Chivkeeb 33
33
Yakhauj Ntsib Exaus
1Thaus Yakhauj pum Exaus hab plaub puas leej kws nrug Exaus ua ke tuaj, nwg txawm muab nwg cov mivnyuas faib rua Le-as, Laxees hab rua ob tug nam yau. 2Nwg tso ob tug nam yau hab obtug cov mivnyuas moog ua ntej, tso Le-as hab nwg cov mivnyuas tuaj nruab nraab, ces maam tso Laxees hab Yauxej tuaj tom qaab kawg. 3Yakhauj moog ua puab ntej hab nwg txhus caug ndlua huv aav pe xyaa pes moog ti nkaus ntawm nwg tug tijlaug. 4Tabsis Exaus dlha ceev nrooj moog cuag Yakhauj, puag nkaus hab nwj nwg. Obtug ob kwvtij sis qawg quaj. 5Thaus Exaus tsaa muag xaam nwg pum dlheev cov quaspuj hab cov mivnyuas ntawd, nwg txawm nug has tas, “Cov tuabneeg kws nrug koj lug nuav yog leejtwg?”
Yakhauj teb has tas, “Tijlaug, cov mivnyuas nuav yog Vaajtswv tug kws ibtxwm ua zoo kawg nkaus, pub rua kuv.” 6Ces ob tug nam yau nrug obtug cov mivnyuas txaav zog lug hab txhus caug ndlua pe, 7Le-as hab nwg cov mivnyuas maam lug, hab thaus kawg Yauxej hab Laxees maam le txaav lug hab txhus caug ndlua pe.
8Exaus rov nug has tas, “Ua le paab kws kuv xub tuaj ntsib ne? Paab ntawd yog leejtwg paab hab?”
Yakhauj teb has tas, “Paab ntawd yog kuv muab rua koj, thov koj hlub kuv.”
9Tabsis Exaus has tas, “Kuv tug kwv, kuv tub muaj txaus kuv lawm, ca le ceev tej ntawd rua koj xwb.”
10Yakhauj has tas, “Tijlaug, yog koj txaus sab rua kuv thov koj ca le yuav tsi xob yig, ca le txais tej kws kuv muab pub rua koj lawm. Kuv tau rov lug pum koj mas zoo kuv sab npaum nkaus le kuv pum Vaajtswv ntaag, rua qhov nwgnuav koj ua zoo kawg nkaus rua kuv. 11Thov koj ca le yuav tej kws kuv muab pub rua koj ntawd, Vaajtswv hlub kuv hab nwg pub txhua tsaav yaam kws kuv xaav yuav rua kuv.” Yakhauj has tej lug mog lug muas thov moog txug thaus Exaus leeg yuav lawm.
12Exaus has tas, “Peb ca le npaaj hab sawv kev moog. Kuv yuav ua tug coj mej kev moog.”
13Yakhauj teb has tas, “Tijlaug, koj yeej paub has tas kuv cov mivnyuas tseem yau moog tsi taug ceev, hab kuv txhawj kuv tej yaaj hab tej tsaj txhu kws muaj mivnyuas mog. Yog peb yuav moog ceev nrooj, ntshai moog ib nub xwb kuv tej tsaj yuav tuag taag. 14Thov ca koj ua kuv ntej moog, hab kuv yuav maam maam lawv koj qaab lug, kuv tej tsaj txhu hab kuv cov mivnyuas moog taug le caag kuv yuav moog le ntawd, txug thaus kuv lug cuag tau koj huv tebchaws Edoos.”
15Exaus has tas, “Yog le ntawd, kuv maam le ca kuv cov tuabneeg ob peb leeg nrug koj.”
Tabsis Yakhauj teb has tas, “Tijlaug, tsi taag koj yuav tso tuabneeg paab kuv, tsuav yog koj txaus sab rua kuv xwb ces tau lawm.”#33.15 koj txaus sab rua kuv xwb ces tau lawm; lossis yog has tas koj pum zoo. 16Yog le ntawd, nub ntawd Exaus txhaj sawv kev ua ntej rov lug rua tebchaws Edoos lawm. 17Tabsis thaus Yakhauj moog txug ntawm Xukaus, nwg txawm ua tsev rua nwg nyob hab ua nkuaj kaw nwg cov tsaj rua ntawd. Tub yog vim le nuav txhaj muab thaaj chaw ntawd tis npe hu ua Xukaus.#33.17 Xukaus: Lub npe nuav lug Henplais txhais has tas, “tsev pheebsuab.”
18Yakhauj rov qaab tim tebchaws Mexuputamias lug txug rua huv lub nroog Sekhees kws nyob huv tebchaws Kana-aas tsi ntsib kev nyuaj sab dlaabtsi, hab nwg moog ua zog nyob ze rua ntawm ntug nroog Sekhees. 19Nwg muab tau ib puas dlaim nyaj yuav tau ib thaaj aav ntawm Sekhees txiv Hamaules cov xeebntxwv.#Yas 24.32; Yhs 4.5 20Yakhauj txhaj teeb tau ib lub thaaj rua ntawd hab tis npe hu ua Ees lawv le cov Yixalayees tug Vaajtswv lub npe.
ప్రస్తుతం ఎంపిక చేయబడింది:
Chivkeeb 33: HNJ2000
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2000 United Bible Societies. All rights reserved.
