YOHAN 5
5
Yuix Jumx Kawx wawc Vthuiuz Waz tvhvlc
1Kvruex yimaq Yuda miqsaz nawk palx htungx nuex seng vtueq moalx vshiz vhttax rvtueq, Yesu kuex Yerusalem nuex yuz kaz tueq. 2Yerusalem ghaq wawc khelbuenx kaluix hep nuex Hebre kvjaz maq Betzatha#5:2 Betzatha: Bethesda vruex muingc htenc kuex rv-ngvlc dvyx rvtueq. ngoz yaq yuix jumx vshiz httax yaq. Kvyuq chox tap#5:2 chox tap: Chox tap kuex miq ngaungc chuing tap vtvbuz guirx ngoc rvtueq. bv-ngac guirx taq tueq. 3Kvruex chox tap kvyuq vthuiuz vsac jix nuiyc muik mawz jix, yaz kuix jix, gvnz maungx jix miq paunghvlc httax yaq. 4(Tishox raungkamx washiz kuex vlox lox dvyx yuix jumx kvyuq svt kaz ruiux vtueq, yuix kuex tvmoay ningkhvnc nuex tsuingshiq rueq yuix tvmoay kuex bvmc ruiux shuex, kvkhoc yuix kvmoay ruiux yuq, kungkhux yuix mungx nuex svt jix waz kuex thuiuz vsac hvlx wvnc ruiux yaq.)#5:4 Manuscript: Mvnnuex wawc manuscripts wvyvmc nuex pvlruinx 3b-4 vruex lomx muq. 5Kvruex yuq wawc 38 thuiuz jix miq washiz lomx yaq. 6Yesu rueq kvruex waz woalc yaq kuex khiz vtueq, vthuiuz vsac vluz shex rvtueq kuex tuiuz vtueq, kvruex waz muex, “Mnoz vhvlc wvnc roc haz?” ngoz tueq wiz tueq.
7Kvruex vthuiuz waz kvraq, “Taungjix lex, yuix bvlunz yaq kvkaq yuix jumx kvyuq ngvy tvhoalc kuy jix vguez ningkhvnc nuex, ngaz kvhoalc shex ngoz ruiux lec, ngvy max nuex miq kungkhux kvhoalc kaz yaq,” ngoz tueq tvralc tueq.
8Yesu rueq piq muex, “Kvtenc kuiuz mkhoz mkhvy phawc kuex shuimx vtueq khuemx waung kuiuz,” ngoz kuq tueq. 9Kvkaq dvyx vthuiuz waz kuex hvlx wvnc tueq, piq khoz vkhvy phawc kuex pix ruiux khuemx waung wvnc tueq.
Kvruex raungnuiyq kuex Vguilc Raungnuiyq rvtueq. 10Kvkhoc rvtueq vthuiuz hvlc kay jix waz kvmac Yuda miqsaz htenc rueq, “Majuiuc raungnuiyq kuex Vguilc Raungnuiyq rvtueq, mnoz kuex khoz vkhvy phawc pix vshuiux kuex naungshiq Tvrac muex yaq vtuiux,” ngoz kuq tueq.#Dw 20:10; Neh 13:19; Yer 17:21; Mat 12:2; Mak 2:24
11Piq rueq tsuingshiq muex, “Ngvy tvhvlc kuy jix waz rueq mkhoz mkhvy phawc kuex pix wvnc vtueq khuemx waung kuiuz ngoz tueq tvwaung phuex,” ngoz tueq tvralc tueq.
12Tsuingshiq rueq, “Mnoz muex khoz vkhvy phawc kuex pix wvnc vtueq khuemx wvnc kuiuz ngoc jix waz kuex ukhaq lac?” ngoz tueq wiz tueq.
13Yuq muinz hvlx kaq tueq waz rueq piq muex kvkhoc nvrc jix waz kuex ukhaq wuez raz tvnx piq rueq tuiuz muq, yvmx khoc lac ngoz ruiux lec Yesu kuex nuk miqsaz phungc wawc kvhelc muq maq dungc wvnc ningkhvnc nuex rvtueq.
14Kvruex yimaq Yesu rueq Shomc Yuimx mungx nuex kvruex waz kuex khiz vtueq, “Tay shuiuz, majuiuc mnoz vhvlx shex; kungkhux wawc htauk nuex muinz vjvnc mnoz nuex yaungx wvnc muq mruez kueq, mvrax nauk shuimx kaz shex,” ngoz tueq jungx kuq tueq.
15Kvruex waz kuex kaz wvnc vtueq piq tvhvlc kuy jix waz kuex Yesu rvtueq lvmx Yuda miqsaz muex jungx kuq tueq. 16Vguilc Raungnuiyq Yesu rueq tvhvlc kuy yauk shuimc shuimc ningkhvnc nuex, kvruex raungnuiyq maq phaungc vtueq vpiq kuex mulx tsvlx wvnc tueq. 17Yesu rueq tsuingshiq muex, “Iwaz kuex mkaq muinz yauk shuimc wawc thauk kay ngoz tueq vguez, kvrulc rv-ngvlc ngaz rueq muinz shuimc juing rvtueq,” ngoz tueq tvralc tueq. 18Ekvkhoc ngoc ningkhvnc nuex muinz Vguilc Raungnuiyq tvrac yanc gay dvyx muinz rvmuq, Tishox ngoc vpiq waz ngoz tueq ngoz ruiux, vpiq shauk pumz kuex Tishox rulc tv-ngvlc tvy ningkhvnc nuex muinz, Yuda miqsaz htenc rueq vpiq kuex vthvy gay tvkoc dvnc wvnc wuez tueq.
Vsaz Vrangx Vpangx
19Kvkhoc rvtueq Yesu rueq tvralc tueq, “Ngaz rueq nuimshiq muex vsuing jungx kuq ix, Vsaz rueq kuex miqmac thuinroc maq yvmx muinz shuimx lot shuex rvmuq, Vwaz rueq shuimc kay kuex khiz vtueq jix shuimx kaz yaq. Vwaz rueq shuimx yaq lotlaz kuex Vsaz rueq muinz kvkhoc shuimx shuex. 20Vwaz rueq Vsaz kuex lungwawx ningkhvnc nuex, vpiq rueq shuimx yaq phvnx htenc kuex Vsaz muex tvkhic kuq yaq. Vruex htauk nuex muinz yunghvlc yauk shuimc kuex Vwaz rueq Vsaz muex tvkhic kuq shuex ningkhvnc nuex nuimshiq lotlaz vwangc rvwuez tuinx. 21Iwaz rueq vmaungx jix htenc kuex tvyuing tvtenc vtueq rullungx tvraungx kuq wvnc tueq ikhoc Vsaz rueq muinz vpiq thuinroc jix muex rullungx tvraungx kuq tueq. 22Vwaz rueq vpiq pumz maq ukhaq muex muinz phox kuq muq. Vphoc vthamc vkhangx lotlaz kuex Vsaz muex lekuq shec tueq. 23Kvkhoc rvtueq miq htenc rueq Vwaz muex tvtsanc nganc yaq rulc rv-ngvlc Vsaz muex muinz tvtsanc nganc shuex. Vsaz muex tvtsanc nganc muq waz kuex Vsaz nvrc tvkay jix waz Vwaz muex tvtsanc nganc muq rvtueq.
24“Ngaz rueq nuimshiq muex vsuing jungx kuq ix, ngvy kvjaz tay vtueq ngaz nvr tvkaz phuex waz muex kvmluimx jix waz kuex pattup rullungx lvp wvnc shuex, piq kuex vphoc rvhumc muq maq vthueyc juing wawc rullungx tvraungx juing nuex kvlayc wvnc tuex. 25Ngaz rueq nuimshiq muex jungx kuq ix, vthueyc kay wuez jix htenc rueq Tishox Saz thuic bomc kuex tay wvnc lvp vkhing httuiuc wvnc tuex, kvruex vkhing kuex majuiuc doc muinz httuiuc wvnc vtuex shex. Kvruex tay wvnc jix hez kuex rullungx tvraungx httax tuex. 26Vwaz vpiq shauk pumz kuex rullungx pauk rvtueq rulc rv-ngvlc, vpiq rueq Vsaz kvmuinz rullungx pauk tvyaungc tueq. 27Vpiq kuex Miq Saz rvtueq ningkhvnc nuex khac phoc vkhangx muinz vpiq muex lekuq shec tueq. 28Vruex lvmx vmac nuimshiq nauk wangc wuez kaz, luip ruiuz khux wawc vmaungx jix htenc kuex vpiq thuic bomc kuex tay vtueq kvtenc dungc wvnc vkhing httuiuc wvnc tuex. 29Vhvlx honc vyaungc shuimc kay jix htenc kuex yuing kvtenc wvnc vtueq rullungx tvraungx wvnc tuex, honc vbac shuimc kay jix htenc kuex khac phoc rvhumc tvkoc vthueyc wawc yuing tvtenc wvnc rvhumc tuex.#Esa 26:19; Dan 12:2; 1Kor 15:52; 1Thes 4:16
Yesu lvmz Hakhix Khvmc jix Hez
30“Ngaz rueq ngvy vrangx vpangx maq yvmx muinz shuimx lot mauk, ngaz kuex Tishox rueq jungx yaq rulc rv-ngvlc dvyx phox kuq vshaungx, ngaz rueq phox vshaungx kuex vlvmz rvkhauk laz rvtueq, yvmx khoc lac ngoz ruiux lec ngaz kuex ngvy thuinroc lvmx phvnx mauk, ngvy nvrc tvkay jix waz vpiq thuinroc dvyx phvnx vshaungx rvtueq.
31Ngvy lvmz kuex ngaz rueq dvyx hakhix khvmc ruiux yuq, ngaz rueq khvmc shaungx hakhix kuex rvkhauk laz rvmuq. 32Yuq muinz ngvy lvmz hakhix khvmc jix vganc washiz httax yaq. Kvruex waz rueq ngvy lvmz hakhix khvmc yaq kuex rvkhauk laz rvtueq lvmx ngaz rueq tuiuz vshaungx. 33“Nuimshiq rueq Yohan kox nuex kamx waz bix tvkaz tuit, piq rueq tsuingrux lvmx kox nuex hakhix khvmc yaq.#Yoh 1:19-27; 3:27-30 34Ngvy lvmz kuex miq washiz shiz rueq hakhix khvmc tvkoc roc vtueq rvmuq, nuimshiq palc daungc wvnc rvhumc kuinz ngoz tueq vruex lvmz ngaz rueq jungx vphaungx rvtueq. 35Yohan kuex wvrluic tuz lez yaq wvrkok ikhoc yaungx kv-phuinx tueq nuimshiq kuex piq phelez yaq kvyuq rvmak laz kokez roc vshuinx. 36Yuq muinz ngaz rueq lvp taq tauk hakhix kuex Yohan rueq khvmc yaq hakhix htauk nuex muinz vyungx rvtueq. Yvmx khoc lac ngoz ruiux lec Iwaz rueq ngaz muex kuq vtueq ngaz rueq shuimx vshaungx htenc rueq muinz, ngaz kuex Iwaz rueq vtvkaz rvtueq lvmz hakhix khvmc kuq yaq. 37Ngvy tvkay jix waz Iwaz rueq muinz ngvy lvmz hakhix khvmc kuq yaq. Nuimshiq rueq mkaq muinz Iwaz thuic vbomc kuex tay muit doc, vpiq shvmx muinz khiz muit.#Mat 3:17; Mak 1:11; Luk 3:22 38Vpiq rueq vtvkaz waz muex nuimshiq kvmluimx muit ningkhvnc nuex, nuimshiq thuinz vmungx nuex vpiq bomjungc kuex kop muq. 39Rumvrc luik nuex thuiyx ruiux pattup rullungx kuex humc shix ngoz tueq nuimshiq rueq tvmaung vtueq, kvruex luik kuex tvhttoarc tv-phaungx thuiyx vshuinx, kvruex Rumvrc luik kvraq dvyx ngvy lvmz kuex hakhix khvmc kuq yaq! 40Kvkhoc rvyruiux rullungx tvraungx lvp wvnc tvkoc nuimshiq kuex ngaz kox nuex kaz roc muit.
41“Ngaz kuex miq rueq tvtsvmc kvmc kuy lvmz thuiyx vshaungx rvmuq. 42Yuq muinz nuimshiq yvmx khoc miq htenc lac rvtuinx nuiyc nuimshiq thuinz vmungx nuex Tishox muex lungwawc thuinz httax muq kuex ngaz rueq tuiuz yaq. 43Ngaz kuex Iwaz vrangx vpangx maq httuiuc kaz phaungx muinz nuimshiq rueq ngaz lvp wvnc muit, vganc jix miq washiz shiz kuex piq vrangx vpangx maq httuiuc kaz ruiux yuq nuimshiq rueq piq kuex lvp wvnc shuinx. 44Nuimshiq kuex vdvmz dvmz tvtsvmc kvmc kuy dvyx roc vshuinx, yuq muinz vshiz dvyx httax yaq Tishox muex tvtsvmc kvmc tvkoc kuex hunglaungx muit. Kvkhoc rvtueq nuimshiq kuex ngaz muex yvmx khoc lac kvmluimx tuinx? 45Ngaz rueq Iwaz khaungkac nuex nuimshiq muex mvrax nyvnc phuex ngoz tueq nauk tvmaung kaz, nuimshiq muex mvrax nyvnc kuy jix waz kuex nuimshiq thuinz tvluimc vshuinx waz Moshe rvtueq. 46Moshe muex nuimshiq kvmluimx ruiux yuq kuex, ngaz muex muinz kvmluimx tuinx, yvmx khoc lac ngoz ruiux lec ngvy lvmz kuex piq rueq wuiyq taq shec tueq. 47Yuq muinz nuimshiq kuex piq rueq vwuiyq shec lvmx htenc kvmac kvmx muit ningkhvnc nuex ngvy kvjaz kuex yvmx khoc lac kvmx tuinx?” ngoz tueq tsuingshiq muex ngoz tueq.
ప్రస్తుతం ఎంపిక చేయబడింది:
YOHAN 5: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
