Génesis 12
12
2. CHE' BAJCHE' TSA' AJÑIYOB ABRAHAM, ISAAC, JACOB YIC'OT JOSE
(12.1—50.26)
Dios tsi' pʌyʌ Abram
1Lac Yum tsi' su'be Abram: Loq'uen ti a lumal ba'añ a pi'ʌlob yic'ot ti' yotot a tat, cucu ya' ti jiñi lum mu' bʌ caj c pʌsbeñet.#Hch 7.2-3 2Mi caj cʌq'ueñet ca'bʌl a p'olbal,#Gn 13.16; 15.5; 17.6; 22.17-18; 26.4; 28.14 mi caj cʌq'ueñet a wenlel, mi caj cʌc' ti cʌjñel a c'aba', yic'ot mi caj i tajob i wenlel wiñicob x'ixicob ti pejtelel pañimil cha'añet. 3Mi caj cʌq'uen i wenlel jiñi mu' bʌ i yʌq'ueñet i yutslel i t'añ yic'ot jiñi mu' bʌ i ts'a'leñet, mi caj c ts'a'len; cha'añet mi caj i tajob i wenlel wiñicob x'ixicob ti jujunmojt ti pañimil.#Gn 18.18; 22.18; 26.4; 28.14; Hch 3.25; Gl 3.8
4Tsa' majli Abram che' bajche' lac Yum tsi' su'be,#12.4 Che' bajche' lac Yum tsi' su'be: Abram tsi' jac'ʌ majlel che' bajche' Dios tsi' su'be, jiñi cha'añ Abram tsa' sujti ti' tat pejtelel xñopt'añob (Rm 4.11-12; Heb 11.8-10). tsa' majli yic'ot Lot. Añix jo'lujump'ejl i chʌnc'al (75) i ja'bilel Abram che' bʌ tsa' loq'ui ti Harán. 5Abram tsi' pʌyʌ majlel Sarai i yijñam yic'ot Lot, i yalobil i yʌscun yic'ot pejtelel i chu'bʌañ tsa' bʌ i tajayob yic'ot pejtelel wiñicob x'ixicob tsa' bʌ i tajayob ya' ti Harán,#Gn 13.7; 14.14; 15.3 tsa' loq'uiyob cha'añ mi' majlelob ti' lum Canaán.
Tsa' c'otiyob ti Canaán, 6Abram tsa' ñumi ti jiñi lum c'ʌlʌl tsa' c'oti ti Siquem#12.6 Siquem: Jiñʌch jump'ejl ñoxix bʌ tejclum am bʌ ti' wenta Palestina, xinlʌpʌl añ yic'ot cha'p'ejl wits i c'aba' Ebal yic'ot Gerizim (Dt 11.29-30). Che' maxto ch'ʌmbilobic i cha'añ israelob jiñi lum, jiñi cananeojob tsi' q'ueleyob ti wen ñuc jiñi tejclum come ya'ʌch ba' tsi' wa'chocoyob i yumʌntel yic'ot ba' tsi' tempañob i bʌ cha'añ mi' ch'ujutesañob i dios. Abram tsa' chumle ti jiñi lum che' mach mero i lumalic (Heb 11.9). ya' ba'añ colem te'#12.6 Colem te': Jiñʌch juntejc te' o alʌ te'el ch'ujul bʌ tsi' q'ueleyob jiñi cananeojob, jiñi cha'añ ya'i tsi' ch'ujutesayob i dios (Gn 13.18; 35.4; Dt 11.30; Jos 24.26; Jue 9.37). am bʌ ti More. Ti jim bʌ ora ya' chumulob i yalobilob Canaán. 7Tsi' pʌsʌ i bʌ lac Yum ti' wut Abram, tsi' su'be: “Mi caj cʌq'uen a p'olbal ili lum.”#Hch 7.5; Gl 3.16 Abram tsi' wa'chocobe i pulʌntib i majtañ lac Yum, ba' tsi' pʌsʌ i bʌ ti' wut Abram. 8Tsa' loq'ui ya'i, tsa' majli ti wits am bʌ ti' tojel Bet-el ya' ti' pasibal q'uiñ, tsi' wa'choco pisil bʌ i yotot ti ojlil i bijlel Bet-el#12.8 Bet-el: Ili t'añ ti hebreo yom mi yʌl i yotot Dios, ti ñaxan añ i c'aba' ti Luz (Gn 28.19), añ jo'lujump'ejl o wʌclujump'ejl (15 o 16) km. i ñajtlel cha'añ mi laj c'otel ti Jerusalén ya' ti norte yic'ot añ che' bajche' chʌmp'ejl (4) km. i ñajtlel cha'añ mi laj c'otel ti jiñi tejclum i c'aba' Hai. Ili Bet-el jiñʌch yam bʌ lum wen ñuc bʌ tsi' q'ueleyob jiñi cananeojob come ya'i tsi' tempayob i bʌ cha'añ mi' ch'ujutesañob i dios. Che' ja'el che' ti yorajlel i yumʌntel jiñi reyob ya' ti Israel, wen ñuc tsa' q'uejli ili Bet-el come jiñi israelob che' bʌ tsi' cʌyʌyob lac Yum, ya'i tsi' wa'chocoyob i dios cha'añ mi' majlel i ch'ujutesañob (1 R 12.28-30; Am 7.13). ya' ti' bʌjlibal q'uiñ yic'ot Hai ya' ti' pasibal q'uiñ; ya'i tsi' wa'chocobe i pulʌntib i majtañ lac Yum, tsi' ch'ujutesa i c'aba' lac Yum. 9Ti wi'il Abram tsa' loq'ui ya'i, tsa' caji ti c'unte' majlel c'ʌlʌl ti jiñi lum i c'aba' Neguev.#12.9 Neguev: Jiñʌch jump'ejl jochol bʌ lum am bʌ ti sur ya' ti Palestina (Abd v. 19-20)
Abram ya' ti Egipto
10Ti jimbʌ ora tsa' tili wi'ñal ti jiñi lum; jiñi cha'añ Abram tsa' ju'bi majlel ti Egipto cha'añ mi' chumtʌl ya'i, come wen ca'bʌl wi'ñal ti jiñi lum.#12.10 Ti Palestina mi caj i colel chuqui mi' pʌc'ob mi añ ja'al (Dt 11.10-12). Che' bajche' mi laj q'uel ya' ti Oñiyi bʌ Wen T'añ, ca'bʌl wi'ñal tsi' yu'biyob come ma'añic mi' wen yajlel ja'al ti jiñi lum (Gn 26.1; 43.1; 47.4; Rt 1.1; 2 R 4.38). 11Che' lʌc'ʌlix yom c'otel ti Egipto, tsi' su'be Sarai i yijñam: “Cujil wen a t'ojol jax.#12.11 Cujil wen a t'ojol jax: Sarai añix i ja'bilel ti jo'p'ejl i chʌnc'al (65) ja'b, pero Abram ñumeñix lujump'ejl ja'b i ja'bilel che' bajche' Sarai (v. 4; 17.17). 12Che' mi' q'ueletob jiñi año' bʌ ti Egipto, mi caj i yʌlob: Jiñʌch i yijñam. Che' jiñi mi caj i tsʌnsañoñob, ixcu jatet cuxul mi caj a wajñel. 13Jiñi cha'añ su'beñob cha'añ jatet querañet,#12.13 Querañet: Che' mi laj q'uel isujmʌch i yerañobʌch i bʌ (Gn 20.12). Cha'yajl tsi' yʌlʌ cha'añ Sarai i yerañʌch (Gn 20.1-18); ixcu Isaac junyajl tsi' yʌlʌ cha'añ Rebeca i yerañʌch (Gn 26.6-14). cha'añ uts'at mi cajñel a wic'ot; che' jiñi cuxul mi caj cajñel cha'añ a coltaya.”
14Che' ba' ora tsa' ochi Abram ti Egipto, jiñi egiptojob tsi' q'ueleyob wen i t'ojol jax jiñi x'ixic. 15Che' ja'el i wiñicob faraón tsi' q'ueleyob jiñi x'ixic, tsi' su'beyob faraón cha'añ wen i t'ojol jax; jiñi cha'añ tsa' pʌjyi majlel jiñi x'ixic ti' yotot faraón. 16Faraón tsi' yʌq'ue i majtañ Abram cha'añ ti' caj jiñi x'ixic, tsi' yʌq'ue tʌñʌme', wacax, xtat burro, yic'ot i mozojob, yic'ot i criadajob, yic'ot xña'a burro tac, yic'ot camello tac.
17Pero lac Yum tsi' yʌq'ue wocol faraón yic'ot ca'bʌl c'am-ʌjel ti' tojlel jiñi año' bʌ ti' yotot cha'añ ti' caj Sarai, i yijñam Abram. 18Jiñi cha'añ faraón tsi' pʌyʌ tilel Abram, tsi' su'be: “¿Chucoch tsa' melbeyon che' bajche' iliyi? ¿Chucoch ma'añic tsa' su'beyon mi a wijñam jiñi x'ixic?#12.18 Jiñi texto ma'añic mi' su'beñonla bajche' tsi' ña'ta faraón cha'añ Sarai i yijñamʌch Abram. Lajin yic'ot ili texto Gn 20.3; 26.8. 19¿Chucoch tsa' wʌlʌ cha'añ jiñʌch a wijts'in; che' colelix c pʌy cha'añ quijñam? Jiñi cha'añ wʌle, wʌ'an a wijñam, pʌyʌ majlel, cucux a wic'ot.” 20Faraón tsi' yʌq'ue mandar i wiñicob cha'añ mi' coltañob majlel Abram yic'ot i yijñam yic'ot pejtelel i chu'bʌañ.
ప్రస్తుతం ఎంపిక చేయబడింది:
Génesis 12: NTCH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process
