KANTHOUNA 8
8
Yuitang Yentrimkur
1Heiyanungkhi Umpune Noahya, heirou akou mali rilla kalhonbi klei ui-waa, ram-yaa namyakhi malumpimakni ningthutkur; heitounei ngammei Dunpune yuimai doura marthee thiyerbini yuitang heiya trimyerkur. 2Heirouri samadrurei yuinaput nammakhi mruwurla, heirou nungthourei yuiputkhi tipburla, heirou nungkhi romakni hammura. 3Heitoubi yuitang heikhi tlaipangpallei thang'knaini yenheepbi, heirou tlaini machale somnga tlungeinungri yui heiri kanthritbi yenheepbura. 4Heitoubi tangla tlun'eniyei tlaini chiple enirou mali heiri Ararat Lhungdoura kartanwurbi yongmathrumkur. 5Heirou tangla tlunchip hungtlungphani yuitang heiri yentrimwurbi, heirou tlunchip tlung tanglayei lamkri tlainirouri, Lhungdou bungrap heiri muphayoukur.
6Heirou tlaini somliniyei hillouri Noah'ne aiyei paalbaangkur maliyei cheemkhar heiya laatbini thrilthikur. 7Heitoubi ani aak khat malhetthutkur, heirou ramwaa heichani yuitang trimchibongyen kyongle-kale trai'kallengchabi leikur. 8Heithangrou ani hanuikhi ram'mathru khatkhi malhetthutbini, yuitang heiri thleimairouei trimchiyako toubine yilthiyerkur. 9Heiya mathru heichani aiyei ho mathrumbi chunanungei bi kourakhi makkhuiyabini, hanuikhi aiyei leina bi malira yentrai'kallengthu, ngamri tlaipangpal karyouni yuitangni omdumbi leileihui. Heingammei aiyei hut loumalamthutbi mathru heichaya mali rilla hanui louloulhakpikur. 10Heirouri ani tlaini enini karngeithobi, heihillou malirouei mathru heichaya hanuikhi malhetthutdurthu. 11Heirouri mathruni heiniyei rawainung anungei yenkallengthu; heitoubi thilak, mathru heichani aiyei murra Olive heengna mar'emcha khat yenchungheibi yenkallengkur. Heiya loumubi Noah'ne yuitang heiri trimmurame toubi ningmukur. 12Heitoubi ani hanuikhi tlaini enini karngeithubi, mathru khatkhi malhetdurtho; heiya mathru heichari anungei hanui yenkallengmakura.
13Noahyei kum machathrukle khat tlungkum, heiyei lamkri tanglayei lamkri tlainirou, yuitang heiri tlaipangpalrei trimmura; heirouri Noah'ne maliyei bungkhum laatdurbi thrilthiyeinungri, thilak, tlaipangpal karyouni yuitang trimmurbi yentaarwurame touri muphawurla. 14Heirou thangei tangla tlun'khni tlungkur heirouri, tangla heiyei tlaini somnile'eni heirouri tlaipangpalra yui heepburbi taarwurchiya. 15Heirouri Dunpune Noah'nung shun, 16“Malirouei wathuklaka, nangle, heirou neinule, neiyei chanao raple, heirou yaiyei nu raple nangkou kalhonni heiruithutlaka. 17Heile kalhonni nangni yaalim-yoolim namma, heirou ui-waa rapkhi heirou frul limrap nammakhi ruithutpilaka; heitoubi yani tlaipangpalla pung-shaanlakasu.” 18Heisitoubi Noah'ne akou kalhonni, aiyei nu, aiyei chanaorap, heirou yaiyei nu rapya ruithutloubini wathukkur. 19Heitoubi yaalim-yoolim kantangkhi, frullim kantangkhi, heirou tlaipang doura ringbi klei ui-waa lim kantangkhi kyaoni yai bommai'yei thimi rapne ruibini malirouei wathukkur.
Noah'ne Dunpunung Malamthut Putmakat
20Heirou Noah'ne Dunpu'nungei khrahpal khat sabaangkur, heitoubi khying yaalim kantangle, khying waalim kantangkhi loubini khrahpal doura malamthut put khoini makatkur. 21Heirouri Umpune makatput heiyei muiknam khrimya loumrupbi, heirou Aiyei ukningra asitoubi ningchakur, “Tlaipang thimini douweiyoubi aiyei ukningra lhangaimakyadik ningchabini kleiya hoiyanungkhi, yaingamrou tlaipangpal awaya Keine kouniroukhi maangyermarou; heirou lhawaipal chiwi rapya himaangyerkur heinaksini, kouniroukhi Keine yayari hanui kallengni maangyermarou. 22Tlaipangpal awane leiliyenri, trunwai tlanei, trun luknei, kreikhi-shakhi, manthral-phalbi, heirou masa-nunghang khainei kumchaan tamtou heiri dongnaimakni leiyerrouwa.”
ప్రస్తుతం ఎంపిక చేయబడింది:
KANTHOUNA 8: MARIBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
