Matthew 6
6
Tudtuchun Jesus Mipanggop Si Mangtochen Kan Cha Makasapuɏ
1Intuɏuy Jesus lantudtuchu un kalala, “Allachenyu ta achiyu ipappaila kan cha tagu lu mangwa kayu si bibiɏu, ti lu siya mangwaanyu pionyuʼn ichayaw chikayu kan cha tagu, achipun chikayu gunggulaan kan Amayuʼd langit.
2“Ked lu awed idchonyu kan cha taguʼn makasapuɏ si tuɏung, achiyu ipappaila kan cha tagu un isun chi kokòon cha aginpapati un ipappailacha kan cha kekkesa ya cha sinagoga cha bibiɏuʼn kokòoncha ta chayawon cha tagu chicha. Tuttuwa ibyegak kan chikayu, lagamputcha ilawat chi gunggulacha. 3Ngim chikayu, lu awed idchonyu kan cha makasapuɏ, ilanyu ta achiyu ipatagammu ulay siluʼn tagu. 4Ngim iyaggakawyuʼn mangtod ked si Amayu un mangitutullong kan cha losan un achipun maila gunggulaan chikayu.”
Tudtuchu Mipanggop Si Luwalu
(Luk. 11:1-13)
5“Ked lu malluwalu kayu, achiyu iyis-isu kan cha aginpapati ti pionchaʼn isiked un malluwalu si sinagoga ya cha igid cha kekkesa ta itullong cha tagu chicha. Tuttuwa ibyegak kan chikayu, lagamputcha ilawat chi gunggulacha. 6Ngim lu malluwalu kayu, lumlok kayu si kuwetuyu ya inyolobyu ked malluwalu kayu kan Amayu un achipun maila ked si Amayu un Apudyus un mangitutullong si pin-ayu koon, ked gunggulaan chikayu.
7“Lu malluwalu kayu achiyu anchu-anchuwon un mangkekemangon un isun chi kokòon cha achipun mamati, ti kalancha pun lu chongɏon Apudyus chicha lu achu maibyegacha. 8Achiyu tuɏachon chi malluluwalucha, ti ulay si chaampunyu mangibyeg-an tilataggammun Amayuʼn Apudyus cha masapuɏyu. 9Kamatla in-ilonyuʼn malluwalu:
‘Amami un awed langit, machaychayaw otyan chi ngachenlu.
10Chumtong otyan chi Mampangatam utla pita ya
makwa otyan chi piom utla pita un isun chi lakwaʼd langit.
11Mangtodka si ileɏgew un kalonmi.
12Ya pakawalom cha byasbyasuɏmi, ti pilakawanmi bo
cha lakabyasuɏ kan chikami.
13Ya achim ipalubus un masulisug kami ta achi kami makabyasuɏ,
ngim ilisim chikami si lawwing.’ ”#6:13 Osaʼn piolaʼn ibyega si Greek ked milisi kami kan Satalas.
14Ot kalan bo Jesus, “Lu pakawalonyu cha mangwa si lawwing kan chikayu, pakawalon chikayu bo kan Amayuʼd langit. 15Ngim lu achipunyu pakawalon chicha, achipun bo Amayu un awed langit pakawalon chikayu.”
Tudtuchu Mipanggop Si Palaglaun
16Ot intuɏuy Jesus, “Lu mallaun kayu mipagapu si malluwaluwanyu, achi kayu aginchachauy un isun cha aginpapati. Ti pionchaʼn ipaila kan cha taguʼn lallaunchaʼn malluwalu. Ibyegak chi tuttuwa kan chikayu, gilamputcha ilawat chi gunggulacha. 17Ngim lu mallaun kayu, mancheup kayu ya malagaysay kayu, 18taplu achin cha tagu ammuwon un pin-a kayu mallaun ngim abus si Ama takuʼd langit un achipun maila chi sintagammu. Ked si Ama taku un mangitullong si cha litataɏuʼn koonyu, gunggulaan chikayu.”
Ha Mipanggop Si Pilak Ya Bilaklang
(Luk. 12:32-34)
19Kalala bo, “Achi kayu man-ummung si bilaklangyu utla pita un makwaʼn yam-alon chi lakoy, metiyan ya makwaʼn maakaw.#6:19 Si Greek ha metiyan ked achu piolaʼn ibyega: losan un manyam-an, kalon cha utut, langgangan ya lakoy. 1 Kings 10:4-7 20Ngim siya otyan koonyu, man-ummung kayu si kilabyaklangyuʼd langit un lappun manyam-an, achipun metiyan ya lappun bo makaakaw. 21Ti ha katuttuwaala, lu silu potpotgonyu, kapilitan un siya bo isosomokyu.”
Ha Silaw Chi Long-eg
(Luk. 11:34-36)
22Oli pun lan-alig si Jesus un kalala, “Ha ata, siya silaw chi long-eg. Lu bibiɏu atam, masisillawan losan chi long-eglu. 23Ngim lu awed chipiktun chi atam, manggikbot chi losan un long-eglu. Ked lu manggikbot chi awed kan sika imbis un silaw, gettok un amod un pangot!”
Ha Mansimbi Si Chuwaʼn Ap-apu
(Luk. 16:13; 12:22-31)
24“Lappun tagù mansimbi si chuwaʼn ap-apu. Ti kapilitan un memeɏyed si osa ya mansasanga si osa. Ked potpotgola bo osa ya am-amsiwola osa. Achipun makwaʼn manchisalola un mansimbi kan Apudyus ya bilaklang.”
Mipanggop Si Palagchaleg
25“Siyad ibyegak kan chikayu, achi kayu machalagen mipanggop si mataguwanyu, un isun chi kalonyu, ilumonyu ya cha mansilupyu. Ti lapotpotog chi biyegyu lu ha makan ya lapotpotog bo long-egyu lu ha silup. 26Itullongyu ked cha sissiwit un sintatayap, achipuncha mammuɏa ya man-apit ya achipuncha malepon si aɏang. Ngim pakalan Amayuʼd langit chicha. Ha chakampun kamman un lapotpotog kayu kan Apudyus lu cha allaʼn sissiwit? 27Awed kamman akit icheay chi machanchalagen kayu si biyegyu? Pulus.
28“Ked pakayuggey manchaleg mipanggop si cha useɏonyuʼn luput? Itullongyu ked chi in-ilon cha sabsabung un chumakeɏ si tattaɏun, achipun cha mit mangkawachi willu mallaga si silupcha. 29Ngim ibyegak kan chikayu un ulay si Ari Solomon un kabyaklangan,#6:29 Ha somsomok cha Judio si Solomon chi kabyaklangan un tagu un latagu utla lubung. lappun silupla si labibbiɏu lu cha allaʼn sabsabung. 30Lu katchi in-ilon Apudyus un mampabiɏu si luut lawa un sin-akitan chi inggewancha si sala ya lakyawcha bo ked lu bigat masgob, giluɏa kayu bo achila silupan? Ha lappun pammatiyu? 31Ked achi kayu machalagen mipanggop si cha masapuɏyu, un isun chi makan, mailum ya silup. 32Ti cha taguʼn achipun mamati kan Apudyus katchi cha singsingtoncha. Ammun Amayuʼd langit un masapuɏyu losan cha alla. 33Siya otyan isosomokyu Mampangatan Apudyus ya masapuɏʼn koonyu cha piola, ked idchola cha losan un kasapuɏanyu. 34Ked achi kayu machalagen si ligat un chumtong lu bigat. Oli ta lu bigat, asiyu sanguwon chi ligat un chumtong si hachiʼn eɏgew. Ti umalay cha ligat un laklak-amon taku si kacha eɏgew. Ked achi taku chogchog-an.”
ప్రస్తుతం ఎంపిక చేయబడింది:
Matthew 6: HUA
హైలైట్
షేర్ చేయి
కాపీ
Want to have your highlights saved across all your devices? Sign up or sign in
© 2009, Wycliffe Bible Translators, Inc. in cooperation with Translators Association of the Philippines