ЛукӀа 22
22
Иса рекьиз кӀан хьун
(МатӀай 26:2-5, 14-16; Мрк. 14:1-2, 10-11)
1Песагь тӀвар алай ТӀили фарин сувар мукьва жезвай. 2ЧӀехи хахамарни тавратдарар Иса чпи гьикӀ рекьидатӀа лугьуз са багьнадихъ къекъвезвай, амма абуруз халкьдик гъулгъула акатиз кичӀезвай. 3Исадин цӀикьвед тилмиздикай сад тир Искарият лакӀаб алай Ягьудак иблис акатна. 4Ам, Иса чӀехи хахамринни аскеррин кьилевайбурун гъиле гьикӀ твадатӀа лугьуз, меслят ийиз фена. 5Абуруз хвеши хьана, абуру а кардай адаз пул гун хиве кьуна. 6Ягьуд абурун икьрардал рази хьана, ва ам, Иса халкьдиз таквадайвал абурун гъиле тун патал, са къулай вахтунихъ къекъвезвай.
Песагь суварин тӀуьн-хъун
(МатӀай 26:17-23; Мрк. 14:12-25; 1-Кар. 11:23-25)
7ТӀили фарин суварик адет тирвал тукӀвадай Песагьдин кӀел къурбанддиз акъуддай югъ атана. 8Исади Петрудизни Ягьядиз «Алад, фена чаз Песагь суварик недай затӀар гьазура», – лагьана.
9– Ваз чна тӀуьн гьина гьазурна кӀанзава? – хабар кьуна абуру.
10– Куьн шегьердиз гьахьайла, – жаваб гана Исади, – квел цив ацӀай квар гвай са итим гьалтда; гьадан гуьгъуьна аваз фена, гьам гьахьай кӀвализ куьнни гьахь. 11А кӀвалин иесидиз «Муаллимди Вичин тилмизрихъ галаз санал Песагь суварин суфра авай кӀвал гьим я лугьуз хабар кьазва», – лагь. 12Адани квез вини гьавада чӀехи тавдин кӀвал къалурда. Гьана Песагьдин тӀуьн гьазура.
13Абурни фена. Абуруз Исади лагьай гафар галай-галайвал кьилиз акъатайди акуна. Абуру гьана Песагьдин тӀуьн гьазурна.
14Вахт хьайила, Исади, Вичин цӀикьвед илчини галаз суфрадихъ ацукьна, 15лагьана:
– И Песагьдин фу Заз квехъ галаз Зи азаб-азиятдин вахт алукьдалди тӀуьнайтӀа гзаф кӀандай! 16За квез лугьузва: за и фу Аллагьдин Пачагьлугъда Песагь кьилиз акъатдалди недач.
17Ахпа Ада сукӀра гъиле кьуна, Аллагьдиз шукур авуна, лагьана:
– Къачуна им куь арада пая. 18За квез лугьузва хьи, гьа и декьикьадилай, Аллагьдин пачагьвал жедалди, За мад чехир – ципицӀрин миже хъвадач.
19Ахпа Ада фу къачуна, Аллагьдиз шукур ийиз-ийиз, фу кӀус-кӀус авуна, а кӀусар абуруз гана ва лагьана:
– Им куь рекье къурбандзавай Зи Беден я. Зун рикӀел хтун патални, гьа икӀ ая.
20Нянин тӀуьнилай кьулухъ Исади мад гъиле сукӀра кьуна лагьана:
– И сукӀра – цӀийи Икьрар я. Ам Зи иви авадаруналдин кутӀунда. 21Ингье, Зун хаинвилелди маса гузвай касдин гъилни Зи Гъилихъ галаз санал са суфрадал ала. 22Инсандин Хва Вичиз Аллагьди ганвай рекьяй фида, амма Ам маса гудай касдиз жедайди ма́са гуж я!
23Тилмизар чпин арадай и кар ийидайди яраб вуж ятӀа лугьуз, сада садавай хабар кьаз хьана.
Агъавал мийир, амма къуллугъ ая
(МатӀай 20:25-28; Мрк. 10:42-45)
24Тилмизрин арада, чпикай вуж чӀехиди яз гьисабна кӀанзавайди ятӀа лугьуз, гьуьжетар гьатна. 25И чӀавуз Исади абуруз лагьана:
– Мажусийрин арада пачагьри чпин халкьарал агъавал ийизва, гьукумдарри чпиз «Архаяр» лагь лугьуз халкьдивай тӀалабзава. 26Куь арада акӀ тахьурай! Квекай виридалайни вине авайда вич агъада авайдай, гьакимвалзавайда вич виридан кьилел-кӀвачел элкъвезвайдай кьун лазим я. 27Вине авайди вуж я – суфрадихъ ацукьнавайди яни, я тахьайтӀа гьадахъ гелкъвезвайди? Суфрадихъ ацукьнавайди тушни кьван? Амма Зун куь арада вач-хъша хьиз ава.
28Зун синагъ ийизвай вахтара куьн датӀана Захъ галамукьна. 29Зи Бубади Заз пачагьвал гьикӀ багъишнатӀа, Зани ам квез багъишзава. 30Зи Пачагьлугъда куьн нез, хъваз Зи суфрадихъ жеда. Тахтара ацукьна, куьне Исраилдин цӀикьвед тайифадин гьахъ-дуван ийида.
Петруди кьил къакъудуникай
(МатӀай 26:33-35; Мрк. 14:29-31; Ягь. 13:37-38)
31Эй, Симун, Симун! Иблисдиз куьн къуьл хьиз сафунай ягъиз кӀан хьанай. 32Амма За ви иман куьтягь тахьуй лагьана вун патал дуьаяр авунай. Вунани, Захъ элкъвена, ви стхайрин иман мягькемара.
33Исадиз:
– Я Агъа! – жаваб гана Петруди. – Ви гуьгъуьна аваз къазаматдиз физни, рекьизни зун гьазур я.
34Амма Исади лагьана:
– За ваз лугьузва, я Петру, къе кӀекре гьарайдалди, вуна Закай пудра кьил къакъудда.
35Ахпа Исади тилмизриз лагьана:
– За куьн пул авай кисени гвачиз, гьебени гвачиз, кӀвачин къапарни гвачиз ракъурайла, квез кими хьайи затӀ хьанайни?
Абуру «ваъ» лагьана жаваб гана.
36Инал Ада лагьана:
– Амма гила пул авайда пул яхъ, гьебени къачу. Нихъ тур авачтӀа, жуван пекерни гана тур къачу. 37За квез лугьузва хьи, Каламда: «Адакай тахсиркаррин тай авуна»#Яшай 53:12. лагьана кхьенвай гафар Зи кьилел атун лазим я. Закай вуч кхьенватӀа, исятда гьам кьилиз акъатда.
38– Я Агъа! – лагьана абуру. – Ингье чав кьве тур гва.
– Бес я, – лагьана Ада.
Гетсеман багъда Исади дуьа авун
(МатӀай 26:36-46; Мрк. 14:32-42)
39Къайда хьанвайвал, Иса Зейтун пелел фена. Адан гуьгъуьнал алаз Адан тилмизарни фена. 40Чкадал агакьайла, Исади абуруз лагьана:
– Куьн темягьра гьат тавурай лугьуз дуьаяр ая.
41Ам Вич, гадардай къван аватдай кьван чкадиз абурувай къакъатна, метӀер яна, дуьаяр ийиз эгечӀна:
42– Я Буба! За Ваз тавакъу ийида, Ваз кӀан ятӀа, Зун и азабдикай яргъаз ая! ЯтӀани, Заз кӀандайвал ваъ, Ваз кӀандайвал хьурай!
43Цаварай Исадин патав Адак руьгь кутаз малаик атана.
44РикӀик зурба гъалаба кваз, Исади мукьуфдалди дуьаяр ийизвай; Адакай ивидин стӀалар хьиз гьекь чилел кӀвахьзавай. 45Дуьа акъвазарна, Ам Вичин тилмизрин патав атана. Адаз абур дерт хьана ахвариз фенваз жагъана. – 46Куьн вучиз ксанва? – жузуна Ада. – Къарагъ, куьн темягьра гьат тавурай лугьуз дуьаяр ая.
47Гаф мецел аламаз, гзаф инсанар атана акъатна, кӀвенкӀве Адан цӀикьвед илчидикай сад тир Ягьуд авай. Ам темен гуз Исадиз мукьва хьана.
Иса маса гун ва кьун
(МатӀай 26:47-56; Мрк. 14:43-50; Ягь. 18:3-11)
48– Эй, Ягьуд! – хабар кьуна Исади. – Вуна Инсандин Хва темендалди маса гузвани?
49Инал жедай кардин кьил акурла, Исадихъ галайбуру Адаз лагьана:
– Я Агъа! Турар кардик кутадани?
50Абурукай сада кьилин хахамдин вач-хъшадин эрчӀи яб яна галудна. 51Инал Исади лагьана:
– Бес я, акъваз!
Адан япук гъил кяна, ам сагъар хъувуна. 52Вичиз акси экъечӀнавай чӀехи хахамриз, агъсакъалриз ва Аллагьдин КӀвалин къаравулрин кьиле авайбуруз Исади лагьана:
– Куьн Зи винел турарни вагьрамар гваз атанва, на лугьуди, Зун са къачагъ я! 53Зун квехъ галаз гьар юкъуз Аллагьдин КӀвале жезвай, куьне Зал гъил хкажначир. Амма гила куь девран алукьнава, мичӀивилин девран гъалиб хьанва.
Петруди Исадикай кьил къакъудун
(МатӀай 26:67-75; Мрк. 14:66-72; Ягь. 18:15-18, 25-27)
54Иса кьуна кьилин хахамдин дараматдиз тухвана. Петруни яргъай хьиз абурун гуьгъуьна аваз физвай. 55Иса кьурбуру гьаятдин юкьвал цӀай авуна. Вири санал ацукьайла, атана абурун арада Петруни ацукьна. 56Ам цӀун патав ацукьнаваз акур са къаравушди, адаз мукьуфдалди килигна, лагьана:
– Имни Гьадахъ галайди тир.
57Амма Петруди вич Исадихъ галайди инкар авуна, а папаз лагьана:
– Ам Заз чидай кас туш.
58Са герендилай ам акур са масадани лагьана:
– Вунни гьабурукай я.
Амма Петруди лагьана:
– Туш.
59Са сят кьван алатайла, мадни сада вичел чӀалахъ яз лагьана:
– РикӀивайни, имни Гьадахъ галай, гьа имни галилейви я.
60– Вун квекай рахазватӀа, зун гъавурда гьатзавач, – лагьана Петруди.
Ада икӀ лугьузвайла, кӀекре гьарайна. 61Гьа вядеда Ребби элкъвена Петрудиз килигна; Петрудин рикӀел Реббиди лагьай «Къе кӀекре гьарайдалди вуна Закай пудра кьил къакъудда» гафар хтана. 62Варарай экъечӀна, ам къагьардалди шехьна.
Исадик тахсирар кутун
(МатӀай 26:63-65; Мрк. 14:61-65; Ягь. 18:19-21)
63Иса кьунвай инсанри, Адакай рахшандар ийиз, Ам гатазвай. 64Исадин вилер кутӀунна, Адан чин ягъиз, Адавай хабар кьазвай:
– Вун пайгъамбар ятӀа, вун ни янатӀа, лагь кван!
65Абуру Адак хкуьрдай маса гафарни лугьузвай. 66Югъ малум хьайила, чувудрин агъсакъалар, чӀехи хахамар ва тавратдарар кӀватӀ хьана. Абуру Иса чпин Меслягьатдиз тухвана 67ва хабар кьуна:
– Лагь кван чаз, Месигь Вун яни?
– За квез лагьайтӀа, куьн Зи чӀалахъ жедач – лагьана Исади. 68Квевай За хабар кьуртӀа, куьне Заз жавабни гудач. 69Къенин йикъалай Инсандин Хва къудрат авай Аллагьдин эрчӀи патавай ацукьда.
70Гьа чӀавуз вирида лагьана:
– АкӀ хьайила Вун Аллагьдин Хва я ман?
– Куьне Зун я лугьузва хьи, – жаваб гана Ада.
71– Мад чаз шагьидвал герек яни? – лагьана абуру. – Чаз вири Адан Вичин сивяй ван хьана.
ప్రస్తుతం ఎంపిక చేయబడింది:
ЛукӀа 22: ЛезПК
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Институт перевода Библии, 2010-2024
