Génesis 48
48
Jacobqa Efrainta Manasestawan saminchan
1Mana unaymanchu Joseman willarqanku tatan astawan onqoykapusqanta. Josetaj chayta yachaytawan, iskaynin churinkunata Manasesta, chantá Efraintawan ima pusariykukuspa, tatanta watukoj rerqa. 2Jacobmantaj willarqanku: Wawayki José watukoj jamusunki, nispa. Chayta yachaspa, Jacobqa ñak'ayta sayarispa, puñunanpi tiyarikorqa.
3Chantá Jacobqa Joseta nerqa: Tukuy Atiyniyoj Diosqa Canaanpi, Luz llajtapi rikhuriwaspa, saminchawarqa. 4Chaypachataj ajinata niwarqa: Noqa qanta ashkhata mirachisqayki, mirayniykimantataj suyukuna rikhurenqanku. Chay jawa, kay jallp'atapis mirayniykiman qopusaj wiñaypaj chayaqenku kananpaj, nispa.#Gn 28.10-22.
5Manaraj Egiptoman jamushajtiy, kaypi paqarej iskaynin churiykikuna Efrainwan, Manaseswan noqajta kanku, imaynachus Rubenwan, Simeonwan noqajta kanku, ajinata. 6Sichus kaymanta qhepaman waj wawaykikuna kanqankuraj chayqa, chaykuna qanpata kanqanku. Efrainpata, Manasespatawan wawqenku kasqankurayku paykunapis qanmanta chayaqeta jap'illanqankutaj.
7Noqa Padán Arammanta kutimushajtiy, Canaanpi Efrataman chayashajtiy, mamayki Raquel wañuporqa. Chantá Efrataman rina ñan qayllapi ayanta p'ampakaporqani. Kunan chaypa sutenqa Belén, nispa. Ajinata Israelqa Joseta nerqa.
8Chantá Israelqa Joséj churinkunata rikuspa, taporqa: Pikunataj kaykunari? nispa. 9Josetaj kuticherqa: Kaykunaqa kay Egiptopi Diospa qowasqan churiykuna kanku, nispa. Chantá tatan nerqa: Qayllaykuchimuway paykunata saminchanaypaj, nispa.
10Israelqa allin machuña karqa, chayrayku manaña imatapis allinta rikuyta aterqachu. Josetaj wawankunata astawan tatanman qayllaykucherqa, paytaj much'araspa, paykunata ojllaykorqa. 11Chantá Joseta nerqa: Noqaqa manaña ujtawan rikusunayta yuyarqanichu. Chaywanpis Diosqa wawaykikunatapis rejsichiwanraj, nispa.
12Joseqa tatanpa moqon patamanta churinkunata oqharerqa,#48.12 Wawata moqo pataman tiyachina: Chaypacha usuman jina, uj runa wawata moqon pataman tiyaykuchispa, niyta munarqa chay wawata wawanpaj rejsikapusqanta. Gn 30.3. chantá pampakama k'umuykorqa. 13Chaymanta Joseqa iskaynin churinkunata tatanman watejmanta qayllaykucherqa. Paña makinwan Efrainta churarqa tatanpa lloq'ennejman, lloq'e makinwantaj Manasesta churarqa tatanpa pañannejman. Ajinamanta Efraín Israelpa lloq'ennejpi karqa, Manasestaj pañannejpi. 14Israeltajrí makinkunata cruzaspa, paña makinta sullk'a kajpa uman pataman churarqa,#48.13-14 Paña maki uma pataman churay: Chaypacha usuman jina, wawaj uman pataman paña makita churana niyta munarqa maypaj qhawasqa kasqanta, chayrí munasqa kasqanta. Gn 27.1-40. chayqa Efraín. Lloq'e makintataj Manasespa uman pataman churarqa, pay kuraj kaj kajtinpis. 15Chantá Jacob ajinata nispa, Joseta samincharqa:
Jatun tatay Abrahampata, chantá tatay Isaacpatawan Diosnin, pitachus paykuna yupaycharqanku,
chay Dios kasqaymantapacha kunankama uywakuwarqa.
16Paymin tukuy sajra kajmanta waqaychawaj Angelqa.
Kunantaj pay kay wawakunata saminchachun.
Paykunanejta sutiy yuyarisqa kachun,
jinallataj ñawpa tataykuna Abrahampata, Isaacpatawan sutinkupis.
Kaykuna wiñaspa, ashkha wawayoj kachunku,
kay pachapitaj may chhikata mirachunku, nispa.
17Joseman mana allinchu rijch'arqa tatan paña makinta Efrainpa umanman churasqanqa. Chayrayku tatanpa makinta jap'ispa, Manasespa umanman churayta munarqa. 18Jinaspataj, José tatanta nerqa: Ama tatáy, ajinataqa ruwaychu. Kayraj kuraj kajqa. Paypa umanman paña makiykita churay, nispa.
19Tatantajrí mana munarqachu, nerqataj: Yachani wawáy, yachani. Manasespis ashkha runayoj jatun suyuman tukonqa. Chaywanpis paymanta nisqaqa sullk'a kaj aswan kanqa, mirayninmantataj may chhika suyukuna rikhurenqanku, nispa.
20Chantá Jacobqa chay p'unchaypacha Efrainta, Manasestawan samincharqa: Israelitakuna qankunaj sutiykichejta oqharispa, wajkunata saminchanqanku, nenqankutaj: Dios qanwan ruwachun, imaynatachus Efrainwan, Manaseswan ruwarqa, ajinata, nispa. Ajinata Israelqa Efrainpa sutinta ñawpajta oqharerqa, Manasespa sutintataj qhepallata.
21Chaymantataj Joseta nerqa: Noqaqa wañupusajña, chaywanpis Diosmin qankunawan kanqa. Aswan qhepamantaj payllataj ñawpa tataykichejpa Canaán jallp'aman kutichisonqachej. 22Noqataj wawqeykikunamanta nisqa qanman aswan jatun jallp'ata qoyki Sichem cheqapi, mayqentachus mayta maqanakuspa amorreokunamanta qhechorqani, chayta, nispa.
ప్రస్తుతం ఎంపిక చేయబడింది:
Génesis 48: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
