YOHAN 8
8
Vlvp Rvhumc tueq Sahtok Nyuiuz
[ 1Kvruex yimaq tsuingshiq kuex miqmac yuimx nuex yek wvnc wuez tueq, yuq muinz Yesu kuex Olip Kanx nuex kaz wvnc tueq. 2Raungnvp kvyix raungnvp saz maq Shomc Yuimx nuex kaz yek tueq. Miq lotlaz rueq vpiq kuex tvroz tuimx wvnc tueq, vpiq ngaungc vtueq tsuingshiq muex tvluing kuq tueq. 3Tvrac tvluingc waz hez nuiyc Pharise nuk rueq yalxjuik nyuiuz shiz kuex sahtok yaungc baunglaung lvp vtueq shvlx laq tueq, piq kuex tsuinghez max nuex tvjvp tueq. 4Tsuingshiq rueq Yesu muex, “Tvluingc waz lex, yalxjuik nyuiuz vruex kuex sahtok yauk shuimx yaq wawc lvp tiq. 5Vkhoc jix yalxjuik nyuiuz kuex lung maq tuip thvy gay rax ngoz tueq Moshe Tvrac nuex naungshiq muex nvr shec phuex. Majuiuc mnoz rueq yvmx khoc lac ngoz shuiux?” ngoz tueq vpiq muex wiz tueq.#Lew 20:10; Tvrac 22:22-24 6Tsuingshiq rueq vpiq muex mvrax tvgurc tvkoc kvkhoc taruiyx wiz tueq. Yuq muinz Yesu kuex bumx vtueq vyauk shix maq ghaq nuex wuiyq tueq.
7Tsuingshiq rueq vpiq muex wiz ruq wiz laq koq tueq vpiq rueq kac lawc vtueq, “Nuimshiq phungc wawc mvrax vguez miq washiz rueq kungkhux lung maq tuip phaungc shuinz,” ngoz tueq tsuingshiq muex ngoz kuq tueq. 8Kvkhoc ngoz kuq ruiux vpiq kuex bumx vtueq ghaq nuex wuiyq yek tueq. 9Tsuingshiq kuex vpiq rueq kvkhoc jungx tueq kvjaz kuex tay wuez vtueq, nyuiuz waz rulx maq phaungc vtueq washiz shiz maq kaz wvnc wuez tueq. Kvkaq Yesu kuex vpiq dvyx shex kvjungx kaz tueq, yalxjuik nyuiuz kvmuinz piq jvp juing nuex jvp yaq kuex khiz tueq. 10Yesu rueq kac lawc yek vtueq, “Yalxjuik nyuiuz lex, tsuingshiq yvmx baung nuex lac kaz wvnc vtvnx? Mnoz muex uraq muinz phox kuq muq shex haz?” ngoz tueq wiz tueq.
11Kvruex nyuiuz kvraq, “Taungjix lex, uraq muinz phox kuq muq,” ngoz tueq tvralc tueq.
Kvkaq Yesu rueq, “Ngaz rueq muinz mnoz muex phox kuq mauk, waung wvnc kuiuz yix maq laukshiz mvrax nauk shuimx kaz shex,”] ngoz kuq tueq.#8:11 Mvnnuex wawc yauk maq vwuiyq Greek vsawc luik vpaung kox nuex nuiyc mvnnuex vlayc wuiyq shec vsawc luik htenc nuex 8:1-11 vruex vguez. Vganc Greek kvjaz maq vsawc luik vkez nuex kuex Yoh 21:24 maq yix kox nuex jix httax yaq. Vganc Greek luik vkez nuex kuex Luk 21:30 maq yix kox nuex jix httax yaq. Vsawc luik vkez vshiz nuex Yoh 7:36 maq yix kox nuex httax yaq.
Yesu kuex Mungkawx Raungwuic
12Yesu rueq Pharise nuk muex jungx yek tueq kuex, “Ngaz kuex mungkawx raungwuic rvtauk. Ngvy yix phvnc jix waz kuex rullungx raungwuic lvp wvnc vtueq mkaq muinz raungnyauk nuex khuemx tuex rvmuq,” ngoz tueq.#Mat 5:14; Yoh 9:5
13Pharise nuk rueq vpiq muex, “Mnoz kuex mlvmz mnoz rueq dvyx hakhix khvmc vshuiux ningkhvnc nuex vyaq rvtueq,” ngoz tueq.#Yoh 5:31
14Yesu rueq, “Ngaz rueq ngvy lvmz hakhix khvmc vshaungx yuq muinz ngvy hakhix kuex vlvmx rvtueq, yvmx khoc lac ngoz ruiux lec ngaz kuex m-wawc vdung lac, m-yuq waungc wvnc juing lac ngaz rueq tuiuz vshaungx, nuimshiq rueq ngaz kuex m-wawc vkaz lac mkox nuex waungc wvnc jix lac tuiuz muit. 15Nuimshiq rueq miqsaz tvrac maq dvyx phox vshuinx; ngaz rueq ukhaq muex muinz phox kuq mauk. 16Mkhoc shoc maq ngaz rueq phox kuq ix ngoz ruiux yuq, ngaz rueq phox kuq shaungx lvmz kuex rvkhauk laz, ngvy tvkay jix Iwaz muinz ngaz rulc vdvmz nuex httax yaq. 17Nuimshiq Tvrac nuex miq wanueyc rueq hakhix khvmc ruiux lec vlvmx rvtueq ngoz tueq wuiyq taq tueq. 18Ngaz kuex miqmac lvmz hakhix khvmc vshaungx, ngvy tvkay jix waz Iwaz rueq muinz ngvy lvmz nuex hakhix khvmc yaq,” ngoz tueq.
19Kvkaq tsuingshiq rueq vpiq muex, “M-waz kuex m-yuq lac?” ngoz tueq wiz tueq.
Yesu rueq, “Nuimshiq rueq ngaz muinz Iwaz muinz tuiuz muit, ngaz tuiuz ruiux yuq kuex Iwaz muinz tuiuz shuinx,” ngoz tueq tvralc tueq.
20Vruex kvjaz htenc kuex Shomc Yuimx wawc shomc kuy juing jep tvy juing khok maq Yesu rueq tvluing kuq yaq nuex vjungx kvjaz htenc rvtueq. Yuq muinz vpiq vkhing max httuiuc shauk ningkhvnc nuex uraq muinz vpiq kuex lvp lot muq.
Ngaz Kaz Taungx nuex Nuimshiq Kaz Lot muit
21Yesu rueq tsuingshiq muex jungx yek tueq kuex, “Ngaz kuex waung wvnc taungx, nuimshiq rueq ngaz thuiyx phuinx, yuq muinz nuimshiq kuex miqmac mvrax ningkhvnc nuex vthueyc rvwvnc tuinx, ngaz waung wvnc taungx kvyuq nuimshiq httuiuc lot muit,” ngoz tueq.
22Kvkhoc rvtueq Yuda miqsaz vrangx vpangx vhttax jix hez rueq, “Ngaz waung wvnc taungx kvyuq nuimshiq httuiuc lot muit, ngoz tueq jungx yaq kuex vpiq hosic kvthvy shuex dvnc shvnx?” ngoz wuez tueq.
23Yesu rueq, “Nuimshiq kuex mungkawx khung wawc rvtuit, ngaz kuex raunghtauk wawc vkaz rvtauk. Nuimshiq kuex mungkawx vwawc rvtuit, ngaz kuex vruex mungkawx vwawc rvmuq. 24Kvkhoc rvtueq nuimshiq kuex miqmac mvrax nuex thueyc tuinx ngoz tueq ngaz rueq jungx vphaungx, ‘Ngaz kuex ngaz ngoz vshaungx waz rvtauk,’ kuex nuimshiq kvmluimx muit ngoz ruiux yuq nuimshiq miqmac mvrax nuex dvyx thueyc tuinx,” ngoz tueq.
25Tsuingshiq rueq vpiq muex, “Mnoz kuex ukhaq lac?” ngoz tueq wiz tueq.
Yesu rueq, “Ngaz ukhaq lac rvtauk nguinx kuex vphaungc maq phuex nuimshiq muex jungx kuq phaungx shex. 26Ngaz rueq nuimshiq lvmz nuex seng vtueq vjungc juing paunghvlc httax yaq, nuimshiq muex mvrax tvgurc juing muinz paunghvlc httax yaq, Yuq muinz ngvy tvkay jix waz kuex tsuingrux waz rvtueq, vpiq kox wawc ngaz rueq tay wvnc tauk tanc khvnc dvyx mungkawx nuex jungx vshaungx,” ngoz tueq.
27Yesu rueq Vwaz nuex tvhungx vtueq jungx yaq kuex tsuingshiq rueq tuiuz muq. 28Kvkhoc rvtueq Yesu rueq, “Nuimshiq rueq Miq Saz vruex raungx nuex tsomz gay ruiux jix, ‘Ngaz kuex ngaz ngoz vshaungx waz rvtauk,’ kvmuinz, ngaz kuex ngvy vrangx vpangx maq yvmx muinz shuimx mauk, Iwaz rueq ngaz muex tvluing kuq yaq kvrulc rv-ngvlc dvyx jungx vshaungx lvmz kuex nuimshiq rueq tuiuz wvnc shuinx. 29Ngvy tvkay jix waz kuex ngaz rulc vroc nuex httax yaq, vpiq rueq raungc raq lvmx yauk shuimc kuex ngaz rueq mkaq muinz shuimx vshaungx ningkhvnc nuex vpiq rueq ngaz dvyx gay shec phuex rvmuq,” ngoz tueq.
30Yesu rueq kvkhoc jungx tueq kvjaz htenc tay jix miq paunghvlc kuex vpiq muex kvmluimx wvnc wuez tueq.
Dungwvnc jix nuiyc Dax
31Kvkhoc rvtueq Yesu rueq vpiq muex kvmluimx jix miqsaz htenc muex, “Nuimshiq kuex ngaz rueq tvluing shaungx kvkhoc shuimx kaz ruiux yuq, ngvy sangac shauk nuimshiq rvtuit; 32nuimshiq rueq tsuingrux lvmx kuex tuiuz vshuinx, tsuingrux lvmx kvraq nuimshiq kuex palc tvdung wvnc kv-phuinx,” ngoz tueq.#Rom 6:14; 8:2; Yak 1:25
33Tsuingshiq rueq, “Nuiyshiq kuex Abraham suiuz vsaz rvtiq, mkaq muinz miq dax muex yaungx miq, ‘Nuimshiq kuex dax wawc dung wvnc tuinx,’ ngoz tueq yvmx ruemc lac ngoz vshuiux?” ngoz tueq tvralc tueq.#Mat 3:9; Luk 3:8
34Yesu rueq tsuingshiq muex, “Ngaz rueq nuimshiq muex vsuing jungx kuq ix, mvrax yauk shuimc jix waz kuex mvrax dax waz rvtueq. 35Dax ngoz yaq kuex yuimx taungx vshiz nuex httax hvt httax tuex rvmuq, vsaz kuex mkaq muinz yuimx nuex httax yaq. 36Kvkhoc rvtueq Vsaz rueq nuimshiq kuex tvdung ruiux yuq, nuimshiq kuex vsuing dungc wvnc rvhumc tuinx. 37Nuimshiq kuex Abraham phvnx vmaq rvtuit lvmx ngaz rueq tuiuz yaq, yuq muinz ngaz rueq tvluing vshaungx lvmx nuimshiq rueq lvp wvnc muit ningkhvnc nuex ngvy thvy gay tvkoc hunglaungx vtuinx. 38Ngaz kuex Iwaz rueq tvkhic kuq phuex rulc rv-ngvlc dvyx jungphvnx vshaungx, yuq muinz nuimshiq kuex nuimshiq waz rueq jungphvnx yaq rulc rv-ngvlc shuimx vshuinx,” ngoz tueq tsuingshiq muex tvralc tueq.
39Tsuingshiq rueq, “Nuiyshiq jix vwaz kuex Abraham rvtueq,” ngoz tueq tvralc tueq.
Yesu rueq, “Nuimshiq kuex vsuing Abraham suiuz vsaz ngoz ruiux kuex Abraham rueq shuimx wvnc tueq kvkhoc shuimx khvmz tuit. 40Tishox kox wawc vtay wvnc tsuingrux lvmx nuimshiq muex tvtay jungc jix waz ngaz kuex thvy gay tvkoc nuimshiq rueq dvnc vshuinx, Abraham rueq kvkhoc shuimx wvnc muq doc! 41Nuimshiq kuex nuimshiq waz rueq shuimx yaq ikhoc shuimx vshuinx,” ngoz tueq.
Tsuingshiq rueq, “Nuiyshiq kuex saqphan sahez rvmuq, Tishox vpiq kuex nuiyshiq muex vshiz dvyx Vwaz rvtueq,” ngoz tueq.
42Yesu rueq tsuingshiq muex, “Tishox kuex nuimshiq waz ngoz ruiux yuq nuimshiq rueq ngaz lungwawx khvmz phuinx, yvmx khoc lac ngoz ruiux lec ngaz kuex Tishox kox wawc kaz vtueq majuiuc vyuq httuiuc kaz tauk. Ngvy vrangx vpangx maq vkaz rvmuq, vpiq rueq ngaz kuex tvkaz phuex. 43Ngaz rueq jungphvnx vshaungx lvmx kuex yvmx ngoz tueq lac nuimshiq rueq tuiuz muit rvlaq shuinx, nuimshiq rueq ngvy bomjungc kuex tay wvnc muit ningkhvnc nuex rvtueq. 44Nuimshiq kuex nuimshiq waz ngoz vshuinx htaungc piq sahez rvtuit, kvkhoc ningkhvnc nuex nuimshiq waz thuinroc lvmx kuex phvnx vtueq shuimx kaz vshuinx, htaungc waz kuex vphaungc vyaungc maq phuex miq thvy jix waz rvtueq, piq htauk nuex tsuingrux lvmx vguez ningkhvnc nuex tsuingrux lvmx nuex httax lot muq. Piq kuex vrot vkaq bomjungc jix waz rvtueq, piq kuex vrot waz muex vwaz rvtueq, miqmac gvnngvmx thuinz rulc rv-ngvlc vrot vkaq dvyx jungx thenc yaq.#Mat 13:38; 1Yoh 3:8; Yud 6 45Ngaz rueq tsuingrux lvmx jungc ningkhvnc nuex nuimshiq kuex ngaz muex kvmx muit. 46Ngvy htauk nuex mvrax vhttax ngoz tueq uraq lac tvkhic kuq lot phuinx? Ngaz rueq tsuingrux lvmx jungx phaungx tueq yvmx ngoz tueq lac ngaz muex kvmx muit? 47Tishox kox wawc vkaz miq rueq kuex Tishox kvjaz tay yaq, yuq muinz nuimshiq kuex Tishox kox wawc vkaz rvmuit ningkhvnc nuex kvjaz tay muit,” ngoz tueq.
Yesu nuiyc Abraham
48Tsuingshiq rueq Yesu muex, “Mnoz kuex Samaria miqsaz rvtoq nuiyc htaungc kvpumz jix waz rvtoq ngoz vphix kuex rvkhauk laz rvmuq haz?” ngoz tueq wiz tueq.
49Yesu rueq, “Ngaz kuex htaungc kvpumz jix waz rvmuq, ngaz kuex Iwaz muex tvtsanc nganc vshaungx, nuimshiq rueq dvyx ngaz muex shummarc vphuinx. 50Ngaz kuex miqmac tvtsanc nganc lvmz thuiyx vshaungx rvmuq. Yuq muinz ngvy muingc jungc thuiyx kuq vtueq ngvy kox maq phoc kuy jix washiz httax yaq. 51Ngaz rueq nuimshiq muex vsuing jungx kuq ix, ngvy kvjaz tay vtueq phvnc jix waz kuex mkaq muinz vthueyc rvhumc muq,” ngoz tueq tvralc tueq.
52Tsuingshiq rueq, “Mnoz kuex htaungc kvpumz vtuiux lvmx majuiuc nuiyshiq rueq vsuing tuiuz tiq shex! Abraham nuiyc shvmmax bix htenc kuex vthueyc wvnc wuez shex, kvkhoc rvyruiux mnoz rueq, ‘Ngvy kvjaz tay jix waz kuex mkaq muinz vthueyc rvhumc tuex rvmuq,’ ngoz tueq ngoz vshuiux. 53Mnoz kuex vthueyc kay wuez nuiyshiq jix vwaz Abraham htauk nuex muinz vyungx haz? Shvmmax bix htenc muinz vthueyc kay wuez, mnoz miqmac nuiyc miqmac kuex ukaq ngoz tueq lac kv-ngoc vtuiux?” ngoz tueq wiz tueq.
54Yesu rueq, “Ngvy shauk pumz kuex ngaz rueq tvtsanc nganc vshaungx ngoz ruiux, ngaz rueq tvtsanc nganc vshaungx kuex khuec guez dvyx rvtueq. Ngaz muex tvtsanc nganc jix waz kuex Iwaz rvtueq, vpiq kuex nuimshiq Tishox ngoz tueq ngoz vshuinx. 55Yuq muinz vpiq kuex nuimshiq rueq tuiuz muit, ngaz rueq dvyx tuiuz vshaungx, mkhoc shoc maq ngaz rueq muinz tuiuz mauk ngoz ruiux kuex, ngaz muinz nuimshiq kvkhoc vrot vkaq jungc jix waz muex yaungx taungx, ngaz rueq Iwaz kuex vsuing tuiuz vtueq vpiq kvjaz kuex tay vshaungx. 56Nuimshiq jix vwaz Abraham kuex ngaz httuiuc kaz taungx vkhing kuex khiz shuex ningkhvnc nuex kokez yaq, piq rueq kvruex vkhing kuex khiz vtueq shuenruenz yaq,” ngoz tueq tvralc tueq.
57Yuda miqsaz rueq, “Mnoz kuex rullungx wawc rok bv-ngac doc muinz max httuiuc rvyruiux Abraham kuex khiz toq shex haz?” ngoz tueq vpiq muex wiz tueq.
58Yesu rueq, “Ngaz rueq nuimshiq muex vsuing jungx kuq ix, Abraham max jawx nuex phuex ngaz vhttax rvtauk,” ngoz tueq tvralc tueq.
59Kvkaq tsuingshiq rueq vpiq kuex lung maq tuip gay muex lung tsenz wuez tueq. Yuq muinz Yesu kuex vyumx maq Shomc Yuimx wawc dung kaz tueq.
ప్రస్తుతం ఎంపిక చేయబడింది:
YOHAN 8: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
