Matthew 7
7
Achi Kayu Manguis
(Luk. 6:37-42)
1Intuɏuy Jesus lantudtuchu un kalala, “Achiyu kuison cha uchum ta achin Apudyus kuison chikayu. 2Ti ha in-ilonyuʼn manguis kan cha uchum un tagu, siya bo koon Apudyus un manguis kan chikayu. Lu silu kiged chi idchonyu si asintataguyu, siya bo kiged chi idchon Apudyus kan chikayu. 3Puggey un mitullonglu siɏun-ik si atan chi suludlu, ked achipunlu maila sitap si atam? 4Ma in-ilom un mangibyegaʼn kaalok chi siɏun-ik si atam, lu achipunlu maila sitap si uwam un ata? 5Sikan pappai! Ulaom yan kaalon chi sitap si atam ta pumatak chi mangitullongam un mangaan si siɏun-ik si atan chi biɏunlu.”
6“Achiyu ipatut itudtuchu ugud Apudyus si taguʼn mangam-amsiw ya issalan chongɏon, ti miyaligcha si asu ya byeɏok. Ti ulay lu langila idchom si asu, kotbyeɏn chikayu. Achiyu bo idchon chi kangilaan un bongeɏ kan cha byeɏok ti iwakatcha ya choschosancha.”
Ig-iggayuʼn Malluwalu
(Luk. 11:9-13)
7Kalan bo Jesus, “Lu awed masapuɏyu, kochewonyu kan Apudyus ot idchola kan chikayu. Lu awed singtonyu, maochesanyu. Ked lu mangkongkong kayu si sawang, milukat kan chikayu. 8Ti losan un mangkochew kan Apudyus, maatod chi kochewola. Lu silu mansingit si piolaʼn sington, maochesala. Lu silu mangkongkong, milukat chi sawang kan siya. 9Silu kan chikayuʼn aamma, un lu mangkochew chi alakyu si makan, ha idchonyu kamma byetu? 10Ked lu manchawat si lamos, ha idchonyu kamman bo uɏog? 11Kan chikayuʼn malagbyasuɏ, lu ammuyuʼn mangatod si bibiɏu kan cha aalakyu, giluɏa bo Amayuʼd langit achi mangatod si bibiɏu kan cha losan un mangkochew kan siya.
Ha Labukeɏan Chi Lintog Apudyus Ya Tudtuchun Cha Propeta
12“Koonyu kan cha uchum un tagu chi pionyu un kooncha kan chikayu. Ti laoy chi labukeɏan chi lintog Moses ya cha inggilin cha propeta.”
Ha Lalipit Un Liwangan
(Luk. 13:24)
13“Mangoy kayu si lalipit un liwangan, ti lawaya liwangan kan manggochong chi chaɏan un umoy ud impiyeɏlu, ked gapu ta manggochong chi halat un liwangan, achu cha mangoy. 14Ngim gapu ta lalipit chi liwangan ya mansukun chi chaɏan un umoy si biyeg un mallalayun kan Apudyus, ked akit cha mangoy.”
Ha Kayu Ya Mambubungala
(Luk. 6:43-45)
15Intuɏuy bo Jesus kalan un, “Allechenyu cha silan propeta. Umalicha kan chikayu un agin-uk-ukoy un isun chi keɏlilu, ngim ha katuttuwaan, isucha atap un asuʼn kuman. 16Milalasinyu chicha gapu si kokòoncha, isun chi kayu un maammuwan lu mamunga. Ha mamunga kamma iwoy si eɏagen, willu grapes si abukachu? 17Ha bibiɏuʼn kayu, bibiɏu bo ibungala, ngim ha lawwik un kayu, lawwik bo ibungala. 18Ha bibiɏuʼn kayu, achipun mamunga si lawwik, ked ha lawwik un kayu, achipun mamunga si bibiɏu. 19Ked ha kayuʼn achipun mamunga si bibiɏu, mapokpok ked litungu. 20Ked ha mangilasilanyu kan cha silan propeta ked gapu si kokòoncha.”
Ha Achipun Mipati Si Mampangatan Apudyus
(Luk. 13:25-27)
21Ot intuɏuy Jesus lantudtuchu, “Chakampun si losan un mangibyega kan sakon un, ‘Apu, Apu,’ ked makaslok si Mampangatan Apudyus, ngim abus cha mangwa si pion Amak ud langit. 22Ked lu chumtong chi eɏgew un manguisan Apudyus kan cha tagu, achu cha mangkadkachegu kan sakon, ‘Apu, Apu, peɏlokom chikami! Gapu si ngachenlu, imbyegbyegami bibiɏuʼn chameg. Gapu si ngachenlu, pileɏyawmi cha aɏan. Gapu si ngachenlu, achu killingwamiʼn lakaskaschaaw.’ 23Ngim ibyegak kan chicha, ‘Lappun ammuk kan chikayu! Wissed kayu, chikayuʼn mangmangwa si lawwing!’ ”
Cha Chuwaʼn Lampaud Si Byeɏoy
(Luk. 6:46-49)
24Ot kalala bo, “Lu silu chumngeɏ si allaʼn ugudku ya koola chicha, miyalig si lasilib un taguʼn lampaud si byeɏoyla si lap-at chi byetu. 25Ulay lu iggalaʼn umuche-uchen ya lummitap ya iwasot chi byali, achipun mikusob chi byeɏoyla ti lapaud si lap-at chi byetu. 26Ngim lu silu mangngeɏ si allaʼn ugudku ya achipunla koon, miyalig si looggog un taguʼn lampaud si byeɏoyla si kaleglegelan. 27Ked lu iggalaʼn umuche-uchen ya lummitap ya iwasot chi byali byeɏoyla, mikusob ya miwakat.”
28Gilamput ked Jesus imbyega cha hachi, laschaaw cha amod un taguʼn illinggew si in-ilolaʼn lantudtuchu. 29Ti lantudtuchu kan chicha un kamad alla kalobbongala, chakampun un isun cha mimistulun chi lintog.
ప్రస్తుతం ఎంపిక చేయబడింది:
Matthew 7: HUA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2009, Wycliffe Bible Translators, Inc. in cooperation with Translators Association of the Philippines
