YOHAN 15
15
Yesu kuex Svpiq Ruiuz Muik Shauk
1Yesu rueq, “Ngaz kuex svpiq ruiuz muik shauk rvtauk; Iwaz kuex sunc taungjix waz rvtueq. 2Ngaz nuex vthuey thuey muq vphak vnoz htenc kuex vpiq rueq vguiy rvgay shuex, vthuey thuey yaq phak vnoz htenc kuex penc tsawc vtueq vthuey paunghvlc mthuey kueq ngoz tueq penc tsawc shuex. 3Nuimhez kuex ngaz rueq nuimhez muex tvluing kuq vphaungx kvjaz ningkhvnc nuex majuiuc doc muinz sawc riric hvlc shex rvtuit. 4Ngaz nuex rvwak wuez kuinz, ngaz muinz nuimshiq nuex rvwak vtaungx. Svpiq phak vnoz kuex vruiuz jungx nuex tsung muq ngoz ruiux yuq, vthuey thuey lot muq ikhoc nuimshiq muinz ngvy duix nuex rvwak muit ngoz ruiux kuex vthuey thuey lot muit rvtuinx.
5“Ngaz kuex svpiq ruiuz rvtauk, nuimshiq kuex vphak vnoz htenc rvtuit. Ukhaq yuq muinz ngaz nuex rvwak vtueq ngaz muinz kvruex waz nuex rvwak ruiux yuq, kvruex waz kuex vthuey paunghvlc thuey tuex, ngaz rulc rv-phvlc ruiux yuq kuex nuimshiq rueq yvmx muinz rvlot muit. 6Ngaz nuex rvwak muq waz kuex yuz phic nuex tuip gay rvhumc vtueq, shanx wvnc yaq vphak vnoz ikhoc yaungx wvnc tuex, miq rueq kvkhoc vphak vnoz kuex tvjomx tsenz vtueq wvr nuex jauk gay koq tueq khamc gay tueq. 7Nuimshiq kuex ngaz nuex rvwak vtueq ngvy kvjaz vruex muinz nuimshiq nuex rvwak ruiux kuex, nuimshiq rueq thoz shuinx phvnx htenc kuex lvp wvnc shuinx. 8Nuimshiq kuex vthuey vngoz paunghvlc thuey ningkhvnc nuex Iwaz ngauz vngax kuex tvdung kuq tuit, kvkhoc maq nuimshiq kuex ngvy sangac hez muex yaungx wvnc tuit. 9Iwaz rueq ngaz lungwawx yaq ikhoc ngaz rueq nuimshiq kuex lungwawx vphaungx; ngvy lungwawc nuex rvwak wuez kuinz. 10Ngaz kuex Iwaz rueq nvr yaq kvjaz htenc tay phvnx vtueq, vpiq lungwawc nuex rvwak vtaungx ikhoc, nuimshiq muinz ngaz rueq nvrc bomc htenc kuex tay phvnx ruiux kuex ngvy lungwawc nuex rvwak wuez tuinx.
11“Ngvy kokez thuinz kuex nuimshiq nuex httax vtueq, nuimshiq kokez kuex mvrc wvnc tvkoc kvjaz vruex ngaz rueq nuimshiq muex vjungc kuy wuez shex rvtueq. 12Ngaz rueq nuimshiq muex lungwawx vphaungx ikhoc, nuimshiq vdvmz dvmz rvlungwawc wuez kuinz, vruex kuex ngaz rueq nvrc bomc rvtueq.#Yoh 13:34; 15:17; 1Thes 4:9; 1Pet 4:8; 1Yoh 3:11,23; 4:21; 2Yoh 5 13Kungjix bix tvkoc miqmac rullungx lekuy gay nuex httuiuc laz lungwawc thuinz httax yaq htauk nuex lvy vtueq lungwawc thuinz kuex vguez shex. 14Nuimshiq kuex ngaz rueq nvr phaungx kvjaz tay phvnx ruiux kuex nuimshiq kuex ngvy kungjix hez rvtuit. 15Ngaz rueq nuimshiq kuex nvrc waz hez ngoz tueq ngoz mauk shex, yvmx khoc lac ngoz ruiux lec nvrc waz kuex jiyungx waz rueq shuimx yaq yauk shuimc kuex tuiuz muq. Ngaz rueq nuimshiq kuex kungjix ngoz tueq shex ngoz phaungx, yvmx khoc lac ngoz ruiux lec Iwaz kox wawc ngaz rueq tay wvnc tauk phvnx ruip saz kuex ngaz rueq nuimshiq muex vjungc kuy wuez shex. 16Nuimshiq rueq ngaz thvl wvnc phuinx rvmuq, nuimshiq kaz wvnc vtueq vthuey vngoz paunghvlc thuey ngoz muex nuiyc vthuey kuex phaungx ngaungx tvkoc ngaz rueq nuimshiq kuex thvl wvnc vtueq tvhungx taq vphaungx. Kvkhoc rvtueq ngvy muingc ruingc vtueq nuimshiq rueq Vwaz kox wawc thoz vshuinx phvnx htenc kuex nuimshiq muex kuq kv-phuinx. 17Kvkhoc rvtueq nuimshiq vdvmz dvmz rvlungwawc wuez kuinz, ngoz tueq ngaz rueq nvr vphaungx.
Mungkawx Rvshuiuc Rvpac
18“Mungkawx miqsaz rueq nuimshiq muex max shuiuc pac nuex dvyx ngaz muex kungkhux shuiuc pac phuex lvmz kuex rvwvl taq shuinz. 19Nuimshiq kuex mungkawx vrulc seng yaq ngoz ruiux yuq, mungkawx miqsaz htenc rueq miqmac ngvmx nvp jix ikhoc nuimshiq kuex lungwawx khvmz kv-phuinx. Yuq muinz ngaz rueq nuimshiq kuex mungkawx vwawc thvl wvnc phaungx ningkhvnc nuex vruex mungkawx vrulc seng muq shex; kvkhoc rvtueq mungkawx miqsaz rueq nuimshiq kuex shuiuc pac yaq. 20‘Dax kuex jiyungx htauk nuex vyungx rvmuq,’ ngoz tueq ngaz rueq nuimshiq muex jungx kuq phaungx kvjaz kuex rvwvl wuez shuinz, mungkawx miqsaz rueq ngaz vruex guirguenz ruiux yuq, nuimshiq muinz guirguenz kv-phuinx, mkhoc shoc maq tsuingshiq rueq ngvy kvjaz vruex tay ruiux kuex nuimshiq kvjaz kvmuinz tay shuex.#Ezk 3:7; Mat 10:24; Luk 6:40; Yoh 13:16 21Yuq muinz tsuingshiq rueq ngvy tvkay jix waz kuex tuiuz muq rvtueq ngvy muingc ningkhvnc nuex vguirc vguenc lvmz lotlaz nuimshiq muex ruez kv-phuinx. 22Ngaz kaz vtueq tsuingshiq muex jungphvnx kuq kaz mauk ngoz ruiux kuex tsuingshiq nuex mvrax vguez rvtuex; majuiuc kuex tsuingshiq rueq mvrax shuimx wvnc tueq lvmz mvrax wawc dung wvnc laz juing yvmx khoc muinz khawx gay lot muq shex. 23Ngvy shuiuc pac jix waz kuex Iwaz muex muinz shuiuc pac jix waz rvtueq. 24Miq uraq muinz ruez lot muq phvnx htenc kuex ngaz rueq tsuingshiq muex shuimx tvkhic kuq mauk ngoz ruiux kuex, tsuingshiq rueq mvrax lvp muq rvkhvmz tueq; majuiuc kuex tsuingshiq kuex ngaz rueq shuimx wvnc tauk yauk shuimc htenc kuex khiz wvnc tueq shex, kvkhoc rvtueq ngaz muinz Iwaz muinz shuiuc pac wuez yaq. 25Vkhoc shuiuc yaq lvmz kuex tsuingshiq Tvrac luik nuex, ‘Mvrax vguez yuq muinz tsuingshiq rueq ngaz kuex shuiuc pac wuez yaq,’ ngoz tueq wuiyq shec tueq kuex hungx wvnc tvkoc rvtueq.#Tvts 35:19; 69:4
26“Tishox nuex seng yaq tsuingrux lvmx kuex tvkhic kuy jix Romc Kuy jix Waz ngoz yaq Siyac kuex Vwaz kox wawc httuiuc kaz tuex. Vpiq kuex Iwaz kox wawc nuimshiq kox nuex ngaz rueq tvkaz phaungx, vpiq rueq ngvy lvmz hakhix khvmc shuex. 27Nuimshiq muinz vphaungc maq phuex ngaz rulc vdvmz nuex httax vtuinx ningkhvnc nuex ngvy lvmz hakhix khvmc wuez shuinz, ngoz tueq.
ప్రస్తుతం ఎంపిక చేయబడింది:
YOHAN 15: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
