Génesis 9
9
Xuc'ul bʌ i t'añ Dios yic'ot Noé
1Dios tsi' yʌq'ue i yutslel i t'añ Noé yic'ot i yalobilob, tsi' su'beyob: “La' tilic la' p'olbal, la' p'ojliquetla, but'ula jiñi pañimil.#Gn 1.28 2Mi caj i bʌc'ñañetla pejtelel bʌte'el ti pañimil yic'ot pejtelel xwejlel mut, yic'ot pejtelel jʌlʌcña bʌ mi' majlel ti lum, yic'ot chʌy tac am bʌ ti mar; ti pejtelel mi cʌq'ueñetla ti la' wenta. 3Pejtelel cuxul tac bʌ mu' bʌ ti xʌmbal, mi' mejlel la' c'ux, yic'ot ja'el jiñi pimel tac yic'ot yam bʌ i wut lum, mi cʌq'ueñetla ti' pejtelel cha'añ i bʌl la' ñʌc'.#9.3 Q'uele jiñi nota am bʌ ti Gn 1.29. 4Pero mach la' c'ux we'elʌl yic'ot i ch'ich'el, come i ch'ich'el jiñʌch i cuxtʌlel.#Lv 7.26-27; 17.10-14; 19.26; Dt 12.16,23; 15.23; Hch 15.19-20 5Come ti isujm mi caj j q'uextʌben i jontolil jiñi mu' bʌ i cha'len tsʌnsa mi bʌte'el o mi wiñic. Joñon mi caj j q'uextʌben i mul jiñi mu' bʌ i tsʌnsan i pi'ʌl.”#Gn 4.9-12; 2 Sm 12.9-10
6“Jiñi mu' bʌ i bec'ben i ch'ich'el wiñic,#Ex 20.13
mi caj i tsʌnsʌntel ja'el,#9.6 I cuxtʌlel wiñicob x'ixicob añ ti' wenta Dios, cojach Dios mi' mejlel i chilben i cuxtʌlel jiñi wiñicob x'ixicob (Ex 20.13; 21.12-14). Che' ja'el mi añ bʌte'el o mi alʌc'ʌl tsi' tsʌnsa juntiquil wiñic o x'ixic, wersa yom mi' tsʌnsʌntel ja'el (Ex 21.28-32).
come Dios tsi' mele wiñic ti yejtal.#Gn 1.26-27; 5.1
7Pero jatetla la' p'ojliquetla,
la' wen p'ojlic la' walobilob.
La' bujt'ic pañimil ti la' p'olbal.”#Gn 1.28
8Dios tsi' su'be Noé yic'ot i yalobilob: 9“Joñon mi cʌq'ueñetla xuc'ul bʌ c t'añ ti la' tojlel yic'ot ti' tojlel jiñi talto bʌ la' p'olbal; 10yic'ot ti' tojlel pejtelel cuxul tac bʌ am bʌ ti la' tojlel, che' bajche' mut tac, alʌc'ʌl tac yic'ot pejtelel bʌte'el che' bajche' jaycojt tsa' loq'ui ti barco. 11Mi caj c wa'chocon xuc'ul bʌ c t'añ yic'otetla, ma'añix mi caj chʌn jisan pejtelel cuxul tac bʌ yic'ot but'ja', yic'ot ja'el ma'añix ba' ora chʌn tal but'ja' cha'añ mi' jisan pañimil.”#9.11 Ili Xuc'ul bʌ c t'añ: Jiñʌch tsa' bʌ i mele Dios, i cha'añʌch pejtelel chuqui tac añ ti panchan yic'ot ti pañimil. Noé ma'añic chuqui añ ti' wenta mi' mel.
12Che' ja'el, Dios tsi' yʌlʌ: “Jiñʌch i yejtal xuc'ul bʌ c t'añ mu' bʌ c wa'chocon ti pejtelel ora yic'otetla yic'ot pejtelel cuxul tac bʌ am bʌ la' wic'ot: 13Mi cʌc' t'oxja' ti tocal, i yejtalʌch jiñi xuc'ul bʌ c t'añ mu' bʌ cʌq'ueñob jiñi año' bʌ ti pañimil.#9.13 Jiñi t'oxja' i yejtalʌch jiñi xuc'ul bʌ t'añ tsa' bʌ i mele Dios yic'ot Noé yic'ot pejtelel chuqui tac añ ti pañimil; ti wi'il tal tsep pʌchʌlel i yejtal bʌ xuc'ul bʌ t'añ tsa' bʌ i mele Dios yic'ot Abraham yic'ot i p'olbal (Gn 17.11-12); Jiñi q'uiñilel c'aj-o, i yejtalʌch xuc'ul bʌ t'añ tsa' bʌ i mele Dios yic'ot israelob (Ex 31.15-17). 14Che' ba' ora mic pʌy tilel tocal ti pañimil, mi caj i pʌs i bʌ c t'oxja' ti tocal. 15Che' jiñi mi caj c ña'tan xuc'ul bʌ c t'añ tsa' bʌ cʌq'ueyetla, yic'ot tsa' bʌ cʌq'ueyob pejtelel cuxul tac bʌ ti jujunchajp; ma'añix ba' ora chʌn tal but'ja' cha'añ mi' jisan pejtelel cuxul tac bʌ ti pañimil. 16Mi caj i tilel t'oxja' ti tocal; mi caj j q'uel cha'añ mic ña'tan xuc'ul bʌ c t'añ tsa' bʌ cʌq'ueyob ti pejtelel ora jiñi cuxul tac bʌ am bʌ ti pañimil.”
17Dios tsi' su'be Noé: “Jiñʌch i yejtal xuc'ul bʌ c t'añ tsa' bʌ c mele yic'ot pejtelel cuxul tac bʌ ti pañimil.”
Tsa' yʌc-a Noé
18I yalobilob Noé tsa' bʌ loq'uiyob ti barco jiñobʌch Sem, Cam yic'ot Jafet.#Gn 5.32; 6.10; 7.13; 9.18; 10.1 Cam jiñʌch i tat Canaán. 19Ili uxtiquil wiñicob jiñobʌch i yalobilob Noé. I ñojte'elobʌch pejtelel wiñicob x'ixicob ti pañimil.
20Noé tsa' caji i cha'len e'tel ti lum, tsi' pʌc'ʌ ts'usubil. 21Tsi' japbe i ya'lel ts'usub, tsa' yʌc-a, tsi' jocho i pislel, pits'il tsa' ajñi ya' ti mal pisil bʌ i yotot. 22Cam, i tat Canaán, tsi' q'uele pits'il i tat, tsa' loq'ui majlel i su'beñob jiñi cha'tiquil i yerañob año' bʌ ti jumpat. 23Che' jiñi Sem yic'ot Jafet tsi' ch'ʌmʌyob pisil, tsi' lij q'uecheyob tilel pisil ti' quejlab ti' cha'ticlel, wʌlʌc pat tsa' ochiyob, tsi' mosoyob i tat che' pits'il. Che' wʌlʌc pat añob, ma'añic tsi' q'ueleyob i tat che' pits'il. 24Che' c'ajalix i yoj Noé, tsi' yu'bi chuqui tsi' mele jiñi ijts'iñʌl bʌ i yalobil, 25tsi' yʌlʌ:
“¡La' chojquic Canaán!
¡Mux i yochel ti majtañ e'tel ti' tojlel i yerañob!”
26Tsi' yʌlʌ ja'el:
“¡La' aq'uentic Sem i yutslel i t'añ lac Yum Dios;
la' ochic Canaán ti x'e'tel i cha'añ!
27¡La' i yʌq'ueñ Dios i ñuclel Jafet,
la' chumlec ti pisil bʌ i yotot tac Sem;
la' ochic Canaán ti x'e'tel i cha'añ!”#Gn 11.10-32
28Che' bʌ ñumeñix but'ja', tsa' to jal-a Noé ti pañimil jo'lujunc'al yic'ot lujump'ejl i yuxc'al (350) ja'b. 29Ti pejtelel i ja'bilel Noé jiñʌch cha'bajc' yic'ot lujump'ejl i waxʌcc'al (950) i ja'bilel, che' jiñi tsa' chʌmi.
ప్రస్తుతం ఎంపిక చేయబడింది:
Génesis 9: NTCH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process
