Génesis 50
50
1Joseqa tatanpa ayanta ojllaykuytawan, much'aykuspa waqarikorqa. 2Chaymantataj Joseqa jampejkunata kamacherqa Egipto llajtayojkunaj usunkuman jina tatanpa ayanta jampispa ch'akichinankupaj,#50.2 Egipto llajtayojkunaj usunku karqa, sumaj uyarisqa runaj ayanta jampiwan ch'akichina. Israelitakunarí mana chayta ruwajchu kasqanku. paykunataj ajinata ruwarqanku. 3Paykuna tawa chunka p'unchaypi Jacobpa ayanta ch'akicherqanku, imaraykuchus chay jina unaypi jampisqa ayaqa ch'akin.
Egipto llajtayojkunaqa Jacob wañupusqanta yachaspa, qanchis chunka p'unchayta llakiy p'achata churakuspa, waqarqanku. 4Wañojmanta yuyarikuspa, llakikuna p'unchay junt'akojtintaj, Joseqa faraonpa kamachinan wasipi kaj kamachikunawan parlarqa: Ama jina kaspa, tatay imatachus niwasqanta faraonman parlaripuwaychej. 5Tatayqa wañupunan qayllapi kashaspa, tiluchiwarqa wañupojtin paypa ruwachikusqan aya p'ampanaman ayanta p'ampamunayta.#Gn 47.29-31. Chayqa Canaán jap'iypi kashan. Noqa munayman faraón saqerinawanta tataypa ayanta p'ampamoj rinayta. P'ampakampuspataj, noqa kutimpusaj, nispa.
6Faraontaj nerqa: Riy ari, pay kamachisusqanman jina tataykej ayanta p'ampakampuy, nispa.
7Chantá Joseqa tatanpa ayanta apaspa, p'ampakampoj rerqa. Jinataj faraonta yanapajkuna, kurajkuna, chantá Egipto suyupi tukuy kurajkuna ima Joseta riyserqanku. 8Jinallataj Jacobpa tukuy ayllun, Josejpa ayllun, wawqenkuna ima paywan rerqanku. Gosenpeqa wawakunallata, chantá uywakunatawan imalla saqerqanku. 9Josewan ashkha runakuna rerqanku, carretakunapi, caballokunapi ima.
10Jordán mayoj chimpanpi Atadpa eranman chayaspataj, Jacobmanta maytapuni waqarikorqanku. Chaypi Joseqa tatanmanta llakikusqanrayku qanchis p'unchayta qhashqa p'achata churakuspa karqa. 11Chaynejpi tiyakojkuna Atad erapi chay jinatapuni waqasqankuta rikuspa, nerqanku: Egipto llajtayojkuna wañojninkumanta manchayta waqaspa p'ampayta yachasqanku, nispa. Chayrayku chay cheqata “Abel Mizrayin”, nispa suticharqanku. Chayqa Jordán mayoj inti llojsimuyninnejpi kashan.
12Jacobpa churinkuna tatankoj kamachisqanman jina ruwarqanku. 13Chayrayku Jacobpa ayanta Canaanman apaspa, Macpela chhanka jusk'upi p'amparqanku. Chaytaqa Abraham Jetpa churin Efronmanta rantikusqa, chaypi tukuy ayllun p'ampakunankupaj. Chay jallp'a, jinataj chhankapi jusk'oqa Mamremanta inti llojsimuynejpi kashan. 14Chantá José tatanpa ayanta p'ampaykuytawan, wawqenkunawan khuska, jinataj pikunachus riyserqanku chaykunawan, Egiptoman kutiporqa.
José wawqenkunata sonqochan
15Jacob tatanku wañupusqanmanta qhepata, Josejpa wawqenkuna ninakorqanku: Ichapis José noqanchejpaj phiñasqaraj kashaspa, payta tukuy mana allinta ruwasqanchejmanta kunan pagachikuwasunman, nispa. 16Chayrayku Joseman nichimorqanku: Tatanchej manaraj wañupushaspa, kayta qanman ninaykuta kamachiwarqayku: 17Wawáy, ama jina kaspa, wawqeykikuna millayta ruwaspa, qanpa contraykita juchallisqankuta qhespichiy ari, imaraykuchus paykuna mana allintachu ruwasorqanku, nispa. Chayrayku nirikusuyta munayku, qanpa contraykita ruwasqaykumanta qhespichinawaykuta. Ajinata ruway, imaraykuchus noqaykoqa tataykej Diosninpa kamachinkuna kayku, nispa.
Kachakuna ajinata willashajtinku, José waqayta qallarerqa. 18Chantá wawqenkunañataj Joseman rispa, paypa ñawpaqenpi qonqoriykukorqanku, pampakama k'umuykuspataj, nerqanku: Kunanmantapacha wata runayki kasqayku, nispa.
19Josetajrí paykunata nerqa: Ama manchachikuychejchu. Noqaqa mana Dioschu kani. 20Qankuna mana allinta ruwawayta munarqankichej, Diostajrí mana allin kajta allinman tukucherqa, kunan imatachus rikushasqaykichejta ruwananpaj, ashkha runata kawsachinanpaj ima. 21Chayrayku ama manchachikuychejchu. Noqaqa qankuna, jinataj wawaykichejkuna kawsanankupaj mikhunata qollasqaykichejpuni, nispa. Ajinata Joseqa wawqenkunata sonqocharqa, imaraykuchus manchay k'achata parlapayaykorqa.
22Chantá Josewan, tatanpa tukuy ayllunwan ima Egiptopi tiyakaporqanku. José 110 watata kawsarqa. 23Chayrayku pay churin Efrainpa wawankunaj allchhinkunata rikorqaraj. Jinallataj Manasesqa churin Maquirpa wawankunatapis arphin patapi uywarqaraj.
24Uj kuti Joseqa wawqenkunata nerqa: Noqaqa wañupusajña. Diostajrí qankunata yanapaspa, kay jallp'amanta orqhosonqachej. Chaymantataj, ima jallp'atachus Abrahamman, Isaacman, Jacobman ima tiluspa, qonanta nerqa, chay jallp'aman pusasonqachej, nispa. 25Chantá Joseqa Israelpa churinkunata tilucherqa: Diosqa cheqatapuni qankunata yanapaj jamonqa, chaypachataj qankuna tulluykunata kaymanta apankichej, nispa.
26José 110 watayoj kashaspa, wañuporqa. Chantá ayanta jampiwan ch'akichispa, Egiptopi p'ampana cajonman churaykorqanku.#50.26 Chaypacha Egipto suyupi usuman jina, wañojpa ayanta jampiwan ch'akichispa, sumaj ruwasqa cajonman churayta yachaj kasqanku. Chantá chay cajonta waj cajonman churallajtaj kasqanku. Cajonpa tapanpitaj wañojpa uyanta t'illmej kasqanku.
ప్రస్తుతం ఎంపిక చేయబడింది:
Génesis 50: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
