YOHAN 4
4
Yesu nuiyc Samaria Shvlx
1Yesu rueq Yohan htauk nuex muinz vjvnc yuix luip lvmz kuq vtueq sangac tvyaungc yaq kuex Pharise nuk rueq tay tueq. 2(Vsuing ngoz ruiux, Yesu vpiq rueq yuix luip khvmc kuq tueq rvmuq; vpiq sangac bix rueq dvyx khvmc kuq yaq rvtueq.) 3Kvkhoc Pharise nuk rueq tay tueq lvmx kuex Yesu rueq tay vtueq, Yuda mungx maq dung kaz wvnc ruiux Galile mungx nuex yek waung tueq. 4Vpiq kay juing lvmx kuex Samaria mungx maq yanc wvnc juing rvtueq.
5Vpiq kuex Samaria mungx Sichar ngoz yaq ghaq kvyuq httuiuc waung tueq, kvruex ghaq kuex Yaku rueq vsaz Yosep muex vkuq ghaqphux hep nuex rvtueq.#V.V 33:19; Yosh 24:32 6Kvruex yuq Yaku yuix jumx httax yaq, Yesu kuex lvmx khuemc nyec hvlc ningkhvnc nuex kvruex yuix jumx hep kvyuq ngaungc tueq. Kvruex baunglaung kuex shalhtungx rvtueq.
7Samaria shvlx nyuiuz shiz yuix khoay kay httuiuc kaz tueq, Yesu rueq jungx tueq kuex, “Ngaz muex vnuingc juing yuix kuq koq,” ngoz tueq kvruex nyuiuz kox wawc thoz tueq. 8(Vpiq sangac bix kuex kez wawc phuiuz svy rez kay baunglaung rvtueq.)
9Samaria shvlx rueq, “Mnoz kuex Yuda miqsaz phvnx washiz rvtoq rvyruiux, yvmx ngoz tueq lac yuix vnuingc juing kuex ngaz Samaria shvlx yauk wawc thoz vphux,” ngoz tueq. (Yvmx khoc lac ngoz ruiux lec Yuda miqsaz htenc kuex Samaria miqsaz htenc rulc kok vpanx tvroc shuimx muq rvtueq.)#2Hokh 17:24; Ezra 4:1-5; Neh 4:1-2; Luk 9:52-53; Kamx 10:28
10Yesu rueq, “Tishox rueq vkuq kejux yauk noalc kvmuinz, mnoz kox wawc vnuingc juing yuix thoz jix waz kvmuinz mnoz rueq tuiuz ruiux yuq, mnoz rueq vpiq kox wawc thoz ruiux, vpiq rueq mnoz muex rullungx tvraungx juing yuix kuq kv-phux,” ngoz tueq tvralc tueq.
11Yalxjuik nyuiuz rueq, “Taungjix lex, mnoz rueq yuix khoay juing muinz vguez, yuix jumx muinz thuiuz hvlc rvtueq. Kvkhoc rvtueq mnoz rueq yvmx wawc lac rullungx tvraungx juing yuix kuex lvp shuiux? 12Naungshiq jix vwaz Yaku rueq vruex yuix tumz kuex naungshiq muex kuq shec phuex rvtueq; piq nuiyc vsaz hez, nuiyc piq nyvmx saz htenc rueq muinz vruex wawc nuingx wuez tueq. Mnoz kuex naungshiq jix vwaz Yaku htauk nuex muinz vyungx haz rvtonx?” ngoz tueq.
13Yesu rueq, “Yuix vruex nuingc jix waz ukhaq yuq muinz vkhvmx svy rvhumc yek tuex, 14yuq muinz ngaz rueq kuy dvnc vshaungx yuix vruex nuingc jix waz kuex mkaq muinz khvmx svy rvhumc tuex rvmuq. Ngaz rueq kuy juing yuix vruex kuex piq tvkoc pattup rullungx lvp wvnc juing yuix ruilx yaungx wvnc tuex,” ngoz tueq tvralc tueq.
15Kvkaq yalxjuik nyuiuz rueq, “Taungjix lex, ngaz mkaq muinz khvmx svy rvhumc mauk tvkoc nuiyc vruex wawc yuix khoay kay muinz rac muq juing kvruex yuix kuex kuq nuingx koq,” ngoz tueq thoz tueq.
16Yesu rueq, “Waung kuiuz mtaungx waz kuex gvl laq vtueq kaz yek loq,” ngoz tueq.
17Yalxjuik nyuiuz rueq, “Ngaz kuex itaungx waz vguez,” ngoz tueq tvralc tueq.
Yesu rueq, “Ngaz itaungx waz vguez ngoz vshuiux kuex rvkhauk laz rvtueq. 18Mtaungx waz bv-ngac shex httax tueq, majuiuc vhttax waz kuex mtaungx waz rvmuq. Mnoz rueq jungx vshuiux kuex vsuing rvtueq,” ngoz tueq piq muex jungx tueq.
19Yalxjuik nyuiuz rueq, “Taungjix lex, mnoz kuex shvmmax rvtoq lvmx ngaz rueq tuiuz lvp tauk. 20Nuiyshiq Samaria jix vwaz tamx rueq vruex kanx vyuq Tishox muex nawk palx wuez tueq, yuq muinz nuimshiq Yuda phvnx rueq kuex Yerusalem maq dvyx Tishox muex nawk palx kuy rax ngoz vshuinx,” ngoz tueq.
21Yesu rueq piq muex, “Yalxjuik nyuiuz lex, ngvy kvjaz muex kvmx kuiuz, Vwaz muex vruex kanx vmaq muinz, Yerusalem maq muinz nawk palx rac muq juing vkhing httuiuc wvnc tuex. 22Nuimshiq Samaria miqsaz kuex miqmac rueq ukhaq muex lac nawk palx vshuinx rvkhauk laz tuiuz muit; nuiyshiq Yuda miqsaz rueq kuex miqmac rueq tuiuz vshix waz muex nawk palx vshix, yvmx khoc lac ngoz ruiux lec palc daungc wvnc lvmx kuex Yuda miqsaz kox wawc jix httuiuc kaz tueq. 23Yuq muinz nawk palx jix miqsaz htenc rueq Vwaz muex Tishox Siyac luimc vkawc maq tsuingrux nawk palx vkhing httuiuc wvnc tuex, majuiuc doc muinz httuiuc wvnc yaq, kvkhoc nawk palx kuex Vwaz rueq raungc raq yaq. 24Tishox kuex Siyac rvtueq ningkhvnc nuex vpiq muex nawk palx jix htenc rueq muinz vpiq Siyac luimc vkawc maq rvkhauk laz nawk palx lvp wuez shuex rvtueq,” ngoz tueq jungx kuq tueq.
25Yalxjuik nyuiuz rueq vpiq muex, “Mesia httuiuc kaz tuex lvmx kuex ngaz rueq muinz tuiuz yaq. Kvruex waz httuiuc kaz tuex yuq nuiyshiq muex vpiq rueq phvnx ruip saz lvmx jungx tvkhic kuq phuex,” ngoz tueq.
26Yesu rueq, “Mnoz rulc kvjak yaq waz ngaz kuex, vpiq rvtauk,” ngoz tueq tvralc tueq.
27Kvruex baunglaung vpiq sangac hez yek woz koq tueq, vpiq kuex yalxjuik nyuiuz shiz rulc rvbomc nyamc yaq kuex khiz vtueq vwangc rvwuez tueq. Yuq muinz yalxjuik nyuiuz muex, “Mnoz muex yvmx lac rax yaq nguinx?” ngoz tueq muinz, Yesu muex, “Yvmx ngoz tueq lac yalxjuik nyuiuz rulc kvjak naungx vtuiux?” ngoz tueq muinz uraq muinz wiz khvmc muq.
28Kvkaq yalxjuik nyuiuz rueq gvmtuik kuex tvy shec ruiux, ghaqyungx nuex yek waung vtueq nuk miqsaz htenc muex tvtay jungx waung tueq kuex, 29“Ngaz rueq shuimx kaz wvnc tauk htenc ngaz muex jungx kuy jix miq washiz kuex lawc kaz luit, vpiq kuex Mesia wuez rvtvnx?” ngoz tueq. 30Kvkhoc rvtueq miq htenc kuex ghaqyungx maq Yesu kox nuex kaz wuez tueq.
31Kvruex baunglaung sangac bix rueq, “Tvluingc waz lex, phuiuz vsvy phauk saq shuiuz!” ngoz tueq vpiq muex jungx tueq.
32Yuq muinz vpiq rueq, “Nuimshiq rueq tuiuz muit phvnx phuiuz svy ngaz rueq lvp taq tauk,” ngoz tueq tvralc tueq.
33Kvkhoc ngoz koq tueq sangac hez rueq, “Miq washiz shiz rueq vpiq muex phuiuz vsvy kuq tueq ngoc juing,” ngoz tueq rvwiz wuez tueq.
34Yesu rueq, “Ngvy tvkay jix waz thuinroc lvmx shuimc phvnc nuiyc vpiq rueq kuq phuex yauk shuimc tvlot laz shuimc kuex ngvy phuiuz vsvy rvtueq. 35‘Yapix lex bvlic htvmx yix maq tsvmz gvnc jauz httuiuc tuex,’ ngoz tueq rvjungc vtuinx. Yuq muinz ngaz rueq nuimshiq muex jungx kuq ix, nax ruix htenc kuex vhvlx waq lawc tvtsuingc shuinz; tsvmz htenc vmuinx shex, vgvnc jauz shex httuic wvnc vtuex! 36Tsvmz gvnc jix waz kuex yauk mauk lvp wvnc vtueq pattup rullungx tvkoc vthuey vngoz tvjomx taq yaq. Kvkhoc rvtueq tsvmz wuinc jix waz nuiyc vgvnc jix waz kuex vdvmz nuex kokez wuez yaq. 37‘Washiz rueq wuinc ruiux, washiz rueq gvnc yaq,’ ngoz tueq jungx yaq kvjaz kuex rvkhauk laz rvtueq. 38Nuimshiq rueq khic yuingc muit nax wawc vthuey vngoz kuex gvnc tvjomx tvkoc nuimshiq kuex ngaz rueq nvr tvkaz vphaungx, vganc jix htenc rueq kuex vkhic yuingc dvyx rvtueq, nuimshiq rueq kuex vjux lvp wvnc tuit,” ngoz tueq tsuingshiq muex jungx tueq.
39Samaria shvlx rueq, “Ngaz rueq shuimx wvnc tauk phvnx htenc lotlaz vpiq rueq ngaz muex jungx kuq phuex,” ngoz tueq hakhix kvjaz kvmac, kvruex ghaqyungx wawc Samaria miqsaz htenc Yesu muex kvmluimx wvnc tueq. 40Kvkhoc rvtueq Samaria miqsaz htenc Yesu kox nuex httuiuc kaz vtueq tsuingshiq rulc vroc httaz tvkoc vpiq kuex tvthauk koq tueq, Yesu kuex kvruex ghaq nuex nuiyq nueyc guilc shec tueq.
41Vpiq bomjungc ningkhvnc nuex kvmluimx jix miq paunghvlc paung wvnc tueq. 42Yalxjuik nyuiuz kvmac tsuingshiq rueq jungx tueq kuex, “Majuiuc nuiyshiq vpiq muex kvmluimx vtix kuex mkvjaz ningkhvnc nuex rvmuq, vpiq bomjungc kuex nuiyshiq rueq tay lvp wvnc vtueq vruex waz kuex mungkawx palc wvnc jix waz muik shauk rvtueq kuex nuiyshiq rueq tuiuz tiq shex,” ngoz tueq.
Yesu rueq Vyungx Vlaungx Washiz Saz tvhvlc
43Kvyuq raungnuiyq nueyc httax shec vtueq, Yesu kuex Galile mungx nuex kvtenc waung wvnc tueq. 44Shvmmax kuex miqmac mungx maq muingc jungc vhvlx lvp muq ngoz tueq Yesu rueq vpiq pumz maq jungx wvnc tueq rulc rv-ngvlc kvtenc waung wvnc tueq.#Mat 13:57; Mak 6:4; Luk 4:24 45Yesu kuex Galile mungx nuex httuiuc waung tueq, kvkaq Galile miqsaz htenc rueq vpiq malc wvnc wuez tueq, yvmx khoc lac ngoz ruiux lec Yerusalem nuex moalx yaq Tvlvy Wvnc Moalx nuex tsuingshiq shauk pumz httuiuc kaz vtueq moalx baunglaung vpiq rueq shuimx kaz wvnc tueq yauk shuimc htenc kuex khic ningkhvnc nuex rvtueq.#Yoh 2:23; 3:2; Tvrac 16:16
46Kvruex yimaq Yesu kuex vpiq rueq yuix wawc svpiq tix tvyaungc tueq Galile mungx Kana ghaq nuex httuiuc kaz yek tueq. Kvruex ghaq kvyuq vyungx vlaungx miq washiz httax tueq, vsaz miqwaz saz Kapernaum ghaq nuex thuiuz hvlc rvtueq.#Yoh 2:1-11 47Yesu kuex Yuda mungx maq Galile mungx nuex httuiuc waung tueq lvmz piq rueq tay lvp ningkhvnc nuex Yesu kox nuex piq kaz vtueq, Kapernaum nuex vsaz thuiuz hvlc thueyc wvnc khvmkhvmz kuex tvhvlc kuy kay tvkoc jungx tueq. 48Yesu rueq, “Nuimshiq kuex vwangc juing romzyac khiz muit ngoz ruiux kuex nuimshiq vshiz raung muinz mkaq muinz kvmluimx tuinx rvmuq,” ngoz tueq piq muex jungx tueq.
49Vyungx vlaungx waz rueq, “Taungjix lex, isaz max pat kaz shauk nuex kaz ix,” ngoz tueq jungx tueq.
50Yesu rueq piq muex, “Waung kuiuz msaz kuex phenz wvnc vtuex!” ngoz kuq tueq.
Kvruex waz kuex Yesu kvjaz muex kvmx vtueq waung wvnc tueq. 51Piq kuex lvmx nuex baunglaung piq nvrc waz hez rueq lvmx wawc humc kaz vtueq, “Msaz kuex phenz wvnc vtuex shex,” ngoz tueq jungx tvtay tueq.
52Piq rueq vthuiuz phenz wvnc tueq kuex mtanc khvnc nuex lac ngoz tueq tsuinghez muex wiz koq tueq, “M-yac raungnuiyq raungyac kox shalhtaz shiz nuex vkalc suingx wvnc tueq,” ngoz tueq tvralc tueq. 53Kvkhoc rvtueq vwaz rueq rvwvl lvp tueq kuex, “Msaz kuex phenz wvnc vtuex,” ngoz tueq Yesu rueq piq muex jungx kuq tueq vkhing nuex rvtueq kuex tuiuz lvp tueq. Kvkhoc rvtueq piq nuiyc vyuimx wuinz htenc kuex kvmluimx wvnc wuez tueq.
54Vruex kuex Yuda mungx maq Galile mungx nuex Yesu waung vtueq lauk nueyc ngoc yaungc tvkhic kuq tueq vwangc juing romzyac rvtueq.
ప్రస్తుతం ఎంపిక చేయబడింది:
YOHAN 4: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
