YOHAN 14
14
Vwaz Kox nuex Httuiuc juing Lvmx kuex Yesu
1Yesu rueq, “Nuimshiq thuinz nauk tvbac kaz Tishox muex kvmluimx wuez kuinz, ngaz muex muinz kvmluimx kuit. 2Iwaz yuimx nuex httaz juing khok paunghvlc httax yaq, nuimshiq tvkoc httaz juing tvyoalc muex ngaz waung wvnc taungx. Kvkhoc vguez ngoz ruiux kuex, vhttax ngoz tueq ngaz rueq nuimshiq muex jungx phaungx rvmuq. 3Kvkhoc ngaz waung vtueq nuimshiq tvkoc httaz juing tvyoalc waung ruiux, ngaz httax taungx baung kvyuq nuimshiq muinz httax lvp laz, ngaz yek kaz yek vtueq nuimshiq kuex ngvy kox nuex shvlx wvnc phaungx. 4Ngvy waungc wvnc juing baung nuex httuiuc juing lvmx kuex nuimshiq rueq tuiuz vshuinx,” ngoz tueq.
5Thoma rueq, “Taungjix lex, mnoz m-yuq waungc wvnc lac nuiyshiq rueq tuiuz miq, kvruex baung kvyuq httuiuc juing lvmx kuex nuiyshiq rueq yvmx khoc lac tuiuz lot shix?” ngoz tueq vpiq muex jungx tueq.
6Yesu rueq piq muex, “Lvmx kuex ngaz rvtauk, tsuingrux nuiyc rullungx muinz ngaz rvtauk. Ngaz maq rvmuq ngoz ruiux kuex ukhaq muinz Iwaz kox nuex httuiuc lot muq. 7Majuiuc nuimshiq rueq ngaz tuiuz vphuinx shex ningkhvnc nuex Iwaz muinz tuiuz wuez shuinx, majuiuc vmaq phaungc vtueq Iwaz kuex nuimshiq rueq tuiuz vtueq vkhic muinz khiz lvp tuit,” ngoz tueq jungx kuq tueq.
8Philip rueq, “Taungjix lex, Vwaz kuex nuiyshiq muex tvkhic kuq koq, kvkhoc ngoz ruiux jix nuiyshiq thuinz suing tuex,” ngoz tueq.
9Yesu rueq, “Philip lex, ngaz nuimshiq rulc vtanc khvnc shex httax naungx vphaungx rvyruiux, mnoz rueq ngaz tuiuz muq dvyx ix? Ngvy khic jix waz kuex Vwaz muinz khiz lvp tueq. Mnoz rueq yvmx ngoz tueq lac, ‘Vwaz kuex nuiyshiq muex tvkhic kuq koq’ ngoz tueq ngoz vshuinx? 10Philip lex, ngaz kuex Iwaz rulc httax vtueq, Iwaz muinz ngaz rulc httax yaq lvmx kuex mnoz kvmx muq haz? Nuimshiq muex ngaz rueq jungx vphaungx kvjaz htenc kuex ngvy thuinz maq jungx vphaungx rvmuq, ngvy htauk nuex httax yaq Iwaz kuex vpiq yauk shuimc shuimx yaq rvtueq. 11Ngaz kuex Iwaz rulc httax vtueq, Iwaz muinz ngaz rulc httax yaq ngoz tueq jungx vphaungx kvjaz kvmac kvmx wuez kuinz; kvruex mac kvmx muit ngoz ruiux kuex ngaz rueq shuimx shaungx yauk shuimc kvruex lawc vtueq kvmx wuez kuinz. 12Nuimshiq muex ngaz rueq vsuing jungx kuq ix, ngaz muex kvmluimx jix waz kuex ngaz rueq shuimx vshaungx yauk shuimc kuex shuimx shuex, kvruex htauk nuex vyungx yauk shuimc muinz shuimx lvp shuex, yvmx khoc lac ngoz ruiux lec ngaz kuex Iwaz kox nuex woz wvnc taungx. 13Vsaz htauk maq Vwaz ngauz vngax tvkhic tvkoc ngvy muingc ruingc vtueq, nuimshiq rueq thoz shuinx htenc kuex ngaz rueq shuimx kuq phaungx. 14Ngvy muingc ruingc vtueq nuimshiq rueq yvmx phvnx yauk noalc dvyx ngoz ruiux muinz ngvy kox wawc thoz ruiux yuq, thoz shuinx rulc rv-ngvlc ngaz rueq shuimx vshaungx.
Vsawc Siyac Bomkhvmc
15“Nuimshiq rueq ngaz lungwawx vphuinx ngoz ruiux kuex ngaz rueq nvrc bomc htenc kuex tay phvnx wuez shuinx. 16Ngaz rueq Iwaz kox wawc thoz vtueq, nuimshiq rulc vroc nuex mkaq muinz httax vtueq, nuimshiq muex romc kuy jix washiz kuq kv-phuinx. 17Vpiq kuex Tishox nuex seng yaq tsuingrux lvmx tvkhic kuy jix Siyac rvtueq. Mungkawx rueq vpiq kuex khiz muq, tuiuz muq ningkhvnc nuex lvp wvnc wuez muq. Yuq muinz vpiq kuex nuimshiq rueq tuiuz vshuinx, yvmx khoc lac ngoz ruiux lec vpiq kuex nuimshiq rulc roc nuex httax vtueq, nuimshiq thuinz vmungx nuex httax yaq.
18“Ngaz waung wvnc taungx nuex, nuimshiq kuex nojix sahez ikhoc gay shec phaungx rvmuq; nuimshiq kox nuex ngaz kaz yek raungx. 19Mtanc httax muq nuex mungkawx rueq ngaz khiz lvp muq shex rvshuex, yuq muinz nuimshiq rueq ngaz khiz yek phuinx; yvmx khoc lac ngoz ruiux lec ngaz tvraungx taungx vkhoc nuimshiq muinz tvraungx wuez tuinx. 20Ngaz kuex Iwaz rulc httax vtaungx kvmuinz, nuimshiq kuex ngaz rulc httax vtueq, ngaz muinz nuimshiq rulc httax taungx kvmuinz kvruex raungnuiyq jix nuimshiq rueq tuiuz shuinx.
21“Ngaz rueq nvrc bomc htenc kuex tay phvnc jix waz kuex ngvy lungwawc jix waz rvtueq. Ngvy lungwawc jix waz kuex Iwaz rueq muinz lungwawx shuex. Ngaz rueq muinz piq kuex lungwawx vtueq, ngvy shauk pumz kuex piq muex tvkhic kuq shaungx,” ngoz tueq jungx tueq.
22(Yuda Iskarut rvmuq waz) vganc Yuda rueq, “Taungjix lex, mungkawx muex mshauk pumz kuex tvkhic kuq muq maq, yvmx khoc lac nuiyshiq muex dvyx tvkhic kuq lot phux?” ngoz tueq wiz tueq.
23Yesu rueq, “Ngvy lungwawc jix waz ngoz ruiux kuex ngaz rueq tvluing kuq shaungx vruex phvnx shuex. Iwaz rueq piq kuex lungwawx shuex. Iwaz nvnueyc kuex piq kox kvyuq kaz vtueq piq rulc vdvmz nuex httax naungx tix. 24Ngaz muex lungwawx muq waz kuex ngaz rueq tvluing kuq shaungx vruex phvnx muq. Nuimshiq rueq tay wvnc tuit tvluingc kuy kvjaz kuex ngvy kvjaz rvmuq, ngvy tvkay jix waz Iwaz kox wawc vkaz rvtueq.
25“Nuimshiq rulc vdvmz nuex httax tauk ikaq vhtenc vruex ngaz rueq nuimshiq muex jungx kuq wvnc phaungx shex. 26Ngvy muingc maq Iwaz rueq tvkaz shuex Romc Kuy jix Waz ngoz yaq Vsawc Siyac rueq nuimshiq muex phvnx ruip saz tvluing kuq vtueq, ngaz rueq nuimshiq muex jungx vphaungx kvjaz lotlaz kuex nuimshiq rueq rvwvl lvp wvnc shuinx.
27“Nomic kuex nuimshiq muex ngaz rueq taq kuq shec phaungx. Ngvy nomic kuex nuimshiq muex ngaz rueq kuq vphaungx, mungkawx miqsaz rueq kuq yaq kvkhoc rvmuq. Nuimshiq thuinz maq nauk rvwvl kaz, nauk hiz kaz. 28‘Majuiuc ngaz waung wvnc ruiux yuq muinz nuimshiq kox nuex yek kaz yek raungx,’ ngoz tueq jungx phaungx kvjaz kuex nuimshiq rueq tay wvnc tuit shex, Iwaz kuex ngvy htauk nuex vyungx rvtueq, kvkhoc rvtueq nuimshiq rueq ngaz lungwawx ruiux yuq, Iwaz kox nuex ngaz waung wvnc taungx kvmac nuimshiq vkoz kez rvwuez tuinx. 29Vruex lvmx htenc yaungx wvnc tuex nuex nuimshiq kvmluimx wvnc tvkoc majuiuc tvluz nuex phuex ngaz rueq jungx kuq vphaungx. 30Nuimshiq rulc paunghvlc kvjak lvp mauk shuex, yvmx khoc lac ngoz ruiux lec mungkawx guimz lawc jix waz kuex httuiuc wvnc yaq shex, piq rueq ngvy htauk nuex guimz juing luimc vkawc vguez. 31Yuq muinz ngaz rueq Iwaz lungwawx vshaungx lvmz kuex mungkawx rueq tuiuz tvkoc nuiyc Iwaz rueq ngaz muex jungx kuq phuex htenc kuex ngaz rueq phvnx vshaungx rvtueq.
“Kvtenc kuinz vmaq naunghez kaz wvnc ix, ngoz tueq.
ప్రస్తుతం ఎంపిక చేయబడింది:
YOHAN 14: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
