Mateo 6

Pagtoloꞌ sabab panabang meꞌ aꞌa miskin

1“Pahatul-hatul kaꞌam, daꞌa kaꞌam maghinang hāp supaya hadja kaꞌam takite weꞌ aꞌa. Peggeꞌ bang hinangbi inin supaya hadja kaꞌam takite weꞌ aꞌa, gaꞌ niyaꞌ tumbasbi amban Tuhanin, Samabi si surgaꞌin. 2Hangkan bang kaꞌam ngurung si meꞌ aꞌa miskin, daꞌa kaꞌam magpabawag kuweꞌ meꞌ aꞌa mangurung dem langgalin duk si meꞌ lānin supaya siye pinudji weꞌ aꞌa sinduwehin. Sabennal akahante kaꞌam, bang siye pudji aꞌa, katumbasan ne siye, duk iye miyaꞌan tumbas si siyehin. 3Saguwaꞌ kaꞌam, bang kaꞌam ngurung si meꞌ aꞌa miskin, daꞌa kaꞌam magaka-aka bisan si bagaybi manamalin 4duk gaꞌi kataꞌuhan pangurungbin. Samabi si surgaꞌin kataꞌuhanne hininangbin bisan sipuk duk tumbasanne du kaꞌam.”

Pagtoloꞌ sabab pangampunin

(Lukas 11:2-4)

5“Bang kaꞌam ngampun si Tuhanin daꞌa kaꞌam kuweꞌ meꞌ aꞌa magmā-māhin. Peggeꞌ sinna siye ngampun si Tuhan si langgal duk si bihing lān supaya siye takite weꞌ aꞌa. Akahante kaꞌam, bang siye pudji aꞌa, katumbasan ne siye, duk iye miyaꞌan tumbas si siyehin. 6Saguwaꞌ bang kew ngampun, pī kew dem bilik duk tambelun gawangin duk ngampun kew si Tuhan, iye Samanu gaꞌi takitehin. Samanu inin, takitene du hininangnun duk tumbasanne du kew.

7“Bang kaꞌam ngampun, daꞌa kaꞌam missā pinatahaꞌ duk binalik-balik kuweꞌ meꞌ aꞌa manggaꞌi mangataꞌuhan Tuhanin, peggeꞌ paꞌinde weꞌ takale Tuhanin siye bang ekka bissāde. 8Daꞌa be kaꞌam kuweꞌ siyehin peggeꞌ kataꞌuhan Samabi Tuhanin du andang bang ine meꞌ sukalbin. 9Bang kaꞌam ngampun subey kuweꞌ inin:

‘O Ammaꞌ, kaꞌu sama kami si surgaꞌin, karayaw pinagaddatan ēnnun weꞌ kēmon manusiyaꞌin.

10Karayaw weꞌ gaꞌi tiggel magbayaꞌ ne kew si kēmon manusiyaꞌ.

Karayaw tinuhut kinabayaꞌannun tuꞌu si dunya sa maluꞌu si surgaꞌin.

11Urunganun kami kinakan ellew inin.

12Ampunun meꞌ duse kamihin kuweꞌ du isab pangampun kami meꞌ makaduse si kamihin.

13Patalahun kami amban sassat duk elliganun kami amban nakuraꞌ seyitanin.’

14“Peggeꞌ bang ampunbi duse saweꞌbin, inampun isab kaꞌam weꞌ Samabi si surgaꞌin. 15Saguwaꞌ bang gaꞌi ampunbi duse saweꞌbin gaꞌi isab dusebin ampun Tuhanin.”

Pagtoloꞌ sabab magpuwase

16“Bang kaꞌam muwase, daꞌa kaꞌam kuweꞌ bantuk suse kuweꞌ meꞌ aꞌa magmā-māhin hadja. Peggeꞌ bang siye muwase, gaꞌi siye ngulaꞌup atawa magsugley supaya takite weꞌ aꞌa weꞌ magpuwase siye. Sabennal akahante kaꞌam, bang siye pudji aꞌa, katumbasan ne siye duk iye miyaꞌan tumbas si siyehin. 17Saguwaꞌ bang kaꞌam muwase, ngulaꞌup kaꞌam duk maglanuꞌ-lanuꞌ kaꞌam 18supaya gaꞌi kataꞌuhan sinduwehin weꞌ muwase kaꞌam. Samabi gaꞌi takitehin, takitene du hininangbin duk tumbasanne du kaꞌam.”

Sabab alataꞌ si surgaꞌ

(Lukas 12:33-34)

19“Daꞌa kaꞌam magtipun alataꞌ tuꞌu si dunya peggeꞌ mura magkaꞌat. Makajari kakan mellek atawa ginahaꞌ, atawa tinangkew bang ilangkat lumaꞌin. 20Saguwaꞌ maghinang kaꞌam hāp supaya niyaꞌ katekkahanbi si surgaꞌ. Duk alataꞌbi iyan gaꞌi takakan mellek, gaꞌi ginahaꞌ duk gaꞌi tatangkew. 21Peggeꞌ antag-antag pangennaꞌanbi alataꞌbin, laꞌi isab patetegan ateybin.”

Dalil payitaꞌan si baran

(Lukas 11:34-36)

22“Mataten dalil payitaꞌan si barante. Bang pastiꞌ pamayamten, hātinen, bentel hinanganten, kuweꞌ dantaꞌ tibuꞌukan baranten. 23Saguwaꞌ bang labut pamayamten, hātinen laꞌat hinanganten, kuweꞌ lindem tibuꞌukan baranten. Bang paꞌinte weꞌ dantaꞌ dem baranten bu lindem hatiꞌ, asal lindem manamal.”

Dinaꞌak gaꞌi magsuse

(Lukas 16:13; 12:22-31)

24“Gaꞌ niyaꞌ daraꞌakan makajari magbanyagaꞌ si duwe amu, peggeꞌ kabunsihanne iyan dambuwaꞌin duk kalasahanne dambuwaꞌin, atawa tuhutne teꞌed dambuwaꞌin duk gaꞌi asipne dambuwaꞌin. Bang pilakin mamahalgaꞌ si kaꞌamin, gaꞌi kaꞌam makajari maghinang isab si Tuhan.

25“Hangkan hep paꞌinku si kaꞌam: daꞌa kaꞌam magsuse sabab kaꞌellumanbin bang ine kinakanbin duk bang ine ininumbin supaya kaꞌam ellum, atawa sabab baranbin bang ine panemmekbin. Mahalgaꞌ pe hep umulin amban kinakan, duk mahalgaꞌ pe hep baranin amban semmek. 26Payamanun bi meꞌ manuk-manuk mapalayangin. Gaꞌi siye magtanem atawa magpagani duk gaꞌi siye magennaꞌ saguwaꞌ pakan Tuhanin siye. Bu kaꞌam, pasōng teꞌed kaꞌam mahalgaꞌ amban meꞌ manuk-manukin. 27Sine kaꞌam tapatahaꞌbi umulbin bisan da ora bang kaꞌam magsuse? 28Weꞌey pe pagsusehanbi sabab semmekbin? Payamanun bi meꞌ sumpingin bang saꞌingge panuligden. Gaꞌi siye maghinang, gaꞌi siye magtennun. 29Bu paꞌin, akahante kaꞌam, bisan Sultan Sulaiman madayahan awwalley, gaꞌ du makapagsemmek hāpnen kuweꞌ dambuwaꞌ meꞌ sumping inin. 30Bang Tuhanin tapasemmekanne pahāp-hāp meꞌ sumping sabetin bu gaꞌi du siye natas, ellum siye kuweꞌitu, pagsumu ineggas, na, kaꞌam pe gaꞌi tapasemmekanne? Asal kulang sandelbi si Tuhanin. 31Hangkan daꞌa kaꞌam magsuse. Daꞌa kaꞌam magpaꞌin, ‘Ine kinakanten bi, ine ininumten bi, ine panemmekten bi.’ 32Meꞌ aꞌa manggaꞌi mangataꞌuhan Tuhanin, iye hep inin luwal pinikilden. Saguwaꞌ kaꞌam, subey kaꞌam gaꞌi magsuse peggeꞌ kataꞌuhan Samabi Tuhanin weꞌ iye inin meꞌ sukalbin. 33Saguwaꞌ iye subey pikilun bi sabab pagbayaꞌan Tuhanin duk sabab panuhut kinabayaꞌannen. Manjari urunganne du kaꞌam kēmon sukalbi inin. 34Hangkan hep daꞌa kaꞌam magsuse sabab sumuhin, peggeꞌ ngaꞌekka hadja kasusehanbin. Sarang ne susebi sabab ellew inin.”

ప్రస్తుతం ఎంపిక చేయబడింది:

Mateo 6: yakV

హైలైట్

షేర్ చేయి

కాపీ