Génesis 49
49
Jacob manaraj wañupushaspa nisqan
1Chaymanta qhepaman Jacobqa churinkunata wajyachispa, nerqa: Qayllamuwaychej, noqataj nisqaykichej qhepanejman qankunawan imachus kananmanta:
2Jacobpa churinkuna, uyarinawaykichejpaj qayllamuychej,
tataykichej Israelta uyariychej.
3Rubén, qan kuraj kaj waway kanki.
Qan kuraj kaj churiy kanki, kallpaypi kashaspa yumasqay.
Maypaj qhawasqa kanapi, atiypipis ñawpajllapipuni karqanki.
4Chaywanpis kunanqa manaña kuraj kaj jina maypaj qhawasqachu kanki,
imaraykuchus qan mana sayachiy ashkha yaku rishaj jina kanki.
Qanqa ujnin warmiywan puñuykorqanki, ajinamantataj puñunayta ch'ichichaspa, manakajpaj qhawawarqanki.
5Simeonwan, chantá Leviwan ima wawqepura kanku,
Armankoqa kallpawan mana allinta ruwanapaj kanku.
6Tantakojtinku, mana paykunawan khuska kayta munanichu,
nitaj sutiy p'enqayta ruwasqankupi rikhurichunchu,
imajtinchus phiñasqa kashaspa, runakunata wañucherqanku.
Phiñasqa kasqankuwan apachikuspataj, torokunaj ankunkuta p'iterqanku.
7Millayta phiñakusqanku maldicisqa kachun,
arí, maldicisqa kachun k'arajta phiñakusqanku.
Noqarí Jacobpa miraynin ukhupi mirayninkuta ch'eqerachisaj,
Israel suyupitaj paykunata qhallirparisaj.
8Judá, wawqeykikuna mayta jatunchasonqanku.
Qan awqaykikunata kunkankumanta jap'inki,
wawqeykikunatajrí qanman k'umuykusonqanku.
9Judaqa león uña jina.
Jap'ej risqanmanta kutimuspa,
payqa jatun leonpis kanman jina winkuykun, chantá phinkiykun.
Pitaj payta t'ojpinmanri?
10Judá ayllumanta kamachina varata ni pi qhechonqachu.
Nillataj pipis mirayninpa makinmanta kamachina varata qhechonqachu varaj dueñon chayamunankama,
pichus tukuy kay pachata kamachenqa, chay.
11Payqa burronta uva sach'aman watan, burritontataj uvaj k'ullunman.
Chantá vinopi p'achanta t'ajsan, uva ch'irwasqanpitaj patanchana p'achanta t'ajsallantaj.
12Ñawenqa vinomantapis aswan puka,
kirunpis lechemanta aswan yuraj.
13Zabulón mama qocha kantunejpi tiyakonqa,
maymanchus barcokuna chayamunku, chaypi.
Jap'iyninpa mojonnintaj Sidonkama chayanqa.
14Isacar sumaj kallpayoj burro jina kanchanpi winkurikuspa, samarin.
15Samarina cheqaqa sumaj kasqanta rikorqa,
jinataj sumajta poqoj jallp'a kasqantapis qhawarqa.
Chayrayku wasanman q'epirichinankuta saqellarqa,
wata runankutaj karqa.
16Danqa Israelpata ujnin kaj ayllun jina ayllunpaj justiciata ruwanqa.
17Payqa ñan patapi katari jina kanqa.
Caballokunaj chakinkuta khanispa, caballopi rejta wasaman urmachenqa.
18Tata Diosníy, suyani qan qhespichinawaykita.
19Gadtaqa soldadokuna maqanakuspa, suwaj yaykuykonqanku.
Paytajrí qhepankumanta paykunawan maqanakoj yaykonqa.
20Aserqa ashkha mikhuna patapi kanqa,
kuraj kamachejkunaman sumaj mikhunata jaywanqa.
21Neftaliqa taruka jina munasqanpi purej,
k'achitu uña tarukitayoj jina.
22Joseqa yaku kantupi kashaj sach'a jina.
Sumajta poqon, thansantaj perqa pataman ch'iparikun.
23Paytaqa arcoyojkuna chejnerqanku,
jinataj mana khuyakuspa, arconkuwan flecharqanku, qhatiykacharqankutaj.
24Joséj makinrí sinch'i kallpayoj kaspa, arcota sumajta jap'in
Jacobpa atiyniyoj Diosninrayku,
Israelta michejrayku, waqaychajninraykutaj.
25Tataykej Diosnin qanta yanapasuchun.
Jinallataj Tukuy Atiyniyoj Dios saminchasuchun janajpa saminchayninkunawan,
ukhu mama qochaj saminchayninwan ima.
Qanmanta rikhurej warmikuna ashkha wawayoj kachunku.
26Tataykej saminchasusqanqa aswanmin jatun tataypa saminchawasqanmanta nisqaqa.
Mana tukukoj orqokunakama saminchaynin kanqa,
chay saminchaytaj Joséj umanpi sayachun,
pichus wawqenkuna chawpimanta ajllasqa karqa, chaypata.
27Benjaminqa phiña atoj jina,
imatachus jap'isqanta tutamanta mikhun,
ch'isiyaykuytataj puchusqanta rak'iran, nispa.
28Chaykuna Israelpa chunka iskayniyoj ayllunkuna kanku, tatankutaj ajinata sapa ujta samincharqa.
Jacob wañupun
29Chantá Jacob nillarqataj: Wañuy patapiña kashani. Wawaykuna, qankuna Jet llajtayoj Efronpa jallp'anpi kaj chhanka jusk'upi p'ampamuwankichej, maypichus ñawpa tataykuna p'ampasqa kashanku, chaypi. 30Chay chhanka jusk'oqa Canaanpi, Macpela chaypi, Mamré chimpapitaj. Chay jallp'ata jatun tatay Abraham jitita Efronmanta rantikusqa, ayllun p'ampakunankupaj. 31Chaypitaj Abrahamta, warmin Saratawan, Isaacta, warmin Rebecatawan ima p'amparqanku. Chayllapitaj noqa Leatapis p'amparqani. 32Chay jallp'ata, jinataj chhanka jusk'uta, jatun tatay Abrahamqa Jetpa churinkunamanta rantikusqa, nispa. 33Chayta churinkunaman niytawantaj, Jacobqa puñunanman siriykuspa, kikinpi wañuporqa. Ajinata Jacob ñawpa tatankunawan tinkukapoj riporqa.
ప్రస్తుతం ఎంపిక చేయబడింది:
Génesis 49: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
