YOHAN 9

Vnyuiuz Pukdungc Muik Vmawz Washiz Yesu rueq tvhvlc

1Yesu lvy wvnc yaq nuex vnyuiuz pukdungc muik mawz washiz kuex khiz tueq. 2Vpiq sangac hez rueq, “Tvluingc waz lex, vruex waz muik mawz kuex vjawc maq phuex rvtueq, ukhaq mvrax ningkhvnc nuex lac rvtvnx? Piq mvrax ningkhvnc nuex shuex, vnyuiuz vwaz mvrax ningkhvnc nuex lac?” ngoz tueq wiz tueq.

3Yesu rueq, “Piq mvrax ningkhvnc nuex muinz rvmuq, vnyuiuz vwaz mvrax ningkhvnc nuex muinz rvmuq, Tishox luimc vkawc kuex piq htauk maq tvkhic wvnc tvkoc rvtueq. 4Ngvy tvkay jix waz vpiq yauk shuimc kuex raungnuiyq baunglaung naungshiq rueq shuimc juing, uraq muinz shuimx lvp muq raungnyauk vkhing httuiuc wvnc tuex. 5Ngaz kuex mungkawx nuex httax taungx baunglaung mungkawx raungwuic kuex ngaz rvtauk,” ngoz tueq tvralc tueq.#Mat 5:14; Yoh 8:12

6Kvkhoc jungc kuy lot yix maq vpiq rueq ghaq nuex htoz maq htoz ruiux bok tv-nyelx vtueq, muik mawz waz muik nuex bok maq nyvt kuq ruiux, 7“Kaz kuiux, Siloam yuix Jumx nuex hoal kaz kuiuz,” ngoz tueq jungx kuq tueq. (Siloam ngoc vlvmz kuex “Tvkay” ngoc rvtueq,) piq kaz vtueq hoal kaz koq tueq vmuik kuex kalc wvnc ruiux yek waung tueq.

8Piq kuex morakic#9:8 Morakic: vhic phuiuz svy jix waz ngoc rvtueq. yaungx tueq ningkhvnc nuex kungkhux khic yoalx jix nuiyc yuimx phic wuinz rueq, “Vruex waz kuex ngaungc hvt maq hic phuiuz svy jix waz rvmuq haz?” ngoz tueq wiz tueq.

9Wvyvmc rueq, “Piq doc rvtueq,” ngoz tueq. Vganc rueq, “Piq shvmx ikhoc miq washiz rvtueq shvmx,” ngoz tueq.

Piq rueq, “Ngaz rvtauk,” ngoz tueq kvjungc tueq.

10Tsuinghez rueq, “Mmuik kuex mkhoc maq lac kvkhic hvlx kaz tvnx?” ngoz tueq wiz wuez tueq.

11Piq rueq, “Yesu ngoz yaq waz rueq bok maq imuik nuex nyvt kuq ruiux, Siloam nuex hoal kaz ngoz tueq ngaz muex jungx phuex rulc rv-ngvlc ngaz kaz vtueq hoal kaz koq tueq muik kvkhic hvlx kaz tueq,” ngoz tueq tvralc tueq.

12Tsuingshiq rueq, “Kvruex waz kuex m-yuq lac httax yaq nguinz?” ngoz tueq wiz tueq.

“Ngaz rueq tuiuz mauk,” ngoz tueq tvralc tueq.

Muik Hvlx wvnc tueq lvmz Pharise Nuk rueq Wisoz tueq

13Tsuingshiq rueq kungkhux nuex muik juk yaungx wvnc tueq waz kuex Pharise nuk kox nuex shvlx wvnc tueq. 14Yesu rueq bok tv-nyelx vtueq vmuik tvhvlc kuq tueq raungnuiyq kuex Vguilc Raungnuiyq rvtueq. 15Pharise nuk rueq laukshiz hulawx piq muik yvmx khoc maq lac hvlx kaz tvnx lvmx kuex wiz tueq. Kvruex waz rueq, “Vpiq rueq bok maq ngvy muik nuex nyvt kuq vtueq, ngaz rueq yuix nuex hoal koq tueq muik kvkhic wvnc tueq,” ngoz tueq tvralc tueq.

16Pharise nuk wvyvmc rueq, “Kvruex waz kuex Vguilc Raungnuiyq tvrac phvnx muq ningkhvnc nuex Tishox kox wawc vkaz rvmuq shvmx,” ngoz tueq.

Wvyvmc rueq, “Mvrax vhttax miqsaz rueq vwangc juing romzyac kuex yvmx khoc lac tvkhic lot shvnx?” ngoz tueq. Kvkhoc tsuingshiq kuex vdvmz dvmz thuinz raz muq yaungx wvnc tueq.

17Kvkhoc rvtueq Pharise nuk rueq muik mawz waz muex, “Mmuik tvhvlc kuq kv-phux waz kuex mkhoc lix miq lac rvtvnx?” ngoz tueq laukshiz wiz yek tueq.

Kvruex waz rueq, “Vpiq kuex shvmmax rvtueq,” ngoz tueq tvralc tueq.

18Yuq muinz Yuda miqsaz vyungx vlaungx bix rueq kungkhux nuex piq muik mawz yaungx tueq kvmac muinz, majuiuc vmuik kvkhic hvlx kaz tueq kvmac muinz kvmx muq ningkhvnc nuex, vnyuiuz nuiyc vwaz kuex gvl vtueq wiz tueq. 19Tsuingshiq rueq, “Vruex waz kuex nuimnueyc saz doc haz? Vjawc maq phuex muik mawz dodoc haz? Kvkhoc doc rvtueq ngoz ruiux kuex piq majuiuc yvmx khoc maq lac vmuik kvkhic kaz tvnx?” ngoz tueq wiz tueq.

20Vnyuiuz nuiyc vwaz rueq, “Vruex waz kuex nvnueyc saz rvtueq, piq kuex vjawc maq phuex muik mawz dodoc rvtueq. 21Yuq muinz piq muik hvlx kaz tueq lvmx kuex nvnueyc rueq muinz tuiuz miq, ukhaq rueq wuez piq muik tvhvlc kuq tvnx piq muex wiz shuinz, piq muinz miq laungx shex ningkhvnc nuex piq lvmz piq rueq jungx kuq shuex!” ngoz tueq. 22Vnyuiuz vwaz rueq kvkhoc jungx tueq kuex Yuda miqsaz vyungx vlaungx bix muex hiz ningkhvnc nuex rvtueq. Yvmx khoc lac ngoz ruiux lec Yesu kuex Mesia rvtueq ngoz tueq ngoc jix waz ukaq yuq muinz Yuda miqsaz vjux thoz yuimx wawc tvdungc gay tvkoc Yuda miqsaz vyungx vlaungx bix rungx raz yoalx shex rvtueq. 23Kvkhoc rvtueq vnyuiuz nuiyc vwaz rueq, “Piq kuex miq laungx shex, piq muex wiz shuinz!” ngoz tueq jungx tueq.

24Tsuingshiq rueq kungkhux nuex muik mawz yaungc jix waz kuex lauk nueyc ngoc yaungc gvl vtueq, “Tishox khaungkac nuex rvkhauk laz jungx shuiuz, mnoz muex muik tvhvlc kuy jix waz kuex mvrax vhttax waz rvtueq lvmz nuiyshiq rueq tuiuz vshix,” ngoz tueq.

25Kvruex waz rueq, “Vpiq kuex mvrax vhttax shuex vguez wuez ngaz rueq tuiuz mauk, yuq muinz ngaz rueq tuiuz vshaungx lvmz kuex, ngvy muik kungkhux nuex khiz mauk vruez majuiuc ngvy muik khiz lvp vshaungx lvmz vdvyx tuiuz vshaungx,” ngoz tueq tvralc tueq.

26Tsuingshiq rueq, “Vpiq rueq mnoz muex yvmx khoc lac rvkuq phvnx? Mmuik kuex yvmx khoc lac tvhvlc kuq phvnx?” ngoz tueq wiz tueq.

27Kvruex waz rueq, “Nuimshiq muex ngaz rueq laukshiz jungx kuq phaungx tueq nuimshiq rueq tay wuez muit, yvmx ngoz tueq lac laukshiz tay roc yek vshuinx? Nuimshiq muinz vpiq sangac hez muex yaungc roc haz?” ngoz tueq ngoz kuq tueq.

28Tsuingshiq rueq piq muex shummarc vtueq, “Mnoz dvyx juex vpiq sangac rvtoq, nuiyshiq kuex Moshe kungjix hez rvtiq. 29Tishox rueq Moshe muex bomjungc kuq tueq kuex nuiyshiq rueq tuiuz vshix, vruex waz kuex m-wawc vkaz wuez tuiuz miq!” ngoz tueq.

30Kvruex waz rueq, “Vpiq kuex ngvy muik tvkhic tvhvlc kuy jix waz rvtueq! Yuq muinz vpiq kuex m-wawc vkaz lac rvtvnx nuimshiq rueq tuiuz muit ningkhvnc nuex vwangc juing rvtueq! 31Mvrax vhttax jix kvjaz kuex Tishox rueq tay kuq muq kuex naungshiq rueq tuiuz vshix; vpiq muex tvtsanc vtueq vpiq thuinroc shuimc kay jix htenc kvjaz kuex tay kuq yaq. 32Vnyuiuz bukdungc muik mawz waz muex miq washiz rueq muik tvkhic tvhvlc kuq tueq ngoz tueq lvmz kuex raungx phaungc ghaq waungc maq phuex mkaq muinz tay miq. 33Vruex waz kuex Tishox kox wawc vkaz rvmuq ngoz ruiux kuex vpiq rueq yvmx muinz shuimx lot muq,” ngoz tueq tsuingshiq muex tvralc tueq.

34Tsuingshiq rueq, “Mnoz kuex mnyuiuz wuk mungx maq phuex mvrax vhttax maq vyungx luz wvnc kvraq ix nuiyshiq muex tvluing kuq vphux ix?” ngoz tueq vjux thoz yuimx wawc tvdung yurc gay tueq.

Siyac Muik Mawz Kay lvmz

35Kvkhoc yurc gay tueq lvmz kuex Yesu rueq tay vtueq, kvruex waz rulc rvhumc tueq nuex, “Miq Saz kvmac mnoz kvmx vtuiux haz?” ngoz tueq wiz tueq.

36Kvruex waz rueq, “Taungjix lex, ngaz vpiq muex kvmluimx muex Miq Saz kuex mruex jix waz lac rvtvnx,” ngoz tueq tvralc tueq.

37Yesu rueq, “Vpiq kuex mnoz rueq vkhic wuez shex, majuiuc mnoz rulc kvjak yaq waz kvruex rvtueq,” ngoz tueq piq muex jungx tueq.

38Kvkaq piq rueq, “Taungjix lex, ngaz kvmx vtaungx!” ngoz vtueq vpiq khaungkac nuex bumx ruiux nawk tueq.

39Yesu rueq, “Muik mawz jix waz muik khic wvnc tvkoc nuiyc muik khiz yaq jix htenc muik tvmawz tvkoc phoc kuy muex mungkawx nuex ngaz httuiuc kaz tauk,” ngoz kuq tueq.

40Vpiq hep nuex httax yaq Pharise nuk rueq kvruex kvjaz kuex tay vtueq, “Nuiyshiq muinz muik mawz jix jvnc ngoz tueq haz ngoz vshuiux?” ngoz tueq wiz tueq.

41Yesu rueq, “Nuimshiq kuex muik mawz ngoz ruiux yuq mvrax vguez rvkhvmz tuit; yuq muinz majuiuc kuex nuimshiq rueq muik maq khiz vshix, ngoz tueq kv-ngoc tuinx, kvkhoc ningkhvnc nuex nuimshiq rueq mvrax lvp vshuinx,” ngoz tueq ngoz kuq tueq.

ప్రస్తుతం ఎంపిక చేయబడింది:

YOHAN 9: HNOT01

హైలైట్

షేర్ చేయి

కాపీ