Mateo 3

Magmahalayak Yahiya magpandi-pandi meꞌ aꞌahin

(Markus 1:1-8; Lukas 3:1-18; Yahiya 1:19-28)

1Manjari, masa miyaꞌan tekka Yahiya magpandi-pandi aꞌahin si lahat makagindew-gindew si Yahudiya. Ekka aꞌa hap pī si iye duk magmahalayak iye, paꞌinne, 2“Pagsusunanun bi dusebin duk lebbahanun bi ne, peggeꞌ sōng pitu Tuhanin magbayaꞌ si kite bi.” 3Bakas inaka weꞌ Nabi Isaya sabab Yahiya inin, paꞌinne,

“Niyaꞌ aꞌa maglingan dem lahat makagindew-gindew. Iye inin pinaꞌinnen, ‘Sōng tekka ne Panuhutanin. Palanuꞌun bi lān palabeyannen. Pabentelun bi lān tinuhutnen.’ ”

4Semmek Yahiyahin bulu untaꞌ tinennun duk kanditnen kuwit sapiꞌ. Kinakannen meꞌ dulu duk boheꞌ buwani. 5Hap pī si iye meꞌ aꞌahin amban Awrusalam duk amban tibuꞌukan lahat Yahudiya duk amban meꞌ kalahatan si bihing boheꞌ Jordan. 6Magbennal siye si meꞌ duseden duk pinandi siye weꞌ Yahiya dem boheꞌ Jordan.

7Niyaꞌ isab meꞌ Pariseo duk meꞌ Sadduseo hap pī, meꞌ nakuraꞌ āgama siye. Pagkitene ekka Pariseo duk meꞌ Sadduseo pī makipandi si iye, paꞌinne, “Kaꞌam iyan, addatbin kuweꞌ addat sawe pangakkal. Kannalbi hatu weꞌ gaꞌi kaꞌam tewwaꞌ mulkaꞌ Tuhan sōng matekkahin bang kaꞌam pinandi. 8Hinangun bi hinangan mahāpin duk takite weꞌ tayikutanbi ne dusebin. 9Daꞌa kaꞌam ngandel weꞌ gaꞌi kaꞌam legga Tuhanin sewukat ne kaꞌam tubuꞌ Apuꞌ Ibrahim. Akahante kaꞌam, bisan meꞌ batu inin tahinang Tuhanin du meꞌ tubuꞌ Apuꞌ Ibrahim. 10Kuweꞌ dalil kayu kaꞌam sōng tinebbengan si gamutne. Kēmon kayu manggaꞌi magbuwaꞌ mahāpin tinebbengan duk ilakasan dem ebbut ineggas. 11Pinandi kaꞌam weꞌ ku duk boheꞌ duk takite weꞌ magsusun ne kaꞌam duk lebbahanbi dusebin. Saguwaꞌ niyaꞌ paturul pitu si aku, balakatan pe iye amban aku. Gaꞌi ku bisan pataꞌ moꞌo tehompaꞌnen. Iye inin seddili pamandine kaꞌamin. Niyaꞌ kaꞌam papīhanne Niyawa Sutsihin duk sinduwehin pandine duk ebbut. 12Pagpaꞌilne meꞌ aꞌa mahāpin duk meꞌ aꞌa malaꞌatin. Kuweꞌ iye dalil aꞌa magpalid paley, pagpaꞌilne linggasin duk apahin. Meꞌ linggasin ennaꞌne pinadem lukung saguwaꞌ apahin eggasne dem ebbut gaꞌ niyaꞌ kapalemne.”

Pamandi pu si Isahin

(Markus 1:9-11; Lukas 3:21-22)

13Manjari lumengngan si Isa amban lahat Jalil hap boheꞌ Jordan, duk makipandi iye pu si Yahiya. 14Saguwaꞌ gaꞌi mabayaꞌ si Yahiya, paꞌinne, “Weꞌey kew pitu makipandi si aku? Subey kaꞌu mamandi akuhin.” 15Saguwaꞌ nambung si Isa, paꞌinne, “Pīhun ne, pandihun ne ku kuweꞌitu peggeꞌ subey teꞌed tuhutte kēmon pangandaꞌakan Tuhanin.” Ubus sinulut ne si Isa weꞌ Yahiya. 16Pagubus si Isa pinandi paguwaꞌ iye amban dem boheꞌ. Manjari paluka langitin duk takitene Niyawa Tuhanin kuweꞌ bantuk assang duwaꞌi amban surgaꞌ duk padapuꞌ si iye. 17Niyaꞌ isab suwala amban surgaꞌ missā, paꞌinne, “Inin Anakku kalasahanku. Asal kasulutan ku teꞌed si iye.”

ప్రస్తుతం ఎంపిక చేయబడింది:

Mateo 3: yakV

హైలైట్

షేర్ చేయి

కాపీ