Mateo 4

Panassat pu si Isahin

(Markus 1:12-13; Lukas 4:1-13)

1Manjari binoꞌo si Isa weꞌ Niyawa Sutsihin hap lahat makagindew-gindew supaya iye tasassat weꞌ nakuraꞌ seyitanin. 2Paglaꞌi si Isa gaꞌ iye mangan ampatpūꞌ ellew duk ampatpūꞌ sangem. Pagpuwas miyaꞌan inusan ne iye. 3Manjari tekka nakuraꞌ seyitanin duk paꞌinne pu si Isa, “Bang bennal kew teꞌed Anak Tuhanin, daꞌakun meꞌ batu inin manjari kinakan.” 4Nambung si Isa, paꞌinne, “Tasulat dem kitab, pinaꞌin, ‘Dumaꞌin hadja kinakan makaꞌellum manusiyaꞌin saguwaꞌ iye makaꞌellum manusiyaꞌin meꞌ bissā Tuhanin.’ ”

5Ubus miyaꞌan binoꞌo iye weꞌ nakuraꞌ seyitanin hap Awrusalam duk pinatengge iye diyataꞌ būngan langgal hadjehin. 6Paꞌin nakuraꞌ seyitanin, “Bang bennal kew teꞌed Anak Tuhanin, palaboꞌ kew bittuꞌu, peggeꞌ tasulat du dem kitab pinaꞌin,

‘Daꞌak Tuhanin kew inipat si meꞌ malaꞌikatnen duk tayakde kew supaya bisan bettisnun gaꞌi peddiꞌan weꞌ batu.’ ”

7Paꞌin si Isa, “Niyaꞌ isab tasulat sa inin, ‘Daꞌa suleyanun Tuhanin, Panuhutannun.’ ”

8Pagubus miyaꞌan, binoꞌo iye weꞌ nakuraꞌ seyitanin diyataꞌ punu langkew manamal. Pinakitehan si iye weꞌ nakuraꞌ seyitanin kēmon kalahatan dem dunyahin duk alataꞌden duk balakat nakuraꞌden. 9Paꞌin nakuraꞌ seyitanin pu si Isa, “Kēmon inin pangurungku kaꞌu bang kew pasujud duk nambahayang si aku.” 10Paꞌin si Isa, “Tahalaꞌ kew, seyitan, peggeꞌ tasulat dem kitab, pinaꞌin, ‘Subey kaꞌam pasujud si Tuhan Panuhutanbin duk subey hadja iye dendangan sinambahayangbin.’ ”

11Ubus miyaꞌan tahalaꞌ ne nakuraꞌ seyitanin duk tekka meꞌ malaꞌikatin ngahatul iye.

Tinagnaꞌan weꞌ si Isa hinangnen laꞌi si lahat Jalil

(Markus 1:14-15; Lukas 4:14-15)

12Manjari inin, pagkale si Isa weꞌ kinalabusu Yahiya, pī iye si lahat Jalil. 13Gaꞌ iye patennaꞌ si Nasaret, saguwaꞌ pī iye patennaꞌ si Kapernaum, puweblo si bihing lamew Jalil laꞌi si lahat Sebulun duk Naptali. 14Tuman ne binissā Nabi Isaya dem kitabin, paꞌinne,

15“Lahat Sebulunin duk lahat Naptalihin tudju seddepan duk si dambiyaꞌ boheꞌ Jordan inēnan isab lahat Jalil, magsewusaget meꞌ kabangsahan malaꞌihin.

16Meꞌ aꞌa mapatennaꞌ dem kalindemanin makakite dantaꞌ sahaya manamal. Tekka ne dantaꞌin si meꞌ aꞌa dem kalindemanin, meꞌ matinalew mamateyin.”

17Manjari inin, magtagnaꞌ ne si Isa magmahalayak, paꞌinne, “Pagsusunanun bi dusebin duk lebbahanun bi ne, peggeꞌ sōng pitu Tuhanin magbayaꞌ si kite bi.”

Pineneꞌ weꞌ si Isa meꞌ tindegne tagnaꞌin

(Markus 1:16-20; Lukas 5:1-11)

18Manjari lumengngan-lengngan si Isa laꞌi si susulan lamew Jalil. Sasangne malumengnganin, niyaꞌ takitene duwangan magpungtinaꞌi. Dambuwaꞌin si Simon, inēnan isab iye Petros duk dambuwaꞌin inēnan Andariyas. Magpokot siye laꞌi dem lamew, peggeꞌ siye meꞌ aꞌa magkenna. 19Manjari paꞌin si Isa si siye, “Dayiꞌ kaꞌam nuhut aku. Bahanbin mageddoꞌ-eddoꞌ kenna. Saguwaꞌ bang kaꞌam nuhut aku, toloꞌante kaꞌam mageddoꞌ-eddoꞌ aꞌa pinatuhut si aku.” 20Magtawus inambanan weꞌ de meꞌ pokotden duk nuhut siye si Isa.

21Palanjal ne si Isa. Niyaꞌ isab takitene duwangan magpungtinaꞌi disi Yakub duk Yahiya, meꞌ anak si Sebedehin. Dem bangkaꞌ siye duk samaden, maghatul pokotden. Ilinganan siye weꞌ si Isa duk binoꞌo weꞌ ne. 22Magtawus du isab siye nuhut. Inambanan weꞌ de samaden duk bangkaꞌden.

Magtoloꞌ si Isa duk magpakawuliꞌ

(Lukas 6:17-19)

23Manjari ilatag weꞌ si Isa lahat Jalilin duk magusihat iye si meꞌ kalanggal-langgalan duk magmahalayak aka-aka hāp sabab pagbayaꞌ Tuhanin. Pinakoleꞌ weꞌ ne meꞌ aꞌa masakihin. Bisan ine-ine sakiden pinakawuliꞌ weꞌ ne. 24Manjari bawag ne si Isa si kēmon kalahatan si Siriya. Hangkan binoꞌo isab weꞌ meꞌ aꞌahin pī pu si Isa kēmon aꞌa masakihin, meꞌ mapeddiꞌanin duk meꞌ aꞌa pasayedan seyitanin, meꞌ binabuy-babuyin duk meꞌ aꞌa mamatey barannen. Kawuliꞌan siye kēmon weꞌ si Isa. 25Tungan-tunganne, ekka aꞌa nuhut iye, meꞌ aꞌa amban lahat Jalil, amban meꞌ sampūꞌ puweblo, amban Awrusalam duk Yahudiya duk amban dambiyaꞌ boheꞌ Jordan.

ప్రస్తుతం ఎంపిక చేయబడింది:

Mateo 4: yakV

హైలైట్

షేర్ చేయి

కాపీ