KANTHOUNA 9
9
Dunpune Noahnung Tlou Kantompi
1Heirou Dunpune Noahle aiyei chanao rapya phor shaampiwurbi yanungei shun, “Lung punbi yu-cha shunlakasu, heitoubi tlaipangpal karyouni thimlakasu. 2Tlaipangpallei yaalim-yoolim nammakhi, nungthourei traicha waalim nammakhi, thleira ukni tulchabi klei frullim nammakhi, heirou yuirillei thangalim nammanikhi naya chini leilakasu; heitoubi yarap namyerwa heiri naihutra silnawurla. 3Ringbi klei chiwirap namyerwa heiri naiyei murchaknungei hoirouwa; heirou heengna-rona mar'em nammakhi Keine nanungei ukchak hoinanungei piwurla; heinakrimni Keine put namyerwa heiri nanungei piwurla. 4#Lev 7.26,27; 17.10-14; Khn 12.16,23. Heiya nani anchumri hee kyaoni maimakrou da, ngamri hee heirouwei lhawai kyao. 5Kouweiyo toulanungri, Keine neiyei rongchanyei hee khlang kansherbi bueirou, heirou ramyaa kantangroueikhi Keine hee khlang kansherbi bueirou; heirou thimi hukounak khatni aiyei teinao khatya hatlanungri airouwei Keine kansherbi hee'khlang bueirouhui. 6Thimi hukhatni thimi khatya hee dayerlanungri, ayakhi mini hee dayerrou; koungameiyo toulanungri Dunpune tlaipang thimiya Aiyei shakrung loubini sheemkhou. 7Heitoubi pung-shaan hoiniyasu, heirou thimi mshingkhi chungduilakasu, heitoubi tlaipangpal karyouni paallakasu.”
8Heirouri Dunpune Noahnungle, aiyei chanao rapnung shun, 9“Thilak, Keine neinungle, heirou hillei hungroukyou neiyei yu-cha rapnungle, 10heirou nangkou kalhonni mali rilla leikhoubi wathukkur lhawaipal chiwi kantangnung: ramyaa, ui-waa heirou tlaipangpallei yaalim-yoolim kantangnungkhi tloukantom khat khoupiwurla.” 11Keine neinungei kantompikur tlouri: “Lhwaipal chiwi rapya hanui kallengni yuitangni dumhatyermakarou, heirou hanui kallengni tlaipangpalya yuitangni maangyermakarou.” 12Heirou Dunpune shun, “Keile nangle, heirou nangkou kalhonbi klei lhawaipal chiwirap nammaei tlakra khoupikur tlou kantomnei mu'kna hutlha awari hillei hungroukyou yuthit-chathit phani leirouwa. 13Heirou Keine ramei hangra langthingsui#9.13: langthingsui: Rulpui mham. khoupirou, heiwani Keile tlaipangpallei tlakra khourilkur tlou kantomnei hutlha hoirou. 14Heirou Keine nungthoura rameini hukyei kheenrou, ramei hangra langthingsui mupharou. 15Kheen heirouri Keile nangle, heirou lhawaipal chiwirap nammaei tlakra khoupikur tlou kantom heiya Keine ningthutrou, heitoubi hanui kallengni yuitangni lhawaipal chiwi rapya maangyermakarou. 16Ramei hangra langthingsui alyeinung, heiwaya Keine mubi, Dunpule tlaipangpallei lhawaipal chiwirap nammaei tlakra khoupikur klui naimak tlou kantom heiya Keine malummakni ningthutrou.” 17Heitoubi Dunpune Noahnungei shun, “Awane Keile tlaipangpallei chiwi rapbei tlakra khoukur tlou kantomrilnei mu'kna hutlha hoiyerrou.”
Noahyei Chanapawarap
18Malitangrei wathukkur Noahyei chanapawa rapri Shem, Ham heirou Japheth yarap heiriya. Heirou Hamni Canaan'ya pukkhou. 19Yakhyum heiri Noahyei chanapawarap, heirou yarap heirouwei tlaipangpal karyouni yu-cha raanbini paalkur.
20Heirou Noahri loutrun thimi khat hoiyurbi, heirou ani darkha yekul khat trunyoukur. 21Heirou ani darkha heiyui mongloubi malipkur; heitoubi aiyei cheemwaira phirulkhi yaomakni hakthilni ipkur. 22Heirouri Canaan'yei pa Hamni aiyei pawani kou'phirulkhi yaomakni ai'mshathil hangwalni ipbi loukleiya hungmulhakbi, daangra aiyei teinaorap napung'khninung washunpikur. 23Heirouri Shemle Japheth yakhuntani phiyeng khat loubi, heitoubi yakhuntayei khlabaangra khingyaapbi hilkarshon'ne hungchangbini yai pawayei phirul yaomakni klei heiya hupkhalpikur. Heirou yakhuntani yai pawayei hakthilni louklei heiya yaimitni mulhakmaknungei toubi hilkarshon'ne hungchangnarei kallekthimakni wathukkur. 24Heirou Noah'ne malipnarei aiyei mit kahar'yeinungri, aiyei chanapawa dongwani anungei touwurkhou heiya kamuwurla. 25Heirouri ani shun, “Canaanri manchoya phalakasu; heitoubi ari aiyei teinao rapbei bomra, shok rapbei shok hoilaksu.” 26Heirou ani asitoubikhi yunthu, “Keiyei Dunpu, Umpune Shemya phor pilaksu; heitoubi Canaanri aiyei shok hoilaksu. 27Heitoubi Dunpune Japhethya lal dunyerlaksu, heirou ayari Shemyei khuiluphi cheemra leiyerlaksu. Heiya Canaanri aiyei shok hoilaksu.”
Noah Hikur
28Heirou Noah'ne yuitang hilloukhi kum macha-khyumle somngabil ringthu.
29Heisitoubi Noah'ne aiyei chaanrou kum pulni macha-takole somngabil paalkhoubi hikur.
ప్రస్తుతం ఎంపిక చేయబడింది:
KANTHOUNA 9: MARIBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
