Génesis 13
13
Lot tsi' tʌts'ʌ i bʌ ba'añ Abram
1Abram tsa' loq'ui ti Egipto, tsa' tili ti jiñi lum am bʌ ti Neguev, yic'ot i yijñam, yic'ot pejtelel i chu'bʌañ, yic'ot Lot.
2Abram wen ca'bʌl i chu'bʌañ, añ i yʌlac' yic'ot añ i cha'añ plata yic'ot oro. 3Tsa' ñumi tac majlel ti jiñi lum am bʌ ti Neguev c'ʌlʌl ti Bet-el, c'ʌlʌl jinto tsa' c'oti ya' ba' tsi' ñaxan wa'choco pisil bʌ i yotot, xinlʌpʌl bʌ ti' yojlil Bet-el yic'ot Hai, 4ya' ba' tsi' melbe i pulʌntib i majtañ Dios; ya'i tsi' ch'ujutesa i c'aba' lac Yum.
5Che' ja'el Lot tsa' bʌ majli yic'ot Abram, añ i cha'añ tʌñʌme', wacax yic'ot pisil tac bʌ i yotot. 6Mach jasʌlic jumpejt lum cha'añ temel mi' yajñelob jiñi cha'tiquil, come ca'bʌl i yʌlac'ob, jiñi cha'añ mach chʌn mejlobix ti tem chumtʌl. 7Jiñi xcʌnta wacax i cha'añ Abram yic'ot xcʌnta wacax i cha'añ Lot tsa' cajiyob ti leto.#13.7 Tsa' cajiyob ti leto: Cha'añ ti' caj jiñi jamil ba' mi' buc'sañob i yʌlac' yic'ot ti' caj jiñi ja' am bʌ ti pozo tac, ma'añix tsa' caji ti jastiyel, jiñi cha'añ tsi' cha'leyob tac leto. (Gn 26.19-21; Ex 2.16-19). (Ti jim bʌ ora ya' to chumulob jiñi cananeojob yic'ot ferezeojob ti jiñi lum.)
8Jiñi cha'añ Abram tsi' su'be Lot: “Mach yomic mi lac cha'len leto, mi jiñic jax xcʌnta tʌñʌme' lac cha'añ yom mi' cha'leñob leto, come la queran lac bʌ. 9¿Mach ba jocholic pejtelel ili lum ti' tojel a wut? Awocolic yom ma' tʌts' a bʌ ba'añon. Mi a wom majlel ti' tojel jiñi am bʌ ti lac ts'ej, joñon mux c majlel ti lac ñoj; o mi a wom majlel ti' tojel am bʌ ti lac ñoj, joñon mux c majlel ti lac ts'ej.”
10Lot tsi' joy q'uele jiñi lum, tsi' q'uele jiñi joctʌl am bʌ ti Jordán ja', wen uts'atax c'ʌlʌl ti Zoar, come mi' bajñel ach'esan i bʌ yilal jiñi lum, che'ʌch yilal bajche' i pʌc'ʌb lac Yum am bʌ ti Edén,#Gn 2.10 yic'ot che' bajche' jiñi lum am bʌ ti Egipto, che'ʌch añ che' maxto añic tsi' jisa lac Yum Sodoma yic'ot Gomorra.#Gn 19.24-25 11Jiñi cha'añ Lot tsi' yajca pejtelel jiñi lum ti Jordán; che' jiñi tsa' majli ti' tojel i pasibal q'uiñ. Che'ʌch tsi' cʌyʌyob i bʌ jiñi cha'tiquil. 12Abram tsa' chumle ti' lumal Canaán; jiñi Lot tsa' chumle ti tejclum tac am bʌ ti joctʌl, c'ʌlʌl tsa' c'oti ti chumtʌl ti' lumal Sodoma. 13Pero jiñi wiñicob x'ixicob año' bʌ ti Sodoma wen jontolob jax, tsi' cha'leyob ñuc tac bʌ mulil ti' contra lac Yum.
14Che' bʌ tsa'ix i tʌts'ʌ i bʌ Lot ba'añ Abram, lac Yum tsi' su'be Abram: “Joy q'uele pañimil, q'uele ti norte yic'ot ti sur yic'ot ba' mi' pasel q'uiñ yic'ot ba' mi' bʌjlel q'uiñ. 15Pejtelel jiñi lum woli bʌ a q'uel mi caj cʌq'ueñet yic'ot mi caj cʌq'ueñob a p'olbal ti pejtelel ora. 16Mi caj c p'ojlesan a p'olbal che' bajche' i ts'u'bejñal lum. Mi añ majqui mi' mejlel i tsic i ts'u'bejñal lum, mi caj i mejlel i tsic a p'olbal ja'el. 17Ch'ojyen, cucu xʌñʌ ñumel ti' joytʌlel jiñi lum, come mi caj cʌq'ueñet.”#13.14-17 Ti ili versículo tac mi' cha' tsijibtesan i t'añ lac Yum tsa' bʌ i wʌn su'be Abram ti ñaxan (Gn 12.7; Hch 7.5; Gl 3.16).
18Jiñi cha'añ Abram tsi' ch'ʌmʌ majlel pisil bʌ i yotot, tsa' majli ti chumtʌl ya' ba'añ alʌ te'el, ti' lum Mamre am bʌ ti Hebrón,#13.18 Hebrón: Jiñʌch jumpejt tejclum wen ñoxix bʌ am bʌ ti' wenta Palestina (Nm 13.22), c'ʌlʌl wʌle añ xchumtʌlob. Jiñi árabejob mi' pejcañob ti El Jalil am bʌ isujmlel ti lac t'añ “amigo,” cha'añ i ña'tʌntel Abram, i yamigo Dios (2 Cr 20.7; Is 41.8; Stg 2.23). Mi' ña'tʌntel cha'añ ya' ba' tsa' chumle Abram jiñʌch jump'ejl ajñibʌl ch'ujul bʌ (Gn 14.13; 18.1). ya'i tsi' melbe i pulʌntib i majtañ lac Yum.
ప్రస్తుతం ఎంపిక చేయబడింది:
Génesis 13: NTCH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process
