LUKA 23
23
Yesu kuex Pilat kox nuex Shvlx wvnc
(Mat 27:1-2,11-14; Mak 15:1-5; Yoh 18:28-38)
1Kvruex kaq rvtuimx yaq hez lotlaz kuex kvtenc vtueq Yesu kuex Pilat kox nuex shvlx wvnc tueq. 2Tsuingshiq rueq, “Vruex waz kuex mungx miqsaz muex lvmx tvmawc kuy tvkoc Kesar honoc muex muinghic kuy lvmx rac muq ngoz tueq tuingshaung muinz, vpiq pumz ngoc Mesia hokhvmx rvtauk ngoz tueq kv-ngoc yaq kvjaz kuex nuiyshiq rueq khiz tay lvp tiq,” ngoz tueq mvrax tvgurc tueq.
3Pilat rueq vpiq muex, “Mnoz kuex Yuda miqsaz phvnx hokhvmx waz doc haz?” ngoz tueq wiz tueq.
Yesu rueq, “Mnoz rueq wiz vphux kvkhoc ngaz rvtauk,” ngoz tueq tvralc tueq.
4Kvkaq Pilat rueq shomc walaungx bix nuiyc nuk miqsaz htenc muex, “Vruex waz muex mvrax tvgurc juing lvmx humc mauk,” ngoz tueq.
5Yuq muinz tsuingshiq kuex kvjaz tvyungc vtueq, “Vruex waz kuex Galile mungx maq phaungc vtueq majuiuc vyuq nuex httuiuc laz, Yuda mungx wvmungx tuimx nuex vpiq rueq tvluing jungphvnx vtueq, mungx miqsaz htenc kuex tvrvmulc tsvrc laz juing jungphvnx yaq,” ngoz tueq ramc wuez tueq.
Yesu kuex Herod Kox nuex Tvkaz yek
6Pilat rueq kvruex tay vtueq, “Vruex waz kuex Galile miqsaz haz?” ngoz tueq tvsuing wiz tueq. 7Herod rueq guimz lawc yaq mungx wawc miq rvtueq lvmx kuex piq rueq tuiuz lvp vtueq, Yesu kuex Herod kox nuex tvshvlx laq tueq. Kvruex baunglaung Herod muinz Yerusalem nuex vhttax rvtueq. 8Herod rueq Yesu kuex khiz vtueq pinhtumc kokez tueq, yvmx khoc lac ngoz ruiux lec Yesu thuix thaungx tay tueq kuex loayc hvlc shex rvtueq, vpiq rueq tvkhic yaq romzyac phvnx shishiz kuex khiz lvp shaungx shvmx ngoz tueq tvluimc tueq. 9Herod rueq Yesu muex lvmx ruip saz maq wiz koq muinz, Yesu rueq bomc poshiz muinz tvralc muq. 10Shomc walaungx bix nuiyc Tvrac tvluingc waz hez kvtenc jvp vtueq Yesu muex mvrax paunghvlc tvgurc kuq tueq. 11Herod nuiyc piq nolaungx bix rueq Yesu kuex wvlc guez waqguez tvyaungc vtueq shummarc wuez tueq, kvruex yimaq hungx htaungx yaq svmhung kuex tvsvmc ruiux Pilat kox nuex tvyez shvlx wvnc yek tueq. 12Kungkhux nuex tsuingnueyc kuex rungx raz muq rvtueq, yuq muinz kvruex raungnuiyq maq tsuingnueyc kuex wahvlc muex rvyaungc wvnc tueq.
Yesu muex Vthueyc Murx Tvgurc
(Mat 27:15-26; Mak 15:6-15; Yoh 18:39—19:16)
13Pilat rueq shomc walaungx bix, walaungx bix nuiyc nuk miqsaz htenc kuex tvtuimx vtueq; 14tsuingshiq muex jungx tueq, “Miq vruex waz kuex mungx miqsaz htenc muex lvmx shvlc tvyaq jix waz ngoz tueq ngvy kox nuex shvlx laq ruinx. Majuiuc ngaz rueq vruex waz kuex nuimshiq htumc nuex tvsuing wiz koq tueq, nuimshiq rueq vpiq muex tvgurc vshuinx mvrax kuex ngaz rueq khiz mauk! 15Herod rueq muinz yvmx mvrax muinz khiz muq rvtueq ngvy kox nuex hulawx tvyez gay yek phuex. Vruex waz rueq vthueyc juing mvrax phvnx shiz muinz shuimx wvnc muq doc. 16Kvkhoc ningkhvnc nuex ngaz rueq vpiq kuex murx tvgurc tvtharc vtueq dvyx httvr gay shaungx,” ngoz tueq.#Mat 27:26; Yoh 19:1 17Wawc wvruip Moalx nuex Pilat rueq tsuingshiq tvkoc miq washiz shiz kuex tvdungc kuy htungx vlayx vhttax rvtueq,
18Nuk miqsaz htenc lotlaz rueq, “Kvruex waz kuex vthvy rvgay shuiuz! Baraba kuex tvdung kuq koq!” ngoz tueq vdvmz nuex guyc wuez tueq. 19(Baraba kuex ghaqyungx nuex tvgap gawx jix nuiyc miq thvy jix khac ningkhvnc nuex khoktep nuex shuiuz rvhumc jix waz rvtueq.)
20Pilat rueq Yesu kuex httvrc gay roc vtueq, lauk shiz hulawx tsuingshiq muex jungx tvtay yek tueq. 21Yuq muinz tsuingshiq rueq, “Vpiq kuex yauk juinc bulx nuex but gay shuiuz! Yauk juinc bulx nuex but gay shuiuz!” ngoz tueq guyc tvruingx wuez tueq.
22Kvruex kaq Pilat rueq tsuingshiq muex lauk thuimx ngoc yaungc jungx tueq kuex, “Vpiq kuex yvmx mvrax lac yaq gay tvnx? Vpiq kuex vthueyc aungx yaq mvrax ngaz rueq khiz mauk! Kvkhoc rvtueq murx tvgurc tvtharc ruiux tvdung gay shaungx,” ngoz tueq.
23Yuq muinz tsuingshiq rueq vpiq kuex yauk juinc bulx nuex but thvy gay tvkoc yunghvlc maq guyc vtueq thoz lvy ningkhvnc nuex, vtvsuip nuex tsuinghez rueq thoz tueq rulc rv-ngvlc lvp wvnc tueq. 24Pilat rueq muinz tsuingshiq rueq thoz tueq rulc rv-ngvlc Yesu htauk nuex htap htaz kuq gay tueq. 25Kvkhoc tsuingshiq rueq thoz tueq rulc rv-ngvlc tvgap gawx jix nuiyc miq thvy khac ningkhvnc nuex khoktep nuex vshauk gay waz kuex tvdung gay tueq, Yesu kuex tsuingshiq rueq vroc lekuq gay tueq.
Yesu Yauk Juinc Bulx nuex But gay
(Mat 27:33-44; Mak 15:22-32; Yoh 19:17-27)
26Nolaungx bix rueq Yesu kuex tvdung shvlx laq yaq nuex, rumz ghaq maq vkaz Kirene mungx miqsaz vmuingc Simon ngoz yaq waz rulc rvhumc tueq. Tsuinghez rueq piq kuex lvp vtueq yauk juinc bulx kuex tvpic ruiux Yesu yix nuex tvkaz naungx tueq.
27Nuk miqsaz htenc rueq muinz vpiq yix nuex phvnx laq naungx tueq. Yalxjuik rulx wvyvmc muinz miqmac khuiuq nuex kvwungc wuez ruiux khoar yaq lvmx maq phvnx laq wuez tueq. 28Yesu rueq tsuingshiq kox nuex kvroz lawc vtueq, “Yerusalem shvlx rulx lex! Ngvy tvkoc nuex nauk khoar wuez kaz, nuimshiq nuiyc nuimshiq suiuz vsaz tvkoc dvyx khoar wuez kuinz. 29Yvmx khoc lac ngoz ruiux lec, ‘Saz guez, nox muex puix tvnuingc muq doc nyuiuz hez kuex thuinhvlx yaq!’ ngoz tueq miq ngoc juing vkhing httuiuc wvnc tuex. 30Kvruex vkhing nuex miq htenc rueq kuz vkanx htenc muex, ‘Nuiyshiq htauk nuex pvt wvnc loq!’ Kanx htenc muex, ‘Nuiyshiq htauk vyuq puingc wvnc loq!’ ngoz tueq thoz wuez shuex.#Esa 2:19; Hos 10:8; Tvkh 6:16 31Vjungx tvraungx httax yaq nuex doc muinz vruex lvmz htenc vkhoc yaungx ruiux kuex, vshanc rvwvnc ruiux yuq yvmx khoc lac yaungx wvnc tvnx?” ngoz tueq.
32Kvruex kaq miq thvy khac kvdaungc yaq wanueyc muinz Yesu rulc vdvmz nuex thvy gay tvkoc shvlx wvnc naungx tueq. 33Kvkaq tsuingshiq kuex, “Khurawz luimx,” ngoz tueq muingc yaq ghaqluimx kvyuq httuiuc kaz vtueq, Yesu muinz miq thvy jix wanueyc muinz vpiq vkeq kox nuex vshiz, vphvrx kox nuex vshiz yauk juinc bulx nuex but gay tueq. 34Yesu rueq, “Iwaz lex, tsuingshiq mvrax kuex dawc kuq shuiuz! Tsuingshiq rueq shuimx yaq lvmx kuex tsuingshiq rueq tuiuz muq rvtueq,” ngoz tueq.
Tsuingshiq rueq vpiq svmhung kuex hangchac#23:34 hangchac: Uraq lac lvp shvnx thvlc ngoc rvtueq. maq toc vtueq rv-phvlc tueq.#Tvts 22:18 35Nuk miqsaz htenc rueq jvp vtueq lawc yaq nuex Yuda walaungx bix rueq tvlilawx yaq lvmx maq: “Miq vganc jix kuex palc lot yaq; mkhoc shoc maq Tishox rueq vthvl taq waz Mesia ngoz ruiux kuex vpiq pumz vpiq mkvpalc wvnc kueq,” ngoz tueq.#Tvts 22:7; Mat 22:30; 27:39; Mak 15:29
36Nolaungx bix kuex vpiq kox nuex kaz vtueq, vhix tix kuex kuq ruiux,#Tvts 69:21 37“Mnoz kuex Yuda hez hokhvmx rvtoq ngoz ruiux kuex mshauk pumz kuex mnoz kvpalc wvnc kuiuz!” ngoz tueq tvlilawx tueq.
38Vpiq htauk nuex muinz, “Vruex Waz kuex Yuda miqsaz Hokhvmx Waz,” ngoz tueq wuiyq tvkop taq tueq.
39Yauk juinc bulx nuex vbut taq miq thvy khac kvdaungc yaq washiz rueq, “Mnoz kuex Mesia rvmuq haz? Mshauk pumz kvmaq nvnueyc vmuinz palc wvnc loq!” ngoz tueq shummarc ngoz ngax tueq.
40Vganc washiz rueq kuex, “Mnoz muinz kvruex waz rulc rv-ngvlc htap htaz rvhumc vtuiux rvyruiux, Tishox muex muinz hiz muq nyix? 41Naungnueyc kuex miqmac yaq wvnc tiq mvrax rulc rv-ngvlc rvhumc vtix, yuq muinz vruex waz kuex yvmx mvrax muinz yaq muq doc,” ngoz tueq httonx vtueq tvralc tueq. 42Kvkhoc ngoz vtueq piq rueq Yesu muex, “Yesu lex, mnoz Hokhvmx raz tueq httuiuc kaz tuiux nuex, ngaz kuex rvwvl koq!” ngoz tueq thoz tueq.
43Kvkaq Yesu rueq, “Ngaz rueq mnoz muex vsuing jungx kuq ix, majuiuc raungnuiyq dvyx mnoz kuex ngaz rulc vdvmz nuex Paradisu nuex httax tuiux, ngaz rueq bomkhvmc kuq vphaungx,” ngoz kuq tueq.
Yesu Thuiuz Thuic Pat
(Mat 27:45-56; Mak 15:33-41; Yoh 19:28-30)
44Kvruex vkhing kuex shalhtungx baung shalhtaz 12 tanc khvnc rvtueq, kvruex vkhing maq phaungc vtueq raungyac shalhtaz thuimx nuex httuiuc laz shalx kawc muq buingc wvnc vtueq, wvmungx tuimx nuex raungnyauk suip rvtueq. 45Shomc Yuimx wawc khvy vjuinx kvmuinz vnueyc muex khoz kaz tueq.#Dw 26:31-33; Mat 27:51; Mak 15:38 46Yesu kuex kvjaz yunghvlc maq guyc vtueq, “Iwaz lex, ngvy siyac kuex mnoz muex lekuq vphaungx!” ngoz tueq jungx lot yix vpiq thuiuzthuic kuex pat wvnc tueq.#Tvts 31:5; Mat 27:50; Mak 15:37; Yoh 19:30
47Vkhoc yaungx wvnc tueq lvmx kuex nolaungx yungx waz rueq khiz vtueq, “Vruex waz kuex vsuing miq hvlx waz doc rvtueq,” ngoz tueq Tishox muex tvtsvmc kvmc tueq.
48Kvruex lawc kay naungc jix nuk miqsaz htenc rueq muinz kvkhoc yaungx wvnc tueq lvmx htenc kuex khiz vtueq, miqmac khuiuq nuex kvwungc wuez ruiux yek wvnc wuez tueq. 49Yesu rulc rvtuiuz yaq jix lotlaz nuiyc Galile mungx maq vphvnx laq naungx yalxjuik rulx htenc rueq, kvruex lvmz kuex lawc tvkoc vluz nuex jvp wuez tueq.#Luk 8:2-3; Tvts 38:11; Mat 27:55; Mak 15:40
Yesu kuex Luip tueq
(Mat 27:57-61; Mak 15:42-47; Yoh 19:38-42)
50-51Kvruex kaq Yuda mungx wawc Arimathea ngoz yaq ghaq wawc vmuingc Yosep ngoz tueq washiz vhttax rvtueq, piq kuex miq hvlx nuiyc tvtsanc nganc aungx yaq miq ningkhvnc nuex Tishox Mungtan httuiuc wvnc yaq lvmz kuex bvmc jix miq washiz rvtueq. Piq kuex rungx walaungx bix phungc wawc miq washiz rvtueq, yuq muinz tsuingshiq rueq tvsuip tueq kvjaz nuiyc shuimx kaz wvnc tueq lvmx kuex rungx raz naungx muq. 52Piq kuex Pilat kox nuex kaz vtueq Yesu maungx kuex thoz tueq. 53Yesu maungx kuex yauk juinc bulx wawc tvdvy ruiux khvy luiz phux maq yop tueq, lung rauk vwvt guirx shec lauk shiz muinz max shuimx phaungc luip ruiuz khux vnyalx kvyuq luip taq tueq. 54Kvruex raungnuiyq kuex jepat raungx bv-ngac raungnuiyq ningkhvnc nuex Vguilc Raungnuiyq httuiuc wvnc muex vyoalx dvyx shex rvtueq.
55Galile mungx wawc Yesu rulc vdvmz nuex kay naungc jix yalxjuik rulx rueq muinz tsuingshiq yix nuex phvnx wvnc naungx vtueq, luip kvruex muinz vpiq maungx kvmuinz yvmx khoc lac luip taq tvnx kuex khiz shec wuez tueq. 56Kvruex yimaq tsuingshiq yuimx nuex yek wvnc wuez vtueq, vhomc tix nuiyc murra vhomc tix kuex tvyoalc taq tueq.
Tsuingshiq kuex Tvrac httax yaq rulc rv-ngvlc Vguilc Raungnuiyq nuex nyec tvkuiyq guilc tueq.#Dw 20:10; Tvrac 5:14
ప్రస్తుతం ఎంపిక చేయబడింది:
LUKA 23: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
