Luka 21
21
Mav tatak à Zəzagəla aŋa mis kuɗa
(Mark 12.41-44)
1Yesu anə̀ŋ à slələf à gəl kà, anəŋà azlagalepi uwana tawàts sili à sahar aŋa ofərand à abà la məŋ gày Zəzagəla la aku. 2La abatà bay kà anəŋà mis kuɗa kuɗaga uwana awìts kalamay səla à abà la abatà la ləv tekula. 3Yesu agòɗ: “La dziriga, gəpəh à akul kà, mis kuɗa uwanay kà avà kà aɗuwa azladza anik uwanay gesina. 4Azladza uwanay tavà kiya uwanay kà, kà uwana adabaday la slaka aŋatà, ama mis kuɗa uwanay kà, azə̀ɓ à uda kà uwana agà la ahàl aŋa madzadzarla gəl aŋha gesina.”
Yesu apəh gay makal məŋ gày Zəzagəla à ahəŋ
(Mata 24.1-2; Mark 13.1-2)
5Azladza anik tapə̀h lakəl aŋa məŋ gày Zəzagəla kà ahəɗ. ‘Maɗahala vok à uda gà, la azlaakur delga delga gà’, tagòɗ, ‘Ŋgaha la azlatatak anik anik uwana tavàh à Zəzagəla.’ Yesu agòɗ à atà: 6“Mavakay adàsa à waŋ, kà azlaakur uwanay adàdza à ahəŋ kiya uwanay aw, amiyaka bà akur tekula adàgəɗal à gay aw, tadàɓazlah à ahəŋ gesina.”
Azlamatərəɓay uwana adàpahla madəv gay gudəŋ à vok ala
(Mata 24.3-14; Mark 13.3-13)
7Kiya uwaga tanàval à gay la: “Məŋga, mbà à tatak uwaga adàpaka vok ma? Tatak ma uwala à uwana adàpəhanula zlà?”
8Kiya uwaga Yesu agòɗ à atà: “Ɗahàw haŋkəli, dza apapat akul aw, kà uwana azladza aŋuvaw tadàsaha à waŋ la sləm gulo, à uwana ‘Anu azlakristu. Lagwa kà, kaslà aŋha la uwanay adàsa à waŋ lagwa’, tadàgoɗay. Ama kadànəfaw atà aw. 9Baŋa kadàtsənaw gay lakəl aŋa guvəl, la azlamawiyay aŋha kà, ləv adàval akul à gay aw, kà uwana uwaga kà say leri apaka vok dadàŋ, ama uwaga kà makəɗ gəl à ahəŋ aŋa gudəŋ à vok dadàŋ aw.” 10Kiya uwaga agòɗ à atà: “Azladza tsəhay anik tadàpa guvəl la azlatsəhay anik, ŋgaha makoray anik adàpa guvəl la makoray anik. 11Azlamaɓəlak à vok aŋa kutso adàgahay la ahəŋ aŋuvaw, ɗuvats la azlamay, la matərəɓay adagahay la ahəŋ la azlaslaka anik anik. Azlatatak guba, la azlanadzipo məŋga tadàsa à ahəŋ la zagəla.”
12“Ama kà uwaga aŋa mapak vok gesina kà tadàkasah akul, tadàtsərəkwah akul tadàtərərɓah akul la azlagày madəv kuɗa la aku, ŋgaha tadàwats akul à daŋay, tadàbayàh akul à huma aŋa azlasufəl, ŋgaha à huma aŋa azlalawan kà gi. 13Uwaga la uwana adàvà à akul tetəvi kà maz sayda gulo. 14Lagwa kà, gəɗawaŋ à afik la ləv aŋkul la tsəh kà akul aŋa magogotsay kà aŋa mahəl à ahəŋ aw. 15Kà uwana gi la gəl gulo la uwana gədàguway la paŋaw aŋkul la awtày, kà mav à akul matsihila kà masla məzam aŋkul aŋa maməl akul gəl à ahəŋ aw. 16Tekeɗika kà, bà azlababa aŋkul, la azladeda aŋkul dardarga, ŋgaha la azlaslawda aŋkul la uwana tadàtsərkwah akul. Ŋgaha tadàzah sifa aŋa azlaanik aŋkul ala aya. 17Azladza gudəŋ à vok gesina tadàpəsew akul kà uwana kawoyaw gi. 18Ama bà la uwaga kà, amiyaka bà aŋidz takasagəl aŋkul tekula babay kà adàzila aw. 19La matsizlla à ahəŋ lela aŋkul la uwana kadàɓəzaw à sifa aŋkul.”
Yesu apəh gay makal Urusalima à ahəŋ
(Mata 24.15-21; Mark 13.14-19)
20“Mok uwana kadànəŋaw azlaməna guvəl tadàkəs gay à Urusalima à adi kà, sə̀làw kà nekwa: ‘Takal à ahəŋ adàgay’, kadàgoɗaw. 21Kiya uwaga azlauwana atà la Yahudiya kà, tadàhoy à gudəŋ à afik. Ŋgaha azlauwana tadàgay la huɗ aŋa Urusalima kà, tadàza vok, ŋgaha azlauwana la lig gà la uda kà, tadàda à abà aya aw. 22Ama azlamavakay uwaga kà azlamavakay aŋa seriya la mazay, ama kà magəɗ uwana à afik tatsetsèr à wakità Zəzagəla à abà.#Hosəya 9.7 23Ŋgərpa adàgay la azlamis uwana la bəza la huɗ, la azlauwana bəza vərna aga à atà la ahàl la mavakay uwaga, kà uwana matərəɓay la mapak ləv aŋa Zəzagəla adàpəhla vok ala la tataka azlatsəhay uwanay la abà. 24Tadàkaɗah atà la katsakar, tadàpakah atà ala kà azlamayà la tataka azlatsəhay gudəŋ à vok la abà. Azladza uwana azla Yahudiya aw, tadàhabah Urusalima à tsəh tsəràh à uwana kaslà aŋatà adàdəv à gay.”
Mas à ahəŋ aŋa Kona aŋa dza
(Mata 24.29-31; Mark 13.24-27)
25“Azlamasəlay, la azlanadzipo anik anik la afats la abà, la təla la abà, la azlatsetsiliŋ, ŋgaha la kutso la abà adàgay la ahəŋ. Gudəŋ à vok adàgay la mazaw la gel la abà, gəl adàkaɗ atà à vok kà mahohumay aŋa magaŋtsay aŋa azladərəv.#Yesayya 13.10; Yoyel 2.31 26Azladza tadàməts à gay kà ŋgərpa uwana adàpaka vok la kutso la abà la vəɗah, kà uwana azlandzəɗa uwana la zagəla tadàɓəlak à vok. 27Kiya uwaga kadànəŋaw Kona aŋa dza atsa à ahəŋ la habaga zagəla la abà, la mazləɓay, ŋgaha la maslay gesina.#Daniyel 7.13 28Mok uwana azlatatak uwaga tadàdzəka mapakàh vok kà, dzərəɗàkàw vok ala, tsìzllàw gəl ala la matsizlla à ahəŋ lela, kà uwana maɓəlay aŋkul kà nekwa.”
Uwana gudəv apəhla ala
(Mata 24.32-35; Mark 13.28-31)
29Kiya uwaga Yesu apə̀h à atà gay la gay la abà uwanay: “Nərə̀zàw gudəv la azlaahàf anik anik gesina tsi. 30Baŋa kadànəŋaw azlabaɓasl aŋatà tadzəka maɗay kà, sə̀làw kà madara kà nekwa. 31La kità babay, mok uwana kadànəŋaw azlatatak uwaga tadàdzəka vok kà, sə̀làw kà, makoray Zəzagəla kà nekwa atsa à waŋ. 32La dziriga, gəpəh à akul: Zamana uwanay adàdəv à gay dadàŋ kà mapak vok aŋa azlatatak uwaga aw. 33Zagəla la kutso tadàdəv à gay, ama gay gulo kà, adàdəv à gay aw.”
Nə̀ŋàwla gəl aŋkul
34“Nə̀ŋàwla gel aŋkul! Kà gəl aŋa makaɗ akul à vok lakəl aŋa tatak masay, la tatak may, la azlatatak aŋa gudəŋ à vok uwanay aw! Tsa baŋa kità aw kà, mavakay aŋa seriya adàsa à waŋ adàgoruh akul. 35Kà uwana mavakay uwatà kà, adàsa à waŋ kà bokuba makəs tatak aŋa kəda kəfu à uwana adàsa azladza à gudəŋ à vok à gəl. 36Dzàw à ahəŋ la adi, də̀vàw kuɗa la kaslà gesina, kà akul aŋa maɓəz ndzəɗa kà matəf uwana la gay ala atsa à waŋ gesina, ŋgaha kà akul aŋa matsizlla à ahəŋ dzawwa la huma aŋa Kona aŋa dza.”
37Tekeɗika la afats kà, Yesu atàpla tatak à azladza la məŋ gày Zəzagəla la aku, ama la mokokhu gà kà, ahàd, ahə̀n à gudəŋ uwana afik: ‘Gudəŋ kuvu’, tagòɗal. 38Maham à ahəŋ dza gesina asà à waŋ la bəŋ la zay la tsəh kà matsəɓal sləm la məŋ gày Zəzagəla la aku.
ప్రస్తుతం ఎంపిక చేయబడింది:
Luka 21: mfh
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©2019, Wycliffe Bible Translators Inc. All rights reserve.
