LUKA 24
24
Yuing Kvtenc Wvnc lvmz
(Mat 28:1-10; Mak 16:1-8; Yoh 20:1-10)
1Taungjix raungnuiyq raungnvp samaq yalxjuik rulx tsuingshiq rueq vtvyoalc taq vhomc tix kuex lvmz laq vtueq, luip ruiuz khux nuex kaz wuez tueq. 2Kvkaq luip ruiuz khux wawc lungkuiux tvkuic lvmz gay tueq kuex khiz vtueq, 3tsuinghez kuex luip mungx nuex nyuip wuez tueq; yuq muinz Taungjix Yesu maungx kuex khiz muq. 4Ekvkhoc yaungx wvnc tueq lvmx nuex seng vtueq tsuinghez thuinz nuex ruingraung yaq nuex, phez hvlc khvyluiz svmc jix miq wanueyc kuex tsuinghez khaungkac nuex vhuingc rvhek laz dung kaz tueq. 5Yalxjuik rulx kuex hiyaz vtueq vbumc rvwuez tueq, tsuingnueyc rueq, “Vtvraungx waz kuex vmaungx jix httax yaq nuex yvmx ruemc lac thuiyx vshuinx? 6Vpiq kuex vruex yuq vguez shex, vpiq yuing kvtenc wvnc tueq shex. Vpiq Galile mungx nuex httax tueq jauz nuimshiq muex vpiq rueq yvmx khoc lac jungx phvnx rvwvl wuez shuinz:#Mat 16:21; 17:22-23; 20:18-19; Mak 8:31; 10:33-34; Luk 9:22; 18:31-33 7‘Miq Saz vruex kuex mvrax vhttax miqsaz yauk nuex lekuy gay vtueq, yauk juinc bulx nuex but gay rvhumc yix, raungnuiyq thuimx ngoc yaungc nuex yuing kvtenc wvnc tuex lvmz nuimshiq muex jungx tueq kuex rvwvl wuez shuinz,’” ngoz tueq.
8Kvkaq yalxjuik rulx rueq vpiq kvjaz htenc kuex rvwvl lvp wuez vtueq, 9luip ruiuz khux maq yek wvnc wuez vtueq sangac rokshiz rac washiz kvmac muinz vbez htenc muex muinz yaungx wvnc tueq lvmx lotlaz kuex tvtay jungx kuq tueq. 10Kamx waz hez muex tvtay jungc kuy jix yalxjuik rulx kuex Magdalene Mary, Joanna, Yaku nyuiuz Mary nuiyc vganc yalxjuik rulx htenc tauk rvtueq. 11Yuq muinz kamx waz hez kuex yalxjuik rulx rueq jungx tueq kvjaz htenc kuex khuec guez tvyaungc vtueq kvmx muq. 12Yuq muinz Peter kuex kvtenc damz raz tueq luip ruiuz khux kvyuq vyuz vbaz kaz vtueq bumx lawc tueq, khvymvnz phux htenc maq lvy vtueq vganc yvmx muinz khiz muq. Piq kuex kvkhoc yaungx wvnc tueq lvmx kvmac wangc vtueq yuimx nuex yek waung tueq.
Emmau nuex Khuemx Waung tueq
(Mak 16:12-13)
13Kvruex raungnuiyq dvyx Yesu yix phvnc naungc jix wawc wanueyc kuex Yerusalem maq kilometer 11 tanc luz yaq Emmau ngoz yaq ghaq nuex kaz wvnc tueq. 14Kvkaq tsuingnueyc rueq yaungx wvnc tueq lvmx htenc kuex rvjungc phvnc yaq lvmx maq kaz tueq. 15Kvkhoc rvjungc phvnc rvwiz soz yaq nuex Yesu kuex tsuingnueyc hep nuex httuiuc kaz vtueq vdvmz nuex kaz naungx tueq. 16Tsuingnueyc rueq vpiq kuex khic ruiux muinz ukhaq wuez rvtvnx sunx muq. 17Yesu rueq tsuingnueyc muex, “Nuimnueyc khuemx yaq lvmx maq yvmx phvnx lac rvjungc phvnc vtuinx?” ngoz tueq wiz koq tueq.
Tsuingnueyc kuex vyonz vyec htvlx maq jvp kaz wuez tueq. 18Tsuingnueyc wawc vmuingc Kaleopa ngoz yaq waz rueq, “Yerusalem ghaq nuex kay jix htenc wawc mnoz washiz rueq dvyx majuiuc baunglaung kvruex yuq yaungx wvnc tueq lvmx htenc kuex tuiuz muq dvyx doc haz?” ngoz tueq wiz tueq.
19Vpiq rueq, “Yvmx lvmx htenc lac?” ngoz tueq wiz tueq.
Kvkaq tsuingnueyc rueq tvralc tueq kuex, “Nazaret ghaq jix Yesu lvmx ngoc nauz, vpiq kuex Tishox khaungkac nuex muinz, nuk miqsaz lotlaz htumc nuex muinz, jungphvnx shuimx wvnc tueq nuiyc yauk shuimc htauk nuex muinz, vpiq kuex luimc vkawc vhttax shvmmax washiz rvtueq. 20Naungshiq shomc walaungx bix nuiyc guimz lawc jix hez vpiq kuex thvy gay tvkoc htap htaz ruiux, yauk juinc bulx nuex but gay tueq. 21Nuiyshiq rueq kvruex waz kuex Israel phvnx tvdungc wvnc jix waz ngoz tueq thuinz tvluimc wuez tiq! Ekvkhoc yaungx wvnc tueq yix maq majuiuc raungnuiyq thuimx shex rvtueq. 22Nuiyshiq phungc wawc yalxjuik rulc wvyvmc rueq raungnvp samaq luip ruiuz khux kuex lawc kaz koq tueq, 23tsuingshiq rueq vmaungx kuex khiz muq. Tsuinghez yek waung vtueq vpiq kuex tvraungx httax yaq ngoz tueq jungc kuy jix raungkamx bix kvkhic kaz tueq romzyac vshiz khiz tueq lvmz jungx tvtay waung tueq. 24Nuiyshiq rulc vdvmz httaz jix hez wvyvmc rueq muinz luip nuex lawc kaz koq tueq yalxjuik rulx rueq jungx wvnc tueq rulc rv-ngvlc khiz kaz yek tueq; yuq muinz vpiq kuex khiz muq doc,” ngoz tueq tvralc tueq.
25Kvkaq Yesu rueq tsuingnueyc muex jungx tueq kuex, “Shvmmax bix jungphvnx tueq phvnx ruip saz kuex kvmluimx tvkoc kenc hvlc miqyaq hez lex! 26Mesia kuex vpiq ngauz vngax nuex max nyuip shauk nuex kuex kvkhoc kuilc daz rvhumc juing rvmuq haz?” ngoz tueq. 27Kvmaq Yesu rueq, Moshe rueq vwuiyq shec wawc nuiyc shvmmax bix rueq vwuiyq shec Rumvrc luik htenc wawc vpiq duix nuex tvhungx vtueq vwuiyq shec htenc kuex tsuingnueyc muex jungphvnx kuq tueq.
28Tsuingnueyc kay juing ghaq kvyuq httuiuc wvnc nanac nuex Yesu kuex kungkhux nuex lvy wvnc ikhoc dvnc tueq; 29kvkaq tsuingnueyc rueq vpiq muex, “Shalx vhttvmc raungnyauk shex, nvnueyc rulc lawx duiz wvnc ix,” ngoz tueq laungc maq tvwanc tueq. Kvkhoc rvtueq tsuingnueyc rulc vdvmz nuex duic wvnc naungc tvkoc kaz naungx tueq. 30Vpiq kuex tsuingnueyc rulc roc nuex dungc svy muex ngaungc yaq nuex, wanx kuex lvmz vtueq kejux tvtsvmc ruiux, tv-phuinz phux vtueq tsuingnueyc muex kuq tueq. 31Kvruex kaq jix tsuingnueyc muik kuex kalc wvnc vtueq Taungjix rvtueq lvmx kuex tuiuz lvp tueq. Yuq muinz vpiq kuex tsuingnueyc kox kvwawc vmoz rvwvnc tueq. 32Kvkhoc rvtueq tsuingnueyc rueq, “Lvmx maq vpiq rueq naungnueyc muex jungphvnx kuq phuex ikaq Rumvrc luik wawc jalc jungx kuq phuex nuex naungnueyc thuinz wvrluic ikhoc thuinz phez tueq rvmuq haz?” ngoz tueq rvjungc wuez tueq.
33Tsuingnueyc kuex kvtenc waung wvnc vtueq Yerusalem nuex yek waung tueq. Kvruex yuq kamx waz hez rokshiz rac washiz rulc vganc sangac htenc muinz rvtuimx naungx yaq kuex khiz tueq. 34Kvruex hez rueq muinz, “Taungjix kuex vsuing yuing kvtenc wvnc vtuex! Vpiq kuex Simon muex muinz kvkhic kaz tueq!” ngoz tueq rvjungc wuez tueq.
35Tsuingnueyc rueq muinz lvmx nuex baunglaung yaungx wvnc tueq lvmz htenc nuiyc wanx tv-phuinz kuq phuex nuex, vpiq rvtueq lvmz tuiuz lvp tueq lvmx jungphvnx kuq tueq.
Vpiq Sangac Hez muex Yesu Kvkhic kaz
(Mat 28:16-20; Mak 16:14-18; Yoh 20:18-23; Kamx 1:6-8)
36Tsuingnueyc rueq kvruex lvmz htenc kuex tsuinghez muex jungphvnx kuq yaq nuex, huingc rvhek laz maq Taungjix vpiq shauk pumz kuex tsuingshiq hvlwvl nuex jvp kaz vtueq, “Nuimshiq nuex nomic mhttax kueq,” ngoz tueq ngoz kuq tueq.
37Tsuingshiq kuex maungx yac rueq tvhiz yaq ngoz tueq hiyaz wuez tueq. 38Yuq muinz vpiq rueq, “Nuimshiq yvmx ruemc lac kawc yawc wuez vtuinx? Yvmx ngoz tueq lac nuimshiq thuinz nuex ruingraung vtuinx? 39Ngaz rvtauk ngvy yauk nuiyc ngvy yaz vruex lawc shuinz. Ngvy gvnz vruex pemz lawc ruiux yuq, nuimshiq rueq tuiuz shuinx, ngaz kuex gvnngvmx nuiyc vrawz vhttax, maungx yac ngoz yaq kuex ngaz vkhoc vruk vrawz httax yaq rvmuq,” ngoz tueq tsuinghez muex jungx tueq.
40Kvkhoc jungc lot yix vpiq yauk vyaz htenc kuex tsuingshiq muex tvkhic kuq tueq. 41Tsuingshiq kuex pinhtumc kokez vtueq wangc langc wuez ruiux, kvmx muq shauk nuex vpiq rueq tsuingshiq muex, “Nuimshiq kox nuex phuiuz svy juing phvnx shishiz vhttax haz?” ngoz tueq wiz tueq. 42Kvkaq tsuingshiq rueq ngaq gaungc htaq kox kuex vpiq muex kuq tueq. 43Vpiq rueq kvruex lvmz vtueq tsuingshiq htumc nuex saq tueq.
44Kvkaq Yesu rueq tsuingshiq muex, “Moshe Tvrac nuex muinz, shvmmax bix luik htenc nuex muinz, Tvtsvmc luik nuex muinz ngvy lvmz nuex seng vtueq wuiyq shec tueq lotlaz hungx wvnc tuex, ngoz tueq nuimshiq rulc vdvmz httax tauk nuex ngaz rueq nuimshiq muex jungx phaungx,” ngoz tueq jungx tueq.
45Kvruex yimaq Rumvrc luik htenc tuiuz wvnc tvkoc vpiq rueq tsuingshiq thuinz kuex tvsvmz kuq tueq. 46Vpiq rueq tsuingshiq muex, “Vsawc luik nuex vkhoc wuiyq shec tueq, Mesia kuex vthueyc rvhumc vtueq raungnuiyq thuimx nuex yuing kvtenc wvnc yek tuex, 47vpiq muingc maq mvrax dawc kuy lvmz nuiyc thuinz layc wvnc lvmz bomjungc kuex Yerusalem ghaq maq phaungc vtueq miqphvnx ruip rawx muex jungphvnx kuq wvnc shuex. 48Nuimshiq kuex vruex lvmx htenc hakhix yaungx wuez vtuinx. 49Ngaz rueq Iwaz bomkhvmc kuex nuimshiq htauk nuex tvkaz phaungx. Yuq muinz nuimshiq rueq raungwawc Vsawc Siyac luimc vkawc lvp wvnc shuinx nuex httuiuc laz, ghaqyungx nuex dvyx bvmc wuez shuinz,” ngoz tueq jungx tueq.#Esa 44:3; Yoel 2:28; Yoh 14:16,26; Kamx 1:4
Yesu kuex Raungmungx nuex Shvlx wvnc
(Mat 16:19-20; Kamx 1:9-11)
50Kvruex yimaq tsuingshiq kuex ghaqyungx kvmaq Bethany nuex httuiuc laz shvlx laq vtueq kvruex baung kvmaq vpiq yauk kuex tenz ruiux tsuinghez muex ruimruimx kuq tueq.#Kamx 1:12 51Kvkhoc tsuingshiq muex ruimruimx kuq yaq nuex, vpiq kuex tsuinghez kox wawc rv-phvlc wvnc vtueq raungmungx nuex shvlx wvnc vshuex.#Kamx 1:9-11 52Tsuingshiq rueq vpiq muex nawk palx wuez vtueq pinhtumc vkoz vkez maq Yerusalem nuex yek waung tueq, 53Tishox muex kejux vyungx ngoz tueq tvtsvmc ruiux Shomc Yuimx nuex vkhing ruip rawx httax wuez tueq.
ప్రస్తుతం ఎంపిక చేయబడింది:
LUKA 24: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
