuliajotoka. Kulihi muuwana meya a mwono? 12Kaka yetu, Yakoba, watuhele shima lino te akunwina iye mwene, ni ana jenyi, ni yimuna yenyi. Yena uli munene Wahiana Yakoba, nyi?” 13Yesu ngwenyi: “Mweswawo manwa meya wano mevwa nawa pwila, alioze mweswawo manwa meya waze mungumwaha, kechi kevwa nawa pwila nichimwe ndoo ku miaka yeswe. 14Mumu meya waze mungumwaha maakavelwoka muli iye ngwe mu shima lia meya a mwono wa miaka yeswe.” 15Pwo ngwenyi: “Mwata, ngwehe kama meya wano, hanga chichi kevwa nawa pwila, chibwe chichi keza nawa kuno ni kutaha.”
16Yesu ngwenyi: “Yako utambike lunga lie, mba uhiluke nawa kuno.” 17Pwo ngwenyi: “Lunga Chishi nenyi.” Yesu ngwenyi: “Hiwamba kanawa ngwe: ‘Lunga Chishi nenyi.’ 18Mumu wabwile ni malunga atano, ni yoze uli nenyi haliabwila hi lunga lie ko. Chamwenemwene wamba.” 19Pwo ngwenyi: “Mwata, ngunamono ngwami, uli mukwa munanyi wa Zambi. 20Akaka jetu, Asamaria, te kaakuwayila Zambi ha mulundu uno.#4:20 mulundu UNO: mulundu wa Gerizime. Alioze yenu Ayuda nwakwamba ngwenu: ‘Ku Yerusaleme kwe kuma kwatela kuwayila Zambi.’ ” 21Yesu ngwenyi: “Mama, ngufuliele ngwami, tangwa mulikeza lize kunuchi kawayila Tata ha mulundu uno hanji ku Yerusaleme. 22Yenu Asamaria kunwanyingikine chize nwakuwayila. Yetu Ayuda tunanyingika chize twakuwayila, mumu ulamwino wa kuli Ayuda. 23Alioze ola muyiza ni hiyeza kulu, yize akwa kuwayila amwenemwene maawayila mu mbunge ni mu umwenemwene, mumu Tata kakuzanga akwa kumuwayila ngwe waze. 24Zambi kali Mwiku, ni waze akumuwayila chaatamba kumuwayila ni tachi ja Mwiku wa Linanga ni mu umwenemwene.”
25Pwo ngwenyi: “Ngunanyingika Chilamwina yoze Zambi alakenyene makeza, yoze anavuluka ngwo: Kristu. Muze makeza makatulumbunwina yuma yeswe.” 26Yesu ngwenyi: “Yami, ngunahanjika ne, nguli Chilamwina yoze.”
27Ha shimbu lize, tumbaji twa Yesu yaaheta, yaalishimwoka ha kumona kanahanjika ni pwo. Alioze niumwe wa kuli ayo wahamukine kuhula pwo ngwenyi: “Yika unazange?” hanji kuhula Yesu ngwenyi: “Kuchi mba unahanjika nenyi!”
28Mwe pwo yahichika mulondo wenyi wa meya, yahiluka ku limbo yambulwila atu ngwenyi: 29“Tweyenu nutale mutu yoze wangwambulwilanga yeswe yize nalingile. Yono hi Chilamwina ko yoze Zambi alakenyene, nyi?” 30No yaatuhuka mu limbo yaaya kuli Yesu.
31Shimbu lize tumbaji yaaliumba kuli Yesu ngwo: “Longeshi, lienu kama.” 32Alioze Yesu ngwenyi: “Yakulia nguli nayo yize kunwanyingikine.” 33Tumbaji yaalihula ngwo: “Umwe wamunehenanga yakulia, nyi?”
34Yesu yaamba ngwenyi: “Yakulia yami yino: Kwononokena upale wa yoze wangutumine ni kumanununa milimo yize anguhele kulinga. 35Nwakwamba ngwenu: ‘Kwasala tukweji awana, mba mwaka wa kubatula mihuko muuheta,’ nyi? Alioze ngunanwambe ngwami, talenu ku minda, mihuko hiyahia, mwaka hiwaheta kulu ni kuyibatula. 36Yoze wakubatula mihuko kakutambula fweto yenyi, ni kakukungika mbuto mumu ha mwono wa miaka yeswe. Chenacho yoze wakutumba ni yoze wakubatula kaakuwahilila hamuwika. 37Mumu chishima chize akuta chili chamwenemwene ngwo: ‘Umuwika kakutumba, mukwo kakubatula mihuko.’ 38Hingunanutumu kubatula mu minda yize kunwalimine. Akwo haanalimi, ni yenu hinunayuku ku milimo yo.”
39Anji a kuli Asamaria a mu limbo lize yaafuliela Yesu mumu pwo yoze washindakenyene ngwenyi: “Kangwambanga yize yeswe te nakulinga.” 40Mba muze Asamaria ahetele kuli Yesu, yaamulembejeka hanga atwame hamwe no. Neye yatwama ko matangwa aali.
41Anji kuhiana yaamufuliela mumu ha yize ambile iye mwene. 42No yaambila pwo ngwo: “Haliabwila twafuliela, hi ha yize ko wambululanga yena, alioze mumu hitwamwivwa yetwene. Tunanyingika ngwetu, chamwenemwene kali mwe Chilamwina cha akwa hashi.”
Vesu yawuka mwana wa mukwa kuyula
43Kulutwe lia matangwa aali, Yesu yakatuka ko, yaya ku Galilea,#4:43 GALILEA: tala 2:1. 44mumu Yesu iye mwene yashindakenya ngwenyi: “Mukwa munanyi keeshi kumulemesa mu chifuchi chenyi mwene.” 45Muze ahetele ku Galilea, akwa chifuchi yaamutambula kanawa, mumu ni ayo ene nawa te kanayi ku Yerusaleme, ku chiwanyino cha kwiwuluka Kubalika, ni yaamona yeswe yize Yesu alingile ku chiwanyino chize.
46Yesu yahiluka ku limbo lia Kana#4:46 KANA: tala 2:1. mu Galilea, kuze alumwinyine meya kubwa vinyu. Yikubwa umwe mukwa kuyula mu limbo lia Kafarnaume,#4:46 KAFARNAUME: tala 2:11. mwanenyi te kali ni misongo. 47Ha kwivwa ngwo, Yesu hakatuka ku Yudea, heza ku Galilea, mwe mukwa kuyula yaya kuli Yesu nikuliumba ngwenyi: “Tweya kama ku Kafarnaume hanga uwuke mwanami, kanambe kufwa.” 48Yesu yamwamba ngwenyi: “Nyi kunwamwene yilayi ni yikomokeso, kunuchi kufuliela.” 49Mukwa kuyula yamukumbulula ngwenyi: “Mwene, tweya ku mahiami, shimbu mwanami kanda achifwa.” 50Yesu ngwenyi: “Yako kwe, mwane kumahinduka.” Mutu yafuliela yuma yize amwambile Yesu, yaya kwenyi. 51Muze te achili mu jila, tuvumbi twa ku zuwo lienyi yeeza ni kumwambulwila ngwo: “Mwane hahinduka.” 52Neye yaahula ngwenyi: “Ha ola yika mwana anakabutuka kwivwa kanawa?” Ayo ngwo: “Kachiki kanakamukatuka zau ha ola yitangu ya chingoloshi.” 53Mba tato yewuluka ngwenyi, ha ola yizeyene Yesu anakamba ngwenyi: “Mwane kumahinduka.” Kashika iye ni akwa zuwo lienyi eswe yaafuliela.
54Chino che chilayi cha muchaali chize alingile Yesu muze hakatuka ku Yudea ni haheta ku Galilea.
ప్రస్తుతం ఎంపిక చేయబడింది:
Yoano 4: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
