Chivkeeb 34
34
Dinas Raug Yuam
1Muaj ib nub Yakhauj hab Le-as obtug tug ntxhais Dinas txawm tawm moog saib cov tuabneeg Kana-aas tej quaspuj. 2Hamaules kws yog tuabneeg Hivis kws yog tug thawj saib cheebtsaam ntawd, thaus Hamaules tug tub Sekhees pum Dinas, nwg txawm tuaj coj Dinas moog hab muab Dinas yuam. 3Rua qhov Sekhees pum Dinas zoo nkauj heev, nwg txhaj ua zaaj ua ntxeev ntxag kuas tau Dinas yuav.#34.3 ntxag kuas tau Dinas yuav; lossis ua kuas nwg zoo sab. 4Sekhees txhaj has rua nwg txiv has tas, “Txiv, kuv xaav kuas koj moog yuav tug ntxhais ntawd lug ua kuv tug quaspuj.”
5Yakhauj paub has tas nwg tug ntxhais raug kev txaajmuag, tabsis vim nwg cov tub moog yug tsaj rua nraag teb lawm, nwg txhaj tsi has ib yaam dlaabtsi txug thaus nwg cov tub lug tsev txhij. 6Hamaules kws yog Sekhees txiv txhaj tuaj thov Yakhauj, 7tawm thawj thaus Yakhauj cov tub rov nraag teb lug txug tsev. Thaus puab nov dlheev txug zaaj nuav, ua rua puab mob sab hab chim heev rua qhov Sekhees tau ua saib tsi taug cov tuabneeg Yixalayees kws yog nwg muab Yakhauj tug ntxhais yuam le ntawd. 8Hamaules has rua Yakhauj has tas, “Kuv tug tub Sekhees nyam koj tug ntxhais heev le lawm, thov ca nwg yuav koj tug ntxhais ua nwg tug quaspuj. 9Thov ca peb lug sis coglug, kuas mej hab peb tsaav tuabneeg txhaj muaj kev txis tshoob txis kug rua peb tej mivnyuas. 10Ces mej txhaj tau nrug peb nyob huv peb lub tebchaws nuav. Mej yuav nyob thaaj chaw twg los nyob ntawm mej nyam, tso kev laag luam, hab muaj ndlag tug kuas ywjpheej rua mej.”
11Ces Sekhees has rua Dinas txiv hab nwg cov nug has tas, “Thov mej ua zoo rua kuv, hab kuv yuav muab txhua yaam kws mej xaav tau rua mej. 12Thov qha yaam kws mej xaav yuav rua kuv, hab ca le has nqe tshoob kuas ntau npaum le mej xaav sau, mej xaav kuas them npaum twg los kuv yuav them npaum ntawd rua mej, tsuav yog mej kaam muab mej tug muam rua kuv yuav ua quaspuj xwb.”
13Vim qhov kws Sekhees tau ua rua puab tug muam Dinas raug kev txaajmuag, Yakhauj cov tub txhaj teb dlaag ntsuav rua Sekhees hab Hamaules obtug. 14Puab has rua Sekhees has tas, “Peb tsi pum zoo ca peb tug muam moog yuav ib tug txivneej twg kws tsi tau ua kevcai txav tawv le, yog ua le ntawd mas rhuav peb ntsejmuag heev. 15Tsuas muaj tuab qho kws mej ua lawv le peb ua xwb, mej txhua tug txivneej yuavtsum tau ua kevcai txav tawv ib yaam le peb ua huv tuabsi, 16ces peb txhaj paub nrug mej ua tshoob ua kug. Peb txhaj yuav nrug mej nyob tau ua ke hab peb txhaj yuav nrug mej ua tau ib tsaav tuabneeg. 17Tabsis yog mej tsi leeg ua lawv le peb has hab ua kevcai txav, peb yuav coj peb tug muam lug hab tsiv tawm huv tebchaws nuav moog.”
18Hamaules hab nwg tug tub Sekhees pum zoo yuav lawv le puab has ntawd, 19ces tug tub hluas txawm maaj nrooj ua lawv le puab tau has ntawd, rua qhov nwg nyam Yakhauj tug ntxhais heev. Sekhees kuj yog ib tug kws muaj meejmom huv nwg tsev tuabneeg.
20Hamaules hab nwg tug tub Sekhees txhaj moog rua tim qhov chaw saablaaj kws nyob tim roojvaag nroog hab has rua cov pejxeem huv lub nroog has tas: 21“Cov tuabneeg nuav nrug peb sis raug zoo heev, ca puab nrug peb nyob huv lub tebchaws nuav hab ca puab moog lug ywj sab. Lub tebchaws los kuj dlaav txaus puab nyob hab. Ca peb tej tub moog yuav puab tej ntxhais hab puab tej tub tuaj yuav peb tej ntxhais. 22Puab yeej zoo sab nrug peb nyob hab nrug peb koom ua ib tsaav tuabneeg, tabsis muaj ib txuj cai kws peb yuavtsum tau ua, yog peb txhua tug txivneej yuavtsum tau ua kevcai txav tawv le puab. 23Mej puas xaav tau puab tej tsaj txhu hab tej khoom kws yog puab le lug ua peb tug? Yog mej xaav tau, ca le leeg yuav puab txuj cai hab ca puab nrug peb nyob.” 24Taagnrho cov pejxeem suavdlawg puavleej pum zoo yuav hab ua lawv le Hamaules hab Sekhees has ntawd, txhua tug txivneej txhaj ua kevcai txav tawv taagnrho.
25Tau peb nub tom qaab kws cov txivneej ua kevcai txav tawv ntawd tej nqaj tseem mob, Yakhauj ob tug tub: Xime-oos hab Levis kws yog Dinas ob tug nug, txawm nqaa obtug ob raab ntaaj nyag kev tuabywv moog rua huv nroog, hab muab cov txivneej huv tua tuag taag, 26nrug rua Hamaules hab nwg tug tub Sekhees huv tuabsi. Ces obtug txhaj coj Dinas huv Sekhees tsev tawm lug lawm. 27Tom qaab kws Xime-oos hab Levis obtug muab cov tuabneeg ntawd tua tuag taag lawm, Yakhauj cov tub tseem moog fuab lub nroog ua pauj qhov kws puab tug muam raug txaajmuag ntawd. 28Puab caab taagnrho tej tsaj txhu, nyuj, neeg luav hab muab txhua yaam khoom kws nyob huv nroog hab huv tej teb nqaa huv tuabsi moog lawm. 29Puab coj txhua yaam kws muaj nqes, nteg tej quaspuj hab mivnyuas, hab nqaa txhua yaam kws nyob huv puab tej vaaj tse huv tuabsi lawm hab.
30Yakhauj has rua Xime-oos hab Levis has tas, “Meb ua rua kuv tau kev ntxhuv sab lawm, taamsim nuav cov tuabneeg Kana-aas hab cov tuabneeg Pelixes, hab cov tuabneeg kws nyob huv tebchaws nuav yuav ntxub kuv heev. Kuv tsi muaj tuabneeg coob, yog puab sis sau tuaj tawmtsaam hab tua kuv, mas peb tsev tuabneeg yuav raug kev puamtsuaj taag le.”
31Tabsis obtug teb has tas, “Yuav ca Sekhees coj wb tug muam moog ntxag zoo le tug namndlav los?”
ప్రస్తుతం ఎంపిక చేయబడింది:
Chivkeeb 34: HNJ2000
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2000 United Bible Societies. All rights reserved.
