ЛукӀа 21

Кесиб хендедадин садакьа

(Марк 12:41-44)

1 Исадиз садакьадин пул вегьидай буьруьнждикай авунвай крчуна пул эцигзавай девлет авайбур акуна. 2Адаз аниз кьве чет кепек вегьенвай кесиб хендедани акуна.

3Исади лагьана:

– За квез рикӀивай лугьузва: и кесиб хендедади амайбурулай гзаф пул вегьена. 4АтӀабуру чпихъ авай артуханди вегьизвай, и папа, вичин кесибвилизни килиг тавуна, вичихъ авай-авачир вири гана.

Гележегдикай Исадин келимаяр

(МатӀай 24:1-51; Мрк. 13:1-37)

5Са бязибур, Аллагьдин КӀвал эцигнавай къванер гьихьтин иербур ятӀа, ам гьихьтин багьа затӀаралди чӀагурнаватӀа#21:5 ЧӀагурун – иер авун. аку лугьуз рахадайла, Исади лагьана:

6– Ахьтин йикъар къведа хьи, квез ина аквазвай кьван затӀарикай къван къванцел аламаз садни амукьдач, вири барбатӀ жеда.

7– Муаллим! – хабар кьуна Адавай. – А кар мус жеда? Адакай виликамаз хабар гудай ишара гьихьтинди я?

8Исади жаваб гана:

– Куьн гъалатӀ тежедайвал мукъаят хьухь, гзафбур, чеб Зун я лугьуз, Зи ТӀварцӀелай атанвайди я лугьуз, а вахтни алукьнава лугьуз, къведа. Абурун гуьгъуьна гьатмир. 9Дявейрикай ва гъулгъулайрикай ванер къвез хьайила, квез кичӀе жемир: сифте гьакӀ хьун лазим я, амма им эхир туш.

10Гьа чӀавуз Исади абуруз лагьана:

– Халкь халкьдал къарагъда, пачагьлугъни – пачагьлугъдал. 11Чка-чкайра зурба залзалаяр жеда, кашни тӀегъуьн гьатда, маса бедбахтвилерни къведа ва цавайни зурба ишараяр жеда. 12Адалайни вилик Зун себеб яз куьн кьада ва хурук кутада. Синагугра куь дуван ийида, куьн къазаматда твада, пачагьринни гьакимрин вилик куьн жавабдарвилиз чӀугвада. 13Гьа чӀавуз квез Закай рахадай мумкинвал жеда. 14Хъсандиз рикӀел хуьх: гьихьтин жавабар гудатӀа лугьуз, виликамаз фикирар ийимир. 15За квез рахадай мезни гуда, дерин акьулни. Гьич са душмандивайни я куь хура акъвазиз, я куьн гафаралди тухуз жедач. 16Диде-бубаярни стхаяр-вахар, мукьва-кьилиярни дустар куьн рекьидай рекьерихъ къекъведа, квекай са бязибур рекьинни ийида. 17Зи тилмизар хьуниз килигна, вирибуруз куьн такӀан жеда. 18Амма куь кьилелай аватай са чӀарни пуч жедач. 19КӀевиз акъваз – куьн хилас жеда.

20Кьушунри элкъуьрна кьунвай Ярусалим акурла, гьа чӀавуз чир хьухь хьи, ам тергдай вахт мукьва хьанва. 21Гьа чӀавуз Ягьудатда авайбур дагълариз катрай. Шегьерда вуж аватӀа, гьанай экъечӀрай, шегьердин патарив вуж гватӀа, шегьердиз тефирай. 22Кьисас йикъар ва Каламда кхьенвайди кьилел къведа. 23Гьа чӀавуз кӀвачел заланбурузни хурухъ чагъа аялар галайбуруз гуж жеда! И чилел зурба мусибат къведа, Аллагьдин хъелни и халкьдин кьилел аватда. 24Турунин хура гьатна, инсанрин эхир пуч жеда ва гзафбур маса халкьар авай чкайриз есирар яз тухуда. Маса халкьарини, чпин гъиле гьатай серфе куьтягь тахьанмаз, Ярусалимдиз кӀур гуда.

25Ракъинилай, вацралай ва гъетерилай чанда кичӀ твадай ишараяр аквада. Къув къачунвай гьуьлуьнни къизгъин лепейрин гъиляй вуч ийидатӀани тийижиз зурзун акатнавай халкьарин ийир-тийир квахьда. 26Цавун къуватар юзана акур инсанар къах хьана амукьда ва алемда жедай крари абурун чанда кичӀ твада.

27Гьа вахтунда абуруз Инсандин Хва циферал алаз, Вичин къудратда аваз ва баркалла алаз къвез аквада. 28И гужар кьилел къведайла, тик хъхьухь, кьилер хкаж хъия, куь хиласвал мукьва жезвайди чир хьухь.

29Исади абуруз кьиса ахъайна:

– Инжилдиз ва амай тарариз килиг. 30Абуру пеш авуна акурла, квез мукьвара гад алукьдайди гьикӀ чир жезватӀа, 31гьакӀ За лугьузвайди кьилел къвез акурла, Аллагьдин пачагьвилин вахт агакьнавайди квез чир хьухь. 32За квез рикӀивай лугьузва: ам гилан несил алатна фидалди кьилиз акъатда. 33Чилни цав алатна фида, амма Зи Гафар алатна фидач. 34Килиг гьа, куьн явавилерин, хъунрин, дуьньядин ката-галтугунрин гуьгъуьна гьатайтӀа, а югъ, желе хьиз, атайла, куьн ийир-тийир жеда: 35а югъ дуьньяда виридан кьилел къведа. 36Кьилел къведай крар регьятдиз алуд жедайвал, бес кьадар къуват хьун патал ва эхирдай Инсандин Хцин вилик экъечӀиз хьун патал, гьар са чӀавуз уях хьухь ва дуьаяр ая.

37Гьар юкъуз Исади Аллагьдин КӀвале чирвилер гудай, йифиз анай экъечӀна Зейтун пелел фена гьана жедай. 38Пакамалай Адан гафариз яб гуз вири халкь Аллагьдин КӀвализ Адан патав къведай.

ప్రస్తుతం ఎంపిక చేయబడింది:

ЛукӀа 21: ЛезПК

హైలైట్

షేర్ చేయి

కాపీ